^{هەڵاوسان و بەرزبوونەوەی نرخەکان لە ئێران بە شێوەیەکی سەرسووڕهێنەر و بەردەوام لە زیادبووندایە
بەرزبوونەوەی نرخی پێداویستییە سەرەکییەکانی ژیان لە ئێران بەشێوەیەکە ڕۆژ لەگەڵ ڕۆژ، نرخی پێداویستییەکان زیاتر دەبێ، بەڵام ئەو بابەتە لە شارەکانی کوردستان جیاوازییەکی دیکەی هەیە.
لە شارەکانی کوردستان و جیاواز لە هەموو شارەکانی دیکەی ئێران هەڵاوسان و بەرزبوونەوەی زیاتری نرخەکان دەبیندرێ و دوایین زانیارییەکانی ناوەندی ئاماری ئێران دەری دەخا کە هەڵاوسانی پلە بە پلە، یان هەمان نقطە بە نقطە ، لە کوردستان لە مانگی ڕێبەندانی ئەمساڵدا بە ٥٨.٣ لەسەد زیاترین هەڵاوسانی لە سەرانسەری ئێراندا تۆمار کردووە.
هەروەها ناوەندی ئاماری ئێران بڵاوی کردووەتەوە کە خەڵکی شارەکانی کوردستان، پێداویستییەکانیان لە سەتا ١٠ گرانتر لە شارەکانی دیکەی ئێران دەکڕن، ئەوە لە حاڵێکدایە کە دۆخی کار و داهاتی خەڵکی شارەکانی کوردستان لە دۆخێکی دژوار دایە.}