^{ڕۆژی شەممە ٣ی ڕەزبەر، مامۆستایان لە شارەکانی کرماشان، ئیلام، سنە، مەریوان و سەقز، لە بەرانبەر ئیدارەی پەروەردە و بارهێنان، کۆبوونەوەی ناڕەزایەتییان بەڕێوە برد و خوازیاری جێبەجێکردنی داواکارییەکانیان بوون.}

^{ئەو کۆبوونەوە ناڕەزایەتییە پاش بانگەوازی شورای هاوئاهەنگیی ڕێکخراوە سێنفییەکانی مامۆستایانی ئێران بەڕێوە چوو، مامۆستایانی کوردستان خوازیاری جێبەجێکردنی گەڵاڵەی پلەبەندی، هەڵوشاندنەوەی تەواوی یاسا نادادپەروەرانەکان دژی چالاکانی سێنفی و ئازادکردنی مامۆستایانی زیندانی بوون.}

^{هەروەها ئەنجومەنی سێنفیی مامۆستایانی کوردستان (سەقز و زیویە) لە کۆبوونەوەی ناڕەزایەتیی مامۆستایان لە بەرانبەر ئیدارەی پەروەردە و بارهێنانی شاری سەقز، تەواوی داواکارییەکانی فەرهەنگییانیان کە بریتی بوون لە "جێبەجێکردنی تەواوی یاسای پلەبەندی، جێبەجێکردنی تەواوەتی یەکسانکردنی پارەی خانەنشینکراوەکان و پشتبەستن بە ئەسڵی ١٥ی یاسای بنەڕەتی و ئازادکردنی مامۆستایانی زیندانیکراوە" ڕاگەیاند.}

^{ڕۆژی هەینی ٢ی ڕەزبەر، شورای هاوئاهەنگیی ڕێکخراوە سێنفییەکانی فەرهەنگییانی ئێران ڕایانگەیاندبوو: "شورای هاوئاهەنگی فریوی بەڵێنە بێ پشتیوانەکان و دووپاتبوونەوەی ئەو بەڵێنانە لەلایەن بەرپرسانەوە ناخۆن و هەتا جێبەجێنەکردنی داواکارییەکانیان بە پشتیوانی چین و توێژی فەرهەنگییان، هەتا وەدیهێنانی داواکارییەکانیان ئەو کۆبوونەوە ناڕەزایەتییانە درێژە پێ دەدەن".}

^{پاش بانگەوازی شورای هاوئاهەنگیی ڕێکخراوە سێنفییەکانی فەرهەنگییانی ئێران، ڕۆژی شەممە ٣ی ڕەزبەر، مامۆستایان و فەرهەنگییانی دامەزراو و خانەنشینکراوەکانی زیاتر لە ٣٠ شاری ئێران، کۆبوونەوەی ناڕەزایەتییان بەڕێوە برد.}

^{سەرچاوە کوردپا}

^{٢٦/٩/٢٠٢١}