(2).jpeg)
بەڕێوەبەرایەتیی گشتیی سەرچاوە سروشتییەکانی پارێزگای ورمێ دەڵێت، داربڕین زیادیکردووە و داوا لە خەڵک دەکات هاوکارییان بکەن بۆ دەستبەسەرکردنی داربڕەکان.
هادی قاسمی، بەڕێوەبەری گشتیی سەرچاوە سروشتییەکانی ورمێ رایگەیاند، لە سەرەتای ئەمساڵی هەتاوییەوە دەستیان بەسەر 15 هەزار و 200 مەتر داری بڕاوەی دارستانەکاندا گرتووە و 37 کەسیشیان دەستبەسەرکردووە، بەڵام بڕینی داری دارستانەکان زیاتر بووە.
بەگوتەی قاسمی، ساڵانی رابردوو دانیشتووانی گوندەکانی قەراخ دارستانەکان بۆ کاروباری رۆژانەی خۆیان داریان دەبڕییەوە، بەڵام ئەمساڵ بەهۆی گرانبوونی نرخی دار، ژمارەیەکی زۆری خەڵک روویان لە بڕینەوەی داری دارستانەکان کردووە و بە نایاسایی دەیفرۆشن.
بەڕێوەبەری گشتیی سەرچاوە سروشتییەکانی ورمێ دەڵێت، هێزەکانی سەر بەو بەڕێوەبەرایەتییە و هێزە خۆبەخشەکانی پاراستنی ژینگە هەوڵی پێشگرتن لە بڕینەوەی زیاتری دارەکان دەدەن، بەڵام نەیانتوانیوە پێشی پێبگرن. داوا لە خەڵک دەکات، لەکاتی بینینی داربڕینەوە یان گواستنەوەی دارە بڕاوەکان، پەیوەندی بە ژمارە تەلەفۆنی پۆلیسی دارستانەوە بکەن، کە هێڵی گەرمی 1504ـە.
٢٨/١٠/٢٠٢١
