سندووقی نێونەتەوەیی پارە و بانکی جیهانی، ١٢ میلیارد دۆلار بۆ پێشگرتن و چارەسەری ڤایرۆسی کۆرۆنا تەرخان دەکەن.
ڕۆژی چوارشەممە ١٤ـی ڕەشەمە، بەرپرسانی سندووقی نێونەتەوەیی پارە و بانکی جیهانیی پارە لە وتووێژێکی ڕۆژنامەوانیدا ڕایانگەیاند کە بڕی ١٢ میلیارد دۆلار پارە بۆ چارەسەری و پێشگرتن بە ڤایرۆسی کۆرۆنا و لێکەوتەکانی ئەو ڤایرۆسە تەرخان دەکەن بۆ ئەو وڵاتانەی کە ڤایرۆسەکە تێیاندا بڵاو بووەتەوە. ئەو دوو ناوەندە کە لە باری ئابوورییەوە لە بەهێزترین ناوەندەکانی جیهانن لە درێژەدا ئەوەشیان ڕاگەیاند کە سەرجەم بڕی ٦٢ میلیارد دۆلار یارمەتی بە وڵاتانی تووشبووی کۆرۆنا دەکەن.
“دێیڤید مالپاس″، بەرپرسی بانکی جیهانیی پارە لەو بارەوە ڕایگەیاند کە:” لە هەنگاوی یەکەمدا ١٢ میلیارد دۆلار ئامادە کراوە کە بە وڵاتەکاندا بڵاو بکرێتەوە”. ناوبراو لە درێژەدا ڕایگەیاند:” ڤایرۆسی کۆرۆنا مەترسییەکی جیددیی لە جیهان دروست کردووە و جارێ زۆری ماوە تا ئەو ڤایرۆسە بە تەواوەتی بناسرێت. هەر بۆیە دەبێ بە باشترین شێوە ، لە هەموو بوارێکەوە یارمەتی بە چارەسەری ئەو نەخۆشییە بکرێ”.
چەندین وڵاتی جیهان ڤایرۆسی کۆرۆنایان تێدا بڵاو بووەتەوە و ژمارەیەکی زۆر و بە هەزاران کەس تووشی کۆرۆنا بوون کە وڵاتی ئێران، یەکێک لەو وڵاتانەیە کە ڕێژەیەکی بەرچاوی خەڵکەکەی تووشی کۆرۆنا بوونە و ڕێژیمی کۆماری ئیسلامیش لە هەمبەر چارەسەر و پێشگرتن بەو ڤایرۆسەدا کەمتەرخەم بووە و لە جیهاندا بە بڵاوکەرەوەی ڤایرۆسی کۆرۆنا ناسراوە.
6/3/2020
