سەڵاحەدین دەمیرتاش، هاوسەرۆکی پێشووتری پارتی دیموکراتی گەلان (هەدەپە) لەسەر سووتانی دارستانەکانی دێرسم دەڵێت: دێرسم ساڵی 1938 بە چ هۆکارێک بۆردومانکرابێت، دارستانەکانیشی بە هەمان هۆکار دەسووتێنرێن
دەمیرتاش لە چەند توویتیکدا رەخنەی لە حکومەت گرتووە و دەڵێ کە بە دەستی ئەنقەست ئەو دارستانانە دەسووتێنرێن و دەڵێ: "کۆنترۆڵنەکردنی ئاگری دارستانەکانی دێرسم بێ توانایی نییە. زۆربەی دارستانەکانی ئەو ناوچەیە بە دەستی ئەنقەست دەسووتێنرێت و رێگەش نادرێت ئەو ئاگرە کۆنترۆڵ بکرێت. ئەمە سیاسەتێکی فەرمییە دەیان ساڵە بەردەوامە. بەداخەوە کە هەمووان ئەم راستییە دەزانن بەڵام بوێریی باسکردنیان نییە. ساڵی 1938 بە چ هۆکارێک بۆردومانکرابێت، ئەو دارستانانەش بە هەمان هۆکار دەسووتێنرێن".
دەمیرتاش لە بەشێکی دیکەی توویتەکەیدا نووسیوێتی، هەروەک چۆن دڵی لە میلاس، مارماریس و ماناڤگاتدایە، بە هەمانشێوەش دڵی لەگەڵ خەڵکی دێرسم، باشکالە و شەمزینان لێدەدات. هاوکات ئاماژەی بە جیاکاری ناوچەیی لەلایەن حکومەتەوە کردووە و نووسیوێتی:''بەدڵنیاییەوە کۆتایی بەو سیاسەتە دەهێنین کە دابەشکاری دەخەنە نێو وڵات و خەڵک. بۆ ئەم مەبەستەش پێویستە هەموو ئەوانەی خوازیاری دیموکراسی و ئاشتەوایین دەست بخەنە نێو دەستی یەکدی و لە تەک یەکدیدا بوەستن".
زیاتر لە دوو هەفتەیە بەشێک لە دارستانەکانی دێرسمی باکووری کوردستان دەسووتێن. سەرەڕای ئەوەی سەرۆکی شارەوانیی دێرسم لەڕێی گرتەی ڤیدیۆیی و میدیاکانەوە داوای لە حکومەت کرد، بەڵام بەپێی گوتەکانی ئەو حکومەتی تورکیا کەمتەرخەمە و خەمساردە لە کۆنترۆڵکردنی ئاگری ئەو ناوچانە.
٣١/٨/٢٠٢١
