^{ئیدارەی نوێی ئەمریكا یەكەم هێرش دەكاتە سەر ڕەجەب تەیب ئەردۆگان سەرۆكی توركیاو بە سەرچاوەی نیگەرانی وڵاتەكەی و یەكێتی ئەوروپا ناوی دەبات، داواشی لێدەكات پابەندبێت بە بڕیارەكانی دادگای یەكێتی ئەوروپا بۆ ئازادكردنی سەڵاحەدین دەمیرتاش.
جیك سلۆڤان ڕاوێژكاری ئاسایشی نیشتمانی ئەمریكا ڕایگەیاند: سەرۆكی توركیا سەرچاوەی نیگەرانییە بۆ ئەمریكا و وڵاتانی یەكێتی ئەوروپا و پێویستە ڕێز لە بڕیارەكانی دادگای یەكێتی ئەوروپا بۆ مافەكانی مرۆڤ بگرێت، لەبارەی ڕەخساندنی ئازادی مافەكانی مرۆڤ و سەڵاحەدین دەمیرتاش هاوسەرۆكی پێشووتری هەدەپە ئازاد بكات.
ڕاوێژكاری ئاسایشی نیشتمانی ئەمریكا ڕونیشیكردۆتەوە: وەزارەتی دەرەوەی وڵاتەكەی بەووردی چاودێری دۆخی مافەكانی مرۆڤ و ئازادییە سیاسییەكان لە توركیا دەكات، نیگەرانیشن لەبەرامبەر زیندانی كردنی هەزاران چالاكوانی رێكخراوە مەدەنیەكان و هێزەكانی ئۆپۆزسیۆن پێش پرۆسەی دادگاییكردنیان.}

29/1/2021