دەیان کەس لە دانیشتووانی گوندی دشەی پاوە لە پارێزگای کرماشانی رۆژهەڵاتی کوردستان، تووشی نەخۆشی کۆئەندامی هەرس دەبن و بەرپرسانی تەندروستیی پارێزگای کرماشانیش هۆکاری تەشەنەسەندنی نەخۆشییەکە بۆ تێکەڵبوونی ئاوەڕۆ بە ئاوی خواردنەوەی گوندەکە دەگەڕێننەوە.
بەگوتەی بەرپرسانی تەندروستی، رۆژی هەینی 10-9-2021 نزیکەی 200 کەس لە دانیشتووانی گوندی دشە سەردانی نەخۆشخانەیان کردووە و هەر بەو هۆیەشەوە تیمێکی پزیشکییان لەو گوندە جێگیرکردووە.
فارووق سەلیمی، بەڕێوەبەری ناوەندی دەرمان و تەندروستیی پاوە دەڵێت، داوای لە خەڵک کردووە تاوەکو کاتێکی نادیار و بۆ دڵنیابوون لە پاکوخاوێنی ئاوی خواردنەوەیان، سوود لە ئاوی دەبە وەربگرن.
بەهمەن رەوشەنی، جێگری زانکۆی پزیشکیی کرماشان، هۆکاری تەشەنەسەندنی ئەو نەخۆشییەی بۆ تێکەڵبوونی ئاوی خواردنەوەی گوندەکە بە ئاوەڕۆوە گەڕاندەوە و دەڵێت: ئاوەڕۆی گوندەکە گیراوە و جگە لەوەش ئاوەڕۆکە نزیکە لە سەرچاوەی سەرەکی ئاوی خواردنەوەی گوندەکە، بۆیە بەشێک لە ئاوەڕۆکە تێکەڵ بە ئاوی خواردنەوەی گوندەکە بووە.
ژمارەی دانیشتووانی گوندی دشە نزیکەی 2 هەزار کەسە و بەگوتەی بەهمەن رەوشەنی، رۆژی هەینی سەرەتا 114 کەسیان سەردانی نەخۆشخانەی شاری پاوەیان کردووە و بەو هۆیەوە تیمێکی پزیشکییان لە گوندەکە جێگیرکردووە.
فارووق سەلیمی، بەڕێوەبەری ناوەندی دەرمان و تەندروستیی پاوە دەڵێت: 80 کەسیش هەر لە گوندەکە سەردانی پزیشکیان کردووە، تاوەکو ئێستاش 11 کەس لە نەخۆشخانە خەوێندراون.
پێشتریش رووداوی لەمجۆرە لە هەندێک لە گوندەکانی رۆژهەڵاتی کوردستاندا روویانداوە. ساڵی رابردوو هەر لەم کاتەدا نزیکەی 300 کەس لە دانیشتووانی گوندی شێخ سڵە لە ناوچەی سەلاس و باوەجانی ژەهراوی ببوون و بەرپرسانی تەندروستیی کرماشان هۆکارەکەیان بۆ پیسبوونی ئاوی گوندەکە گەڕاندەوە.
١٢/٩/٢٠٢١
