(2).jpeg)
کۆمپانیایەکی کوردی لە باکووری کوردستان هەڵساوە بە ئامادەکردنی پرۆژەیەکی گەورە بە ناوی بێژان (Bêjan) بۆ هاندانی منداڵانی کورد کە خۆیان فێری زمانی کوردی بکەن و زیاتر بە کولتووری کوردەواری ئاشنابن. پرۆژەکە پێکدێت لە فیلم کارتۆن و پەرتووکی فێرکاری و یاری منداڵان. هەروەها بۆ یەکەم جار یاری ئەلیکترۆنی بە زمانی کوردی ئامادە دەکرێت. پرۆژەکە بە شێوەیەک ئامادەکراوە کە یارمەتیی خەڵکی بیانیش بدات خۆیان فێری کوردی بکەن.
ئەم پرۆژەیە لەلایەن کۆمپانیای ئەرکام سۆفت (Erkam Soft)ــەوە ئامادە دەکرێت کە خاوەنەکەی کوردە و ناوی بەهمەن دۆغووە، زۆربەی کارمەندەکانیشی کوردن. ئۆفیسی سەرەکیی کۆمپانیاکە لە شاری باتمانە، بەڵام زۆربەی کارەکانی لە ئامەد بەڕێوەدەبات. کۆمپانیاکە ساڵی رابردوو دامەزراوە، بەڵام ئەمساڵ لەلایەن حکومەتی تورکیاوە مۆڵەتی کارکردنی پێ درا.
بڕیار وایە لە 23ـی مانگی داهاتوو پرۆژەکە لە ئامەد رابگەیێندرێت و دواتریش لە هەریەک لە شارەکانی ئیستەنبووڵ و هەولێری پایتەختی هەرێمی کوردستان پرۆژەکە بە خەڵک بناسێندرێت. ئێستا بابەتەکان بە زاراوەی کورمانجین و وەرگێڕانی تورکی و ئینگلیزیان بۆ کراوە، بەڵام لە بەرنامەیاندایە بابەتەکان بە زاراوەی سۆرانیش بڵاوبکەنەوە.
بەڕێوەبەری کۆمپانیای ئەرکام سۆفت بە تۆڕی میدیایی رووداوی راگەیاند، یەکەم هەنگاوی پرۆژەکە بریتییە لە ئامادەکردنی فیلم کارتۆنی بێژان کە لە چەند کارەکتەرێک پێکدێت و کچێکی هەشت ساڵان بە ناوی بێژان کارەکتەری سەرەکی فیلم کارتۆنەکە و گشت پرۆژەکەیە. بێژان خەڵکی شاری باتمانی باکوری کوردستانە. کارەکتەرێکی تریش بریتییە لە شەهماران کە دەفڕێت و گەشت بە بێژان و هاوڕێکانی دەکات بەنێو سەدە جیاوازەکانی رابردوودا. هەموو کارەکتەرەکان و شوێنەکان گوزارشت لە کولتووری کوردی و ناوچەکانی کوردستانی گەورە دەکەن.
بەهمەن دۆغو ئەوەشی گوت، "لەناو فیلم کارتۆنەکەدا گوێت لە گۆرانیی فۆلکلۆری کوردی دەبێت و چیرۆکەکانیش کوردین. هەروەها ئاشنای چەندین شوێنەواری کوردستان دەبیت".
31/7/2020
