وەزیری تەندروستیی تورکیا رایگەیاند، هاووڵاتییەکیان کە بە گومانی تووشبوون بە ڤایرۆسی کۆرۆنا گوێزرابووەوە نەخۆشخانە، ئەنجامی پشکنینەکەی پۆزەتیڤ بووە و دەرکەوتووە هەڵگری ڤایرۆسەکەیە.
فەخرەدین کۆجا، وەزیری تەندروستیی تورکیا لە کۆنگرەیەکی رۆژنامەڤانیدا هەواڵەکەی راگەیاند و ئاماژەی بەوە کرد، نەخۆشەکە کوڕێکە، تەندروستی جێگیرە و راستەوخۆ کەرەنتینە کراوە.
وەزیری تەندروستیی تورکیا دەشڵێت، ئەندامانی خێزانەکەی ئەو تووشبووە کەرەنتین کراون و خراونەتە ژێر چاودێرییەوە.
وەزارەتی تەندروستیی تورکیا ئاماژەی بەوە نەکردووە تووشبووەکە لە چی شارێکە، بەڵام دەڵێت بەم دواییانە سەردانی ئەوروپای کردووە.
وەزارەتی تەندروستیی تورکیا داوا لە هاووڵاتیانیان دەکات کە گەشتکردن بۆ دەرەوەی تورکیا رابگرن و لە کاتی زۆر پێویستدا نەبێت گەشت نەکەن.
11/3/2020
