^{لوتکەی وڵاتانی G20 ئەمڕۆ یەکشەممە بەردەوام بو لەکۆبونەوەکانی بۆ تاوتوێکردنی دۆخی دارایی جیهان دوای بڵاوبونەوەی ڤایرۆسی کۆرۆنا، دوای گفتوگۆکردنی نێوان ئەندامانیش کە بەسەرۆکایەتی سعودیە و بەشێوەی ئونلاین بەڕێوەچو بڕیاردرا 21 ملیار دۆلار بۆ ڤاکسینی کۆرۆنا و دەرمانی پێویست و 11 ترلیۆن دۆلاریش بۆ پشتیوانیکردنی ئابوری جیهان تەرخانبکرێت.}

^{محەمەد بن سەلمان، شازادەی جێنشینی سعودیە لە وتارێکدا کە بەشێوەی ئونلاین پێشکەشی کۆبونەوەی لوتکەی وڵاتانی G20ـی کرد رایگەیاند، لەکۆبونەوەی ئەمڕۆیاندا بۆ پشتیوانیکردن لە ئابوری وڵات و گەلەکانیان بڕیاردراوە 21 ملیار دۆلار بۆ پشتیوانیکردنی هەوڵەکانی دۆزینەوەی ڤاکسینی کۆرۆنا و دەستەبەرکردنی دەرمانی پێویست تەرخانبکرێت.}

^{ئاماژەی بەوەشکرد، هەروەها بڕیاردراوە 11 ترلیۆن دۆلاریش بۆ پشتیوانیکردن لە کۆمپانیاکان و هاوکاریکردنی ئەو کەسانەی داهاتیان سنوردارە تەرخانبکرێت.}

^{کۆبونەوەکانی G20 وەزیرانی دارایی و سەرۆکی بانکەکانی 19 وڵات و ئەنجومەنی یەکێتی ئەوروپا بەیەک دەگەیەنێت. ئەندامانی G20 بریتین لە ئەرجەنتین، ئوستراڵیا، برازیل، کەنەدا، چین، فرەنسا، ئەڵمانیا، هیندستان، ئەندۆنزیا، ئیتاڵیا، ژاپۆن، کوریای باشور، مەکسیک، روسیا، سعودیە، ئەفریقای باشور، تورکیا، بریتانیا، ئەمریکا و یەکێتی ئەوروپا.}

^{G20 ، بوەتە مەکۆی سەرەکی هاوکاری نێودەوڵەتی لەسەر پرسە گرینگەکانی ئابوری و دارایی جیهان، لەئێستادا G20 بە ئاستێک گەورە بوە کە 90%ی هەمو داهاتی جیهان و 80% ی بازرگانی جیهان دەگەرێتەوە بۆ وڵاتانی ناو ئەو گروپە.}

23/11/2020