^{نه‌ته‌وه‌یه‌كگرتوه‌كان داوای راگرتنی شه‌ڕی نێوان ئیسرائیل و حه‌ماس ده‌كات و یه‌كێتی ئه‌وروپاش له‌سه‌ر ئه‌و پرسه‌ كۆبوونه‌وه‌یه‌كی به‌په‌له‌ ساز ده‌كات.
ئانتۆنیۆ گۆتێرێس سكرتێری گشتیی نه‌ته‌وه‌یه‌كگرتوه‌كان له‌ میانی كۆبوونه‌وه‌ی نائاسایی ئه‌نجومه‌نی ئاسایشی نێوده‌وڵه‌تی داوای كرد به‌ زوترین كات شه‌ڕ له‌ نێوان ئیسرائیل و حه‌ماس رابگیرێت.
وتیشی، ئه‌و توندوتیژیانه‌ تائێستا بوونه‌ هۆی كوژرانی نزیكه‌ی 200 كه‌س له‌ هه‌ردوولا و ئه‌گه‌ر ئه‌و شه‌ڕ رانه‌گیرێت، رۆژهه‌ڵاتی ناوه‌ڕاست ده‌كه‌وێته‌ قه‌یرانێكی كۆنتڕۆڵنه‌كراوه‌وه‌.
لای خۆشیه‌وه‌ جۆزێف بورێل به‌رپرسی سیاسه‌تی ده‌ره‌وه‌ی یه‌كێتی ئه‌روپا له‌ توێتێكدا باسی له‌وه‌كردووه‌، وه‌زیرانی ده‌ره‌وه‌ی یه‌كێتی ئه‌وروپا له‌ كۆبوونه‌وه‌یه‌كی به‌په‌له‌دا پرسی چۆنێتی راگرتنی توندوتیژیه‌كانی نێوان فه‌له‌ستین و ئیسرائیلیه‌كان تاوتوێ ده‌كه‌ن.}

^{سەرچاوە:رادیۆ نەوا}

^{١٨/٥/٢٠٢١}