لە ئەنجوومەنی شاری ورمێ دەنگدان بۆ هەڵبژاردنی دەستەی سەرۆکایەتیی ساڵی کۆتایی خولی پێنجەمی ئەنجوومەنەکە بەڕێوەچوو. ئازەرییەکان رێگەنادەن ئەندامانی کوردی ئەنجوومەنی شاری ورمێ ببنە ئەندامی دەستەی سەرۆکایەتیی ئەنجوومەنەکە.
شەش کەس وەک سەرۆک و جێگری سەرۆک، سکرتێری یەکەم و دووەم، گوتەبێژ و بەرپرسی دارایی ئەنجوومەنی شاری ورمێ هەڵبژێردران کە هەموویان لە ئەندامانی ئازەری ئەنجوومەنەکەن.
ئەنجوومەنی شاری ورمێ 11 ئەندامی هەیە، حەوتیان ئازەری و چواریان کوردن. دەستەی سەرۆکایەتیی ئەنجوومەنەکان ساڵانە هەڵدەبژێردرێن و لە ساڵانی رابردوودا یەک یان دوو ئەندامی کورد دەبوونە ئەندامی دەستەی سەرۆکایەتیی ئەنجوومەنەکە.
سەرچاوەیەکی ئاگادار لە ناکۆکییەکانی ئەنجوومەنی شاری ورمێ بە تۆڕی میدیایی رووداوی راگەیاند، لە سەرەتای دەستبەکاربوونی ئەم خوولەی ئەنجوومەن لە ساڵی 2017، سێ ئەندامی ئازەری ئەنجوومەنەکە لایەنگر و سێشیان دژبەری بنەماڵەی حەزرەتپوور بوون، کە بنەماڵەیەکی ئازەریی دەستڕۆیشتووی شارەکەن و کەسێکیان پەرلەمانتار و یەکێکیشیان سەرۆکی شارەوانییە و لەلایەن هێزە ئەمنی و سەربازییەکانیشەوە پشتگیریی لێدەکرێت.
لە هەڵبژاردنی سەرۆکی شارەوانیدا، ئەندامانی کوردی ئەنجوومەنی شاری ورمێ لەگەڵ ئەو بنەماڵەیە رێککەوتبوون کە دەنگ بە محەممەد حەزرەتپوور بدەن ببێتە سەرۆکی شارەوانیی ورمێ؛ لە بەرامبەردا سەرۆکایەتیی شارەوانی ناوچەی پێنجی ورمێ و جێگرێکی سەرۆکی شارەوانی بدەنە کورد و بۆ دەستەی سەرۆکایەتی ئەنجوومەنی شاریش دەنگ بە ئەندامانی کورد بدەن.
لە ساڵی یەکەم و دووەمدا، ئەو رێککەوتنە لە ئەنجوومەنی شار جێبەجێکرا، بەڵام دوای ئەوەی کە ساڵی رابردوو لەسەر قسەکردن بە زمانی ئازەری لە کۆبوونەوەی ئەنجوومەن ناکۆکی کەوتە نێوان نوێنەرانی کورد و ئازەری، ئەندامانی ئازەری ئەنجوومەنەکە یەکیان گرت و دەنگ بە نوێنەرانی کورد نادەن ببنە ئەندامی دەستەی سەرۆکایەتی ئەنجوومەنی شاری ورمێ.
ئەمساڵیش ئازەرییەکان یەکیان گرت و پۆستەکانیان لەنێو خۆیاندا دابەشکرد. لە ئەندامانی کورد، کەسێک خۆی بەربژێر کرد کە دەنگی پێنەدرا.
14/9/2020
