^{کەماڵ حوسێن‌پوور نوێنەری خەڵکی سەردەشت لە مەجلیسی شووڕای ئیسلای ڕێژیم، دەڵێ: “ڕێژەی کۆچکردن لە پێنج مانگی ڕابردوودا ڕوو لە هەڵکشانە و تا ئێستا زیاتر لە هەزار کەس لە هاووڵاتیانی سەردەشت وڵاتیان جێ هێشتوە و ڕوویان لە هەندەران کردووە”.
ناوبراو بە ئاماژە بە دۆخی نالەباری بژیوی ژیانی خەڵک و نەبوونی هەلی کار لە ئێران بە گشتی و لە کوردستان بە تایبەتی، دۆخەکە بە جۆرێکە کە خەڵک وەکوو ڕەسووڵ ئێران‌نژاد کە گیانی خۆی و ئەندامانی بنەماڵەکەی لە دەست‌دا هەرشتێکیان هەیە دەیفرۆشن و ڕوو لە وڵاتانی ئورووپایی دەکەن.
حوسێن‌پوور دەڵی: “سەردەشت نە ناوچەی پیشەسازی و نە وەرزێری هەیە و هیچ کارێکی دیکەی تێدا‌نییە، لە حاڵێکدا سەردەشت یەکەمین شاری شیمیایی لێدراوی جیهان بووە و لە ئێستادا ٤هەزار کەس کەمئەندام لەم شارەدا ژیانێکی سەخت بەسەر دەبەن، ئەمانە هەمووی هۆکارن بۆ ئەوەی خەڵک بە کۆمەڵ گیان و ماڵی خۆیان بخەنە مەترسییەوە تا لەم وڵاتە کۆچ بکەن”.
ماڵپەڕی “ڕوویداد٢٤”، بە ڕەخنە گرتن لە قسەکانی کەماڵ حوسێن‌پوور نوێنەری پیرانشارو سەردەشت، نووسیویەتی: “کۆچکردن تەنیا پەیوەندی بە سەردەشت و کوردستانەوە نیە و لە ناوچە و شارەکانی دیکەش بە هەمان شێوە کۆچی بە کۆمەڵ هەیە و لاوانی وڵات بە ناچاری بەرەو هەندەران کۆچ دەکەن، زۆربەی ئەم کۆچ کردنە بۆ دابین کردنی ژیانێکی ئاسوودە و داهاتوویەکی گەشە و بەشێکی دیکەی ئەو کەسانە بە هۆکاری دۆسییەی ئەمنییەتی ناچار دەبن وڵات بەجێ بێڵن”.
شایانی باسە کە ڕێژیمی کۆماری ئیسلامیی ئێران لەبەر گەندەڵی و کردەوە ئاژاوەگێڕییەکانی دۆخێکی وایان هێناوەتە ئاراوە کە خەڵکی ئەو وڵاتە بە هیچ شێوەیەک دڵیان بە ژیان کردن لەم وڵاتەدا خۆش نییە، هاووڵاتییان دەڵێن ماڵ و خانوومان دەفرۆشین بەس بۆ ئەوەی لەم وڵاتە ژیان نەکەین و هەروەها دەشڵێن بەرپرسانی باڵای ئەم ڕێژیمە هەموو ماف و ئازادییەکانی ئێمەیان زەوت کردووە و ئێمەش ناچارین کۆچ بکەین.
گەنجانی ئەم وڵاتە دەڵێن، حازرین ئەو ڕێگا پڕ لە مەترسییە ببڕێن بۆ ئەوەی لە ئێرانی ژێر دەسەڵاتی ئەو ڕێژیمەدا نەژین و حازریشین لە گۆڕستانەکانی ئورووپادا بژین و نەگەڕێینەوە بۆ ئێران.}

٤/١١/٢٠٢٠