^{وەزیری دەرەوەی ئەمریكا جارێكی تر هۆشداری دەدات لەوەی كە ئێران نزیكە لە دروستكردنی بۆمبی ئەتۆم و بە پێویستی دەزانێت پەلە بكرێت لە بەگەڕخستنەوەی رێككەوتنی ئەتۆمی 2015.
ئەنتۆنی بلینكن وەزیری دەرەوەی ئەمریكا لە چاوپێكەوتنێكدا رایگەیاند: ساڵی 2018 لە دوای كشانەوەی واشنتۆن لە رێككەوتنی ئەتۆمی ئێران پابەندبوونەكانی بەو رێككەوتنە هەڵپەسارد.
راشیگەیاندووە، تاران بە جۆرێك لەو ماوەیەدا بەرنامە ئەتۆمیەكەی بەرەوپێشبردووە، كە لە ئاستێكی بەرزدا بڕێكی زۆر یۆرانیۆمی پیتاندووە و ئەگەر بەو جۆرە بەردەوام بێت، دەكەوێتە سەر رێڕەوی بێگەڕانەوەی دروستكردنی بۆمبی ئەتۆم.
وەزیری دەرەوەی ئەمریكا بە پێویستیشی دەزانێت بە زوترین كات رێككەوتنی ئەتۆمی ساڵی 2015 كە چالاكیە ئەتۆمیەكانی ئێرانی سنوردار كردبوو، بەگەڕبخرێتەوە.
لەئێستادا بە مەبەستی بەگەڕخستنەوەی ئەو رێككەوتنە دانوستانێكی چڕ لە نێوان نوێنەرانی ئێران و هەر یەك لە وڵاتانی روسیا، چین، بەریتانیا، فەرەنسا و ئەڵمانیا لە ڤییەنا بەڕێوەدەچێت.
ئامانج لەو دانوستانانە هەڵگرتنی سزاكانی ئەمریكا لەسەر تاران و گەڕانەوەی ئێران بۆ پابەندبوونەكانی بە رێككەوتنی ئەتۆمی.}

15/6/2021