رێوشوێنەکان بۆ تەواوکردنى نەخۆشخانەیەکى تایبەت بە پشکنین و چارەسەر بۆ هەڵگرانی ڤایرۆسی کۆرۆنا لە سلێمانى تەواوبوون؛ بەڕێوەبەرى گشتیى تەندروستیی سلێمانی بڕیاریدا لەمڕۆوە ئەوانەی دەیانەوێ پشکنین بکەن یان گومانیان لەسەرە، لەو نەخۆشخانەیە ببینرێن.
هێرش حەیدەر، بەڕێوەبەرى نەخۆشخانەى رووبەڕووبوونەوەى کۆرۆنا لەبارەی نەخۆشخانەکەوە گوتی "ئێرە نەخۆشخانەیەکى ورد و پێشکەوتووە، هەموو ئەوانەى کە دێنە ئێرە لەپێشدا لە فریاکەوتنەکاندا پشکنینى دیکەیان بۆ کراوە، لێرەش بە ئامێرى پێشکەوتوو جارێکى دیکە دەپشکنرێن".
زۆربەى ئامێرەکان لە دەرەوەى وڵاتەوە هێنراون، نرخەکانیشیان گرانە، لێرە هەموو ئەو شتانە بەردەستن کە وڵاتان بۆ رووبەڕووبوونەوەی ڤایرۆسی کۆرۆنا بەکاریدەهێنن، پێشتر بڕیاربوو نەخۆشخانەکە تایبەت بکرێت بە نەشتەرگەریی هەناوى، بەڵام کۆرۆنا پلانەکەى گۆڕى.
یاد نەقشبەندى، گوتەبێژى تەندروستیى سلێمانى رایگەیاند "هەموو ئەوانەى کە لە ئێران و وڵاتانى دیکەوە دێنەوە، لێرە دەپشکنرێن، پاشان ئەگەر چارەسەرى ویست یان مانەوە، هەموو ئامادەکارییەکمان هەیە".
رێنماییە پزیشکییەکان و دواین توێژینەوەکانى رێکخراوى تەندروستیى جیهانى، دڵنیایی دەدەن کە کۆرۆنا یەکجار ئەو دێوەزمە نییە کە خەڵک لێى تۆقیوە، ئەوانەى ورەیان بەرزە و خۆپارێزن، ئەگەرى تووشبوون و چارەسەریان لەپێشترە.
26/2/2020
