^{کەمپەینی هەڵمەتی زاگرۆسانە کە لە ڕۆژانی ڕابردوودا لەلایەن ڕێکخراوە ژیگەپارێزییەکان و گرووپە شاخەوانییەکانی کوردستانەوە ئامادەکاری بۆ کرابوو، لە شار و ناوچەکانی کوردستان دەستی پێکرد.}

^{ڕۆژی هەینی، ٥ی سەرماوەزی ١٤٠٠ی هەتاوی، ڕێکخراوە ژینگەپارێزییەکان و گرووپە شاخەوانییەکانی سەرانسەری ڕۆژهەڵاتی کوردستان لە ڕاگەیەندراوێکی هاوبەشدا کەمپەینێکیان بە ناوی زاگرۆسانە، بە مەبەستی هەڵمەتی بەڕوو چاندن و سەوزڕاگرتنی زاگرۆس ڕاگەیاند و لە زۆربەی گوند و شار و ناوچەکانی کوردستان هەڵمەتەکە دەستی پێ کردووە.
دەستپێکی هەڵمەتی زاگرۆسانە لە شاری سنە و لەلایەن ئەنجومەنی شنەی نۆژینی کوردستان، کۆما کوردستانی سەوز و گرووپی شاخەوانیی فەرهەنگیی چل‌چەمە، بە ڕێپێوانی شاخەوانیی لە چیاکانی دەوربەری شاری سنە و چاندنی بەڕوو لە سروشتی دەروبەری ئەو شارە دەستی پێکردووە، هەروەها لە گوندی “سلێن” لە ناوچەی هەورامان، ئەنجومەنی ژینگەپارێزیی “گەڵای هەورامان” بە چاندنی داربەڕوو لە شاخەکانی ئەو گوندە و هەروەها بە چاندنی داری ئەرغەوان لەلایەن منداڵان و قوتابییانی قوتابخانەی ئەو گوندە، بەشدارییان لە هەڵمەتەکەدا کرد.
هەر لە درێژەی ئەم هەڵمەتەدا، لە شاری دێولان، ئەندامان و خوێندکارانی ڕێکخراوی “دەنگی ژین و ژیار”، هەڵمەتەکەیان بە باسێک لەسەر پرسەکانی ژینگە و هەڵمەتی زاگرۆسانە لەلایەن یەکێک لە ئەندامانی ئەو ڕێکخراوە دەستی پێکرد و دواتر لە شاخەکان و سروشتی دەروبەری دێولان دەستیان کرد بە چاندنی تووی کەما، لۆ و داربەڕوو.
هەروەها لە شاری مەریوان و لە شارۆچکەی مووسکی ئەو شارە، هەڵمەتی چاندنی بەڕوو لەلایەن لاوان و منداڵان و قوتابییانەوە لە شاخ و سروشتی دەروبەری ئەو شارۆچکەیە بەڕێوە چوو.
هەر لە درێژەی هەڵمەتی زاگرۆسانە، لە پیرانشار، ڕێکخراوی ژینگەپارێزانی پیرانشار، ئامادەکاری کردووە کە لە ڕۆژانی داهاتوودا هەڵمەتەکە بە شیوەیەکی چڕوپڕ لە چیاکان و سروشتی دروروبەری ئەو شارە بەڕێوە ببات.
شایانی باسە کە کەمپەینی هەڵمەتی زاگرۆسانە، چەند ساڵێکە لەلایەن ڕێکخراو و ئەنجومەنە ژینگەپارێزییەکانی کوردستان، گرووپ و ڕێکخراو و ئەنجومەنە شاخەوانییەکان و چالاکانی مەدەنیی کوردستانەوە، بە دروشمێکی دیاریکراو و بە شێوەیەکی بەربڵاو لە سەرانسەری کوردستان بەڕیوە دەچێت، کە ئەمساڵ ئەم کەمپەینە بە هەشتاگی زاگرۆسانە و بە دروشمی “زاگرۆسانە، ئەم نیشتمانە بە باڵای زاگرۆسەوە جوانە”، لە ڕۆژی هەینی، ٥ی سەرماوەز دەستی پێکرد کە تاکوو ڕۆژی ٢٦ی سەرماوەز درێژەی دەبێت.}

٣٠/١١/٢٠٢١