وڵاتانی رووسیە و تورکیە و کۆماری ئیسلامیی ئێران دوای کۆبوونەوەیەکی سێ قۆڵی دژی رێککەوتنی نەوتیی ڕۆژئاوای کوردستان و ئەمریکا هاتنە دەنگ.
رۆژی دووشەممە ٣ی خەرمانانی ٩٩ی هەتاوی وەکو ئامادەسازییەک بۆ کۆبوونەوەی ئاستانەی تایبەت بە سووریا لە ژنێڤ، رووسیە، تورکیە و ئێران کۆبوونەوە، کۆبوونەوەکە بە راوێژی شاندی سووریە و گیێر پیدرسۆن، نێردراوی تایبەتی سکرتێری گشتیی نەتەوە یەکگرتووەکان بۆ سووریە سازکرا و شەوی رابردوو راگەیەندراوێکی ١٠ خاڵییان لەبارەی ناوەڕۆکی کۆبوونەوەکەیان بڵاوکردەوە.
یەکێک لە خاڵەکانی راگەیەندراوە هاوبەشەکەی هەرسێ وڵات باسی ئەو رێککەوتنە دەکات، کە لەنێوان هەسەدە و کۆمپانیای “دێڵتا كریسێنت ئێنێرجی “ئەمەریکایی واژۆکراوە سەبارەت بە نەوتی رۆژئاوای کوردستان .
هەرسێ وڵات رێکەوتنەکە رەتدەکەنەوە و دەڵێن “رووسیە، تورکیە و ئێران دژی دەستبەسەرداگرتن و گواستنەوەی نایاسایی داهاتی نەوتی سووریان و دەبێت ئەو داهاتە بۆ کۆماری عەرەبیی سووریە بێت، جەختیش دەکەنەوە لەوەی “هەر لەم چوارچێوەیەدا ئیدانەی رێککەوتنە نەوتییەکەی نێوان کۆمپانیایەکی خاوەن مۆڵەتی ئەمەریکایی و کیانێکی نایاسایی وەکو بەشێک لە ئەجێندای جیاخوازی دەکەین”.
رێكکه‌وتنه‌كه لەنێوان كۆمپانیای” دێڵتا كریسێنت ئێنێرجی”یە كه باره‌گاكه‌ی له ویلایه‌تی نیوجێرسی-یه له‌گه‌ڵ هەسەدە، بووەته جێگه‌ی مشتومڕی ته‌واوی هێزه‌كانی ناوچه‌كه. به‌پێی لیدوانی به‌رپرسانی ئێستا و پێشووی ئه‌مەریكاش: ئه‌م رێكخستنه رژێمه‌كه‌ی به‌شار ئه‌سه‌د، سەرۆکی سووریا بێبه‌ش ده‌كات له قازانج و پاره‌كه و به‌شه گه‌وره‌كه‌ی بۆ كورد ده‌بێت، واشدەکات هێزه‌كانی ئه‌مه‌ریكا له‌سه‌ر زه‌وی ناوچه‌كه بۆ ماوەیەکی زۆر بمێننه‌وه، كه تائێستا گۆڕه‌پانێكی پڕ لە ئاڵۆزی و كێشه‌یه بۆ هێزه‌كانی ئه‌مه‌ریكا و تورکیە و ڕووسیە و کۆماری ئیسلامیی ئێرانیش لەو ڕیککەوتنە تووڕەن.
27/8/2020
