^{ڕۆژی سێشەممە ٢٧ی جۆزەردان، "سوهەیلا حیجاب"، زیندانیی سیاسیی خەڵکی شاری کرماشان، لە بەندی دابڕگەی زیندانی قەرچەکی وەرامین، لەهەمبەر دۆخی نالەباری خۆی و گوشار بۆ سەر بنەماڵەکەی، بە نیشانەی ناڕەزایەتی دەربڕین، مانی لە خواردن گرت.}

^{ئەو زیندانییە سیاسییە کوردە، هەروەها بە نیشانەی ناڕەزایەتی و پشتیوانی لە ناڕوونیی چارەنووس و ڕاگرتنی "زەینەب جەلالیان"، زیندانیی سیاسیی دیکەی کورد، لە زیندانی قەرچەکی وەرامین دەستی داوەتە مانگرتن.}

^{"سوهەیلا حیجاب"، ڕۆژی چوارشەممە ٢٨ی ڕەشەمەی ساڵی ٩٨، لەلایەن لقی ٢٨ی دادگای ئینقلابی تاران بە سەرۆکایەتیی دادوەر "محەممەد موقیسە" بە تۆمەتگەلی وەک "پڕوپاگەندە دژی نیزام، کۆبوونەوە و تەبانی، تێکدانی بیروڕای گشتی بە مەبەستی ئاژاوەنانەوە، دروستکردنی گرووپی نایاسایی لە ڕاستای مافی ژنان و داخوازیی ڕیفراندۆم و گۆڕینی یاسای بنەڕەتی"، سەرجەم بە ١٨ ساڵ زیندان مەحکووم کرابوو.}

^{پێشتریش "سوهەیلا حیجاب" بە بڵاوکردنەوەی "دڵنووسێک" (دلنوشتە) نووسیبووی : "ئەوەی بەسەر من و کوردەکانی دیکە لە ئێراندا دێت، ڕۆژێک بۆ خەڵک و لێڕەوار و زەریاکان دەیڵێمەوە، هەتا لە بەردە بچووکەکان پەیکەرێک دروست بکرێت و سەربازەکانیش لەنێو کتێبە مێژووییەکان بێنەوە ماڵەکانی خۆیان. لە بەرانبەر زوڵم و زۆر ئەگەر ئاگر لە جەستەم ببارێت، هەرگیز چۆک دانادەم، تەنانەت ئەگەر ئاسمان بچووکەتر لە بەژن و باڵای من بێت".}

^{پێشتریش، ڕۆژی سێشەممە ٣٠ی بانەمەڕ، لە بانگهێشتنامەیەکدا داوا لەو چالاکە مەدەنییە کرابوو کە ڕۆژی شەممە ٣ی جۆزەردان خۆی بە دادگای پێداچوونەوەی تاران بناسێنێت و پاش خۆناساندنی ئەو پارێزەرە کوردە، لەلایەن مەئموورانی هێزە ئیتلاعاتی سپای پاسدارانەوە دەسبەسەر کرابوو.}

18/6/2020