^{سەرۆکی ئێران حەسەن ڕۆحانی بە بەڕێوبەری گشتی دەزگای وزەی ئەتۆمی نێودەوڵەتی ڕافائیل گرۆسی ڕاگەیاند وڵاتەکەی بەردەوام دەبێت لە هاریکارییەکان لەگەڵ دەزگاکەدا.}

^{ئەم لێدوانەی ڕۆحانی لە کاتێکدایە تاران ڕازی بوو بەوەی ڕێگە بە پشکنەرانی دەزگای وزەی ئەتۆمی نێودەوڵەتی بدات تاوەکو بێنە ناو دوو کارخانەی ناوەکیی ئێرانەوە کە دەزگاکە پێی وایە پێشتر چالاک بووە و چالاکی ناوەکیی نهێنی تیادا ئەنجام دراوە.}

^{ڕۆحانی وتی " وەکو پێشتریش، ئێران ئامادەیە هاریکاری لەگەڵ دەزگای وزەی ئەتۆمی نێودەوڵەتیدا بکات."}

^{ئەم هەنگاوەی ئێرانیش ئەو فشارە نێودەوڵەتیەی سەری کەم دەکاتەوە لەکاتێکدا ئەمەریکا دەیەوێت سزاکانی نەتەوە یەکگرتووەکان دووبارە بسەپێنێتەوە بەسەر تاراندا.}

^{بەڕێوبەری گشتی دەزگای وزەی ئەتۆمی نێودەوڵەتی ڕافائیل گرۆسی و سەرۆکی ڕێکخراوی وزەی ئەتۆمی ئێران عەلی ئەکبەر ساڵحی لە بەیاننامەیەکی هاوبەشدا وتیان " ئێران ڕێگە دەدات پشکنەرانی دەزگای وزەی ئەتۆمی نێودەوڵەتی بچنە ناو ئەو دوو شوێنەوە کە دەزگاکە دیاریکردوون."}

^{سەرچاوە/ ڕۆیتەرز}

27/8/2020