(2).jpeg)
لە پارێزگای ئیزمیری تورکیا تەقە لە بارەگای پارتی دیموکراتی گەلان (هەدەپە) کرا و بەهۆیەوە ئەندامێکی پارتەکە بەناوی دەنیز پۆیراز گیانی لەدەستدا.
رووداوەکە کاژێر 11:00ی پێش نیوەڕۆی ئەمڕۆ پێنجشەممە لە شارۆچکەی کۆناک روویداوە. کەسێکی نەناسراو بە دەمانچە لە کۆڵانەوە تەقەی لە بارەگای هەدەپە کردووە.
مورات چەپنی، پەرلەمانتاری هەدەپە لە بازنەی ئیزمیر هەواڵەکەی پشتڕاستکردەوە و بە تۆڕی میدیایی رووداوی راگەیاند: "لە رووداوی تەقەکردنەکەدا ئەندامێکمان بەناوی دەنیز پۆیراز گیانی لەدەستداوە و تەقەکەرەکەش لەلایەن هێزەکانی پۆلیسەوە دەستگیرکراوە".
لەکاتی رووداوەکەدا هاووڵاتیان ناوچەکەیان چۆڵکردووە و هەواڵیان بە پۆلیس داوە.
بەپێی راگەیێنراوێک لە پارێزگای ئیزمیرەوە، ئەو کەسەی تەقەی کردووە پێشتر کارمەندی وەزارەتی تەندروستی بووە. لە راگەیێنراوەکەدا هاتووە: "ئەمڕۆ کاژێر 11:05ی بەیانی کەسێک بەناوی (ئۆ، گ) کە پێشتر کارمەندی تەندروستی بووە و دەستی لەکارکێشاوەتەوە، چووەتە نێو باڵەخانەیەک، کە 32 شوێنکاری تێدایە و لە بارەگای هەدەپە کە لە نهۆمی دووەمی ئەو باڵەخانەیەدایە، تەقەی لە کارمەندێکی پارتەکە (د.پ) کردووە و کوشتوویەتی".
تیمەکانی پۆلیس گەیشتنە شوێنی رووداوەکە و کۆڵانەکەیان بەڕووی هاتووچۆدا داخست، دواتریش تەقەکەرەکەیان دەستگیرکرد. لێکۆڵینەوە لە رووداوەکە بەردەوامە
سەرچاوە رووداو
١٨/٦/٢٠٢١
