کۆرۆنا، رێکارە تەندروستییەکان و سنووردارکردنی هاتووچۆی بۆ هەموو پارێزگاکانی رۆژهەڵاتی کوردستان گەڕاندەوە. هەفتەی رابردوو لەلایەن ناوەندی رووبەڕووبوونەوەی کۆرۆنای ئێرانەوە، بڕیاری ئەوە درا کە سنووردارییەکان لەلایەن پارێزگارەکانەوە بۆ ئەو شارانەی کە دۆخی سوور و مەترسیداریان هەیە، دەستپێبکرێنەوە.
لە پارێزگاکانی رۆژهەڵاتی کوردستان 42 شار دۆخی مەترسیداریان هەیە، بەشێوەیەک لە پارێزگای کرماشان 12 شار، پارێزگای ورمێ 12 شار، پارێزگای لوڕستان 10 شار، پارێزگای سنە 9 شار و پارێزگای ئیلام 6 شار لە دۆخی سوور و مەترسیداردان؛ سنووردارییەکان لەو شارانەی کە بە دۆخی سوور دەستنیشانکراون، دەستپێدەکەنەوە.
بە گوتەی پارێزگارەکان، رێکارەکانی سنووردارکردنەوەی هاتووچۆ بریتی دەبن لە قەدەخەی کۆبوونەوە و بەڕێوەبردنی پرسە و ئاهەنگ لەو شارانەی کە دۆخی مەترسیداریان هەیە. زانکۆکان و خوێندنگەکان، خوێندنگە ئایینییەکان، ناوەندە فێرکارییەکان و مزگەوتەکان بۆ ماوەی یەک هەفتە دادەخرێن.
هەروەها هاتووچۆی هاونیشتمانییان بۆ مەلەوانگەکان، سینەماکان و هۆڵەکانی شانۆ، مۆزەخانەکان و باخە گشتییەکان، تەلارەکان، هۆڵەکانی جوانکاری لەو هەفتەدا قەدەخە دەبێت. هاتووچۆی ناو شار و سەردانی فرۆشگەکان تەنیا بە مەرجی بەکارهێنانی ماسک رێگەی پێدەدرێت.
لەماوەی یەک مانگی رابردوودا دۆخی تەندروستیی پارێزگاکانی رۆژهەڵاتی کوردستان بەراورد بە پارێزگاکانی دیکەی ئێران خراپتر بووە.
ئاماری تووشبوون و گیانلەدەستدان لە بەشێکی زۆری شارەکانی هەر پێنج پارێزگاکە، رۆژبەڕۆژ روو لە هەڵکشان بووە. لە راگەیاندنەکانی رۆژانەی وەزارەتی تەندروستیی ئێرانیشدا، 3 بۆ 4 پارێزگای رۆژهەڵاتی کوردستان لەناو ئەو پارێزگایانەدا بوون کە بە دۆخی سوور ناویان هاتووە.
ئێستاش کە کۆرۆنا لە ئێران و رۆژهەڵاتی کوردستان گەیشتووەتە لووتکە، حکومەتیش بڕیارەکانی بۆ سنووردارکردنەوەی هاتووچۆ تووندتر کردووە.
حەسەن رووحانی لە کۆبوونەوەی ناوەندی رووبەڕووبوونەوەی کۆرۆنادا داوای هاوکاریی دەزگای داد و هێزە ئەمنی و سەربازییەکان دەکات بۆ جێبەجێکردنی بڕیاری سنووردارییەکان و بڕیارە لە رۆژی یەکشەممەوە سەپاندنەوەی بەکارهێنانی ماسکیش جێبەجێ بکرێتەوە.
بەرپرسانی حکومەت نیگەرانی ئەو کەسانەن کە تووشبوونی خۆیان لە خەڵک دەشارنەوە و بیر لە پلانێک دەکەنەوە کە تێیدا ئەو کەسانە سزابدرێن؛ ئەمانەش هەمووی باس لە دۆخی مەترسیداری ئێران و رۆژهەڵاتی کوردستان دەکات لە رۆژانێکدا کە کۆرۆنا هێشتا بە گوتەی بەرپرسانی ئێران شەپۆلی یەکەمی خۆی بەتەواوی تێنەپەڕاندووە.
5/7/2020
