^{گەورە کاربەدەستێکی دەسەڵاتی دادوەریی لە ئێران ئاگاهیدەدات بە کاندیدەکانی سەرۆکایەتی ئێران تا هێڵە سوورەکانی کۆماری ئیسلامی ئێران نەبەزێنن.}

^{بڕیارە ڕۆژی 18ی مانگی 6 ئێرانییەکان بچنە سەر سندوقەکانی دەنگدان بۆ هەڵبژاردنی جێگرەوەیەک بۆ حەسەن ڕۆحانی سەرۆکی ئێران، کە بەپێی دەستوری ئێران بۆی نییە خۆی کاندید بکاتەوە بۆ گەڕی سێهەمی سەرۆکایەتی.}

^{عەلی ئەلقاسی میهر، دادپارێزی گشتی تاران بە ئاژانسی "میزان ئۆنلاین"ی سەر بە دەسەڵاتی دادوەریی ڕاگەیاندووە "نابێت کاندیدەکان لە هەڵمەتەکانی هەڵبژاردنیاندا و لە وتارەکانیاندا هێڵە سوورەکانی کۆماری ئیسلامی ببەزێنن و ئەگەر ئاوەها هەنگاوێک نرا ئەوا بەوپەڕی سووربوونەوە وەڵام دەدرێتەوە."}

^{عەلی ئەلقاسی ئاگاهیش دەدات بە کاندیدەکان لەوەی هیچ هێرشیک نەکرێتە سەر ناوبانگی دەسەڵاتی دادوەریی. ئەم ئاگاهیدانانەش لە کاتێکدایە کە ئیبراهیم ڕەئیسی، سەرۆکی دەسەڵاتی دادوەری و کاندید بۆ پۆستی سەرۆکایەتی ئێران لە هەموو کاندیدەکانی تر زیاتر بەخت یاوەرییەتی تا هەڵبژاردنی سەرۆکایەتی بباتەوە.}

^{ڕەئیسی لە بەرەی توندڕەوانی کۆنەپارێزی ئێرانە.}

^{لە کۆماری ئیسلامی ئێران ژمارەی هێڵە سورەکان زۆرن، لەوانە گومان خستنە سەر پرەنسیپی کۆماری ئیسلامی ئێران ، ئەوەی بە ویلایەتی فەقێ ناودێر دەکرێت. لە سیستەمی ویلایەتی فەقێدا دەسەڵاتی سەرپەرشتکردنی سیاسەت دەدرێت بە دەسەڵاتی ئاینی.}

^{لە ڕۆژی هەینییەوە هەڵمەتەکانی هەڵبژاردن دەستیان پێکردووە لەنێو ژینگەیەکی بێزاریدا بەهۆی قەیرانە مەترسیدارەکانی ئابوری و کۆمەڵایەتی ئێرانەوە.}

^{ڕەئیسی لە ساڵی 2017دا خۆی کاندید کردبوو بۆ پۆستی سەرۆکی ئێران و ڕکابەری حەسەن ڕۆحانی بوو، توانی لەسەدا 38ی دەنگەکان بەدەستبێنێت، بەڵام بۆ هەڵبژاردنی ئەمساڵ کە بەرەنگاری 4 کاندیدی کۆنەپارێز و 2 کاندیدی ڕیفۆرمخواز دەبێتەوە، کارەکەی ئاسانترە چونکە هەر 6 کاندیدەکەی تر پشتیوانییەکی ئەوتۆیان نییە لەناو خەڵکدا.}

^{سەرچاوەکان لە ناو ئێران لەوبڕوایەدان پەسەندکردنی کاندیدەکان بۆ هەڵبژاردنی ئەمساڵی سەرۆکایەتی لەلایەن شورای نیگەهبانەوە بە بەرنامە بووە تا سەرکەوتنی ئیبراهیم ڕەئیسی مسۆگەر و بێ گێرمەوکێشە بێت.}

^{ئایەتوڵا عەلی خامنەئی، ڕێبەری باڵای ئێران، ڕۆژی پێنجشەممە لە وتارێکدا سنوری کێشا بۆ وتاری کاندیدەکان و فرمانیدا بە هەر 7 کاندیدەکە لە وتارەکانیاندا جەخت بکەنەوە لە دۆسێ ئابورییەکان، لەوانە بێکاری لاوان و بژێوی خەڵک، ئەم دوو بابەتەش بوونەتە دوو بابەتی سەرەکی لە هەڵمەتەکانی هەڵبژاردنی ڕەئیسیدا.}

^{چەند مانگێکە دەسەڵاتدارانی ئێرانی داوای بەشدارییەکی زۆری خەڵک دەکەن لەو هەڵبژاردنەدا بەڵام پێشبینییەکان زیاتر بەو ئاڕاستەیەدان کە بایکۆتکردنی هەڵبژاردنەکان گەورەتر دەبن و ئاماژەش بە هەڵبژاردنەکەی مانگی 2ی ساڵی 2020ی مەجلیسی شورا دەکرێت کە نزیکەی لەسەدا 57ی دەنگدەران بایکۆتی ئەو هەڵبژاردنەیان کردبوو.}

^{لە لێدوانێکدا کە زۆربەی میدیاکانی ئێران بڵاویان کردبووەوە، سەرۆکی پۆلیسی ئێران، ئاگاهیداوە سەبارەت بە دەستگیرکردنی هەموو ئەوانەی ڕێوشوێنەکانی هەڵبژاردن پێشێل دەکەن یان هانی خەڵک دەدەن تا بەشداری لە هەڵبژاردندا نەکەن.}

6/2/2021