^{مەحموود نیروومەند، تەمەن ٣٦ ساڵ و چالاکی فەرهەنگیی کورد، لەلایەن دادگای ئینقلابی مەشهەد، ١٠ ساڵ زیندانی بەسەردا سەپا.}

^{بە وتەی سەرچاوەیەکی ئاگادار، دادگا ئەو چالاکە کوردەی بە "هەوڵدان دژی تەناهی نەتەوەیی، پڕۆپاگەندە دژی نیزام لە تۆڕە کۆمەڵایەتییەکان و پەیوەندی لەگەڵ گرووپەکانی دژبەری نیزام"، تۆمەتبار کردووە.}

^{ئەو سەرچاوەیە هەروەها وتوویەتی: "ئەو حوکمە لە ماوەی ڕۆژانی ڕابردوودا بەو چالاکە فەرهەنگییە لە زیندانی وەکیل‌ئابادی مەشهەد، ڕاگەیەندراوە".}

^{ڕۆژی پێنجشەممە ٣ی پووشپەڕ، مەحموود نیروومەند، لە گرتنگەی ئیدارەی ئیتلاعاتی مەشهەد بۆ زیندانی وەکیل‌ئابادی ئەو شارە ڕاگوێزرابوو.}

^{لقی ٩٠٣ی لێپرسی دادگای ئینقلابی شاری مەشهەد بە سەرۆکایەتی لێپرس عەلی سلێمانی، "محەممەد نیروومەند"ی بە "پرۆپاگەندە دژی نیزام" و "پەیوەندی لەگەڵ گرووپەکانی دژبەری نیزام"، تۆمەتبار کردبوو.}

^{ئەو هاووڵاتییە لە ماوەی دەسبەسەرکرانیدا، لە "دەستپێڕاگەیشتن بە پارێزەر" و "چاوپێکەوتن لەگەڵ بنەماڵە"، بێبەری کرابوو.}

^{ئەو چالاکە فەرهەنگییە ڕۆژی سێشەممە ٤ی جۆزەردان، بەبێ بەڵگەی یاسایی لەلایەن هێزە ئەمنییەتییەکانەوە دەسبەسەر و بۆ لێپرسینەوە ڕەوانەی یەکێک لە گرتنگەکانی ئیدارەی ئیتلاعاتی شاری مەشهەد کرابوو.}

^{مەحموود نیروومەند خەڵکی گوندی "پلگەرد" سەر بە بەخشی "لوتفاوا"ی شاری دەرگز سەر بە پارێزگای خوراسانی ڕەزەوی و دانیشتووی شاری مەشهەدە.}

^{ئەو چالاکە فەرهەنگییە لە بوارەکانی زمان، فەرهەنگ و هونەری کوردی چالاکی دەکات.}

سەرچاوە کوردپا

٤/١١/٢٠٢١