ژمارەیەک ئازەری تووندڕەو جارێکی دیکە تابلۆی چیای بۆزی سینایان لە پارێزگای ورمێ هەڵکەند، کە لەلایەن شاخەوانانی کوردستانەوە دانرابوو.
چەند ساڵێکە ژمارەیەک ئازەری تووندڕەو لە هەوڵدان ناوی چیای بۆزی سینا لە ناوچەی مەرگەوەڕی ورمێ بگۆڕن. بۆ رێگرتن لەو هەوڵە، شاخەوانانی کورد لە ورمێ و شارەکانی دەورووبەری، تابلۆیەکیان لەسەر لووتکەی چیاکە دانابوو، کە ناو و بەرزیی چیاکەی لەسەر نووسرابوو. لە رۆژانی رابردوودا، ژمارەیەک ئازەری تووندڕەو تابلۆکەیان لێکردووەتەوە و فڕێیان داوە.
ئەوانەی تابلۆکەیان هەڵکەندووە لەشوێنی خۆی، گرتەیەکی ڤیدیۆییشان بڵاوکردووەتەوە و ناوی چیاکەیان گۆڕیوە و دەڵێن دەبێ ناوەکەی بکرێتە "بۆزڵو سینا" و رێگەنادەن تابلۆکە بەناوی "بۆزی سینا" لەسەر ئەو چیایە بێت.
شاخەوانانی کورد، هەینی یەکەمی هاوینیان کردووەتە رۆژی بۆزی سینا و لەو رۆژەدا، شاخەوانانی ناوچە جیاوازەکان دەچنە مەرگەوەڕ و بەسەر چیای بۆزی سینادا سەردەکەون.
چیای بۆزی سینا، لەنێوان شارەکانی شنۆ و ورمێ و لە نزیک سنوورەکانی باشوور و رۆژهەڵاتی کوردستان هەڵکەوتووە. هەڵکەوتەی جوگرافی و بەرزیی چیاکە وایکردووە بەردەوام بەفری زستان تاوەکو کۆتایی هاوینیش لەسەر چیاکە بمێنێتەوە. ناوی "بۆزی سینا"ش، هەر شێوەی تاشە بەرد و سەهۆڵینەکانییەوە هاتووە.
بەرزیی بۆزی سینا 3480 مەترە لەئاستی رووی دەریا، جگە لە سرووشتە گەشتیارییەکەی، گیانلەبەری وەک ورچی قاوەیی، گورگ، رێوی و چەقەڵ و بزنە کێوی لێ دەژی.
16/7/2020
