(2).jpeg)
داواکاری گشتیی کرماشان لە رۆژهەڵاتی کوردستان فەرمانێکی بۆ دەستبەسەرکردنی خاوەن فرۆشگەیەکی جلوبەرگی ژنانە و چەند ژن بە تاوانی بەکارهێنانی ژنان لە بری بووکەڵە بۆ رێکلامی جلوبەرگ دەرکرد.
شارام کەرەمی، داواکاری گشتیی پارێزگای کرماشان گوتی: "خاوەنی ئەو فرۆشگەیە کە لە یەکێک لە مۆڵە گەورەکانی کرماشاندا بووە، لە پێشانگەی دووکانەکەیدا لەبری بووکەڵەی تایبەت بە رێکلامی جلوبەرگ، ئافرەتی بەکار هێناوە."
هەروەها داواکاری گشتیی کرماشان ئاماژەی بەوە دا، ئەو فرۆشگەیە بۆ رێکلامی جلوبەرگی ژنانە لە تۆڕەکۆمەڵایەتییەکاندا کەڵکی لە ژنانی بێحیجاب وەرگرتووە.
ئێستا بە فەرمانی داواکاری گشتیی پارێزگای کرماشان فرۆشگەکە داخراوە و رێگە بە کرانەوەی نادرێت.
پێشتریش لە چەند شاری دیکەی ئێران لەبری بووکەڵەی رێکلامی جلوبەرگ کەڵک لە ژنان وەرگیراوە و بووەتە هۆی سزادانی توندی ئەو کەسانەی کە ئەو جۆرە رێکلامەیان کردووە.
بەرپرسانی حکوومەتی ئێران بە توندی بەرهەڵستیی ئەو بابەتە دەکەن و بە کردەوەیەکی ئیسرائیلی ناوی دەبەن.
٦/١٢/٢٠٢٠
