سەرچاوە سرووشتییەکانی پارێزگای سنە رایگەیاند لە سێ مانگی رابردوودا هەزار و 160 هێکتار لە دارستانەکانی پارێزگاکە سووتاون. هاوکات ئەنجوومەنی سەوزی چیا رایگەیاندووە، بنکەیەکی سەربازیی لەسەر سنوور رێگەی نەداوە ئاگری دارستانەکانی ئەو ناوچەیە بە تەواوەتی بکوژێننەوە و ئاگر خەریکە دارستانەکان دەسووتێنێت.
سەعدی نەقشبەندی، بەڕێوەبەری سەرچاوە سرووشتییەکانی پارێزگای سنە، دەڵێت: "ئەمساڵ لە 102 جار ئاگر لە دارستانەکانی ئەم پارێزگایە بەربووە، کە 46 ئاگریان تەنیا لە ناوچەی مەریوان بووە".
بەگوتەی سەعدی نەقشبەندی: "بەهۆی ئاگرکەوتنەوەکانەوە 728 هێکتار لە دارستانەکانی ناوچەی مەریوان سووتاون".
بەڵام چالاکڤانانی ژینگەپارێز دەڵێن تەنیا لە ئاگرەکانی چەند رۆژی رابردووی گوندەکانی "دۆڵەبێ"، "دەرەوەران" و "کۆڵیت" زیاتر لە هەزار هێکتار دارستان سووتاون.
لە چەند رۆژی رابردوودا ئاگر بەرۆکی دارستانە ناوازەکانی ناوچەی مەریوانی گرت، کە ئەنجوومەنی سەوزی چیا رایگەیاند، دوای 60 کاژێر زیاتر لە 98%ی ئاگرەکانیان کوژاندووەتەوە.
ئەنجوومەنی سەوزی چیا، لە کەناڵی تەلەگرامی خۆی رایگەیاند: "تەنیا بەشێکی بچووکی ئاگرەکان لە دارستانەکانی گوندی دۆڵەبێ لە نزیک بنکەیەکی سەربازیی مابوو بکوژێنرێتەوە، بەڵام بەرپرس و ئەندامانی بنکە سەربازییەکە رێگەیان نەدا بیکوژێنینەوە".
بەپێی راگەیێنراوی ئەنجوەمەنی سەوزی چیا، پەیوەندییان بە هەواڵگریی پۆلیسی مەریوان، ئیتلاعاتی مەریوان و دامودەزگا حکومییەکانی دیکە کردووە، بەڵام وەڵامیان نەدراوەتەوە و ئەوانیش "بۆ رێگری لە ئاڵۆزی و رووداوی نەخوازراو" ئەو شوێنەیان بەجێهێشتووە.
ئەنجوومەنی سەوزی چیا کاژێر 19ی ئێوارەی یەکشەممە بە کاتی رۆژهەڵاتی کوردستان رایگەیاندووە، ئاگرەکە خەریکە یەکێک لە ناوازەترین و باشترین دارستانەکان لەنێودەبات.
بەگوتەی سەرچاوەیەکی خۆجێی ئاگادار کە نەیویست ناوی بڵاو بکرێتەوە، بنکەی سەربازیی دۆڵەبێ بە ئارپیجی دارستانەکانی ناوچەی دۆڵەبێیان سووتاندووە.
ئەو سەرچاوەیە گوتی: "هێزە سەربازییەکان بەبیانووی قاچاخ و هۆکاری ئەمنی ئاگر لە دارستانەکان بەردەدەن، بەڵام ئەمە تەنیا بیانووە، چونکە ئێستا زۆر پێداویستیی دیکە بۆ پاراستنی ئەمن و ئاسایش هەیە، لەوانە دووربینی تایبەتی شەو، دووربینی جۆراوجۆری دیکە یان درۆنەکان".
دارستانەکان بەهۆکاری دیکەش دەسووتێن، لەوان کەمتەرخەمی گەشتیار و خەڵکی خۆجێی، سووتاندنیان بە مەبەستی کشتوکاڵ و دروستکردنی خانووبەرە، سووتاندنیان بەهۆی ناکۆکی نێوان دانیشتووانی گوندەکان یان بەهۆکارە سروشتییەکانی وەک گەرما.
رووبەری پارێزگای سنە 2 ملیۆن و 937 هەزار هێکتارە، کە 374 هەزار هێکتار بە دارستان داپۆشراوە. ئەم دارستانانە کە تەمەنیان زیاتر لە 50 هەزار ساڵ دەىێت زیاتر دەکەونە ناوچە سنوورییەکانی وەک مەریوان، بانە و هەورامان.
سەرچاوە: رووداوە
5/7/2021
