(2).jpeg)
چیرۆکی ئەو ژنە کوردەی لە ژێر داروپەردووی باڵەخانەیەکی خارپێت گیریخواردبوو، بووە جێی سەرنجی میدیاکان و بە خێرایی بە باکووری کوردستان و تورکیادا بڵاوبووەوە.
ئەو ژنە کوردە ناوی ئایشێیە، ئەویش یەکێک بوو لەو هاونیشتمانییانەی بەهۆی بومەلەرزەکەی خارپێتەوە باڵەخانەکەی بەسەردا رووخا و کەوتە لێواری مان و نەمان.
ئەمینە قوشتەپە یەکێکە لە کارمەندانی تیمی فریاگوزاریی ئافاد کە ئەویش کوردە. ئەو دەیەوێ لەڕێی تەلەفۆنەوە دەنگی بەو هاونیشتمانییانە بگەیەنێت کە لە ژێر داروپەردوو گیریان خواردووە، چونکە یەکێک لەوان مۆبایلەکەی لایە کە ناوی عەزیزەیە.
ئایشێ زمانی تورکی نازانێت، بۆیە کاتێک لەلایەن عەزیزەوە بانگدەکرێت نازانێ چ وەڵامێک بداتەوە! چەند شتێک بە زمانی کوردی دەڵێت، بەڵام عەزیزە لێی تێناگات. ئەو دووانە یەکدییان لێ دیار نییە، تەنیا دەنگی یەکدی دەبیستن. بەڵام نە ئایشێ لە هاواری عەزیزە تێدەگات، نە عەزیزە لە وەڵامی ئایشێ تێدەگات.
ئەمینە قوشتەپە، کارمەندی تیمی فریاگوزاریی ئافاد لەڕێی تەلەفۆنەوە بە عەزیزە دەڵێ؛ گوێ بگرە من ئەم چەند وشەیەت بە کوردی فێردەکەم، تۆ بە ئایشێی بڵێ :"خولتی.. سۆڵغێ تە چ تنە؟ نەفەسێ تە چ تنە؟". عەزیزە بێ ئەوەی لەم وشە کوردییانە تێبگات، وەکو خۆی دەیگەیەنێت و لە ئایشێیەوە وەڵام وەردەگرێت، بەڵام ناشزانێ وەڵامەکە مانای چییە! تەنیا ئەوە دەزانێ کە ئایشێ هێشتا نەبووراوەتەوە و ئەم هەواڵە بە کارمەندەکەی ئافاد دەگەیەنێت.
ئەو کارمەندەی ئافاد دەیەوێ لەڕێی تەلەفۆنەوە دڵنیاببێتەوە لەوەی چەند کەس لە ژێر داروپەردوو ماون و تەندروستییان چۆنە.
بێگومان ئەمە ئاسان نییە، چونکە ئەوانەی کەوتوونەتە ژێر داروپەردووی باڵەخانەکەوە تووشی جۆشوخرۆش بوونە. ئەمینە قوشتەپە جەخت لە عەزیزە دەکاتەوە کە رێگە نەدات هیچ یەک لەوان بێدەنگ بن و ببوورێنەوە. بەردەوام رێنماییان پێدەدات و دەڵێ لەڕێی لووتەوە هەناسە وەربگرن و لەڕێی دەمەوە بیدەنەوە.
بەپێی دوایین پێشهات تیمەکان گەیشتوونەتە عەزیزە و رزگاریانکردووە، هەروەها هەوڵەکان بۆ رزگارکردنی ئەوانی دیکەش بەردەوامن.
لە تۆڕە کۆمەڵایەتییەکاندا ئەم چیرۆکە بە خێرایی تەشەنەی کرد و ئێستا خەڵک لە تۆڕە کۆمەڵایەتییەکاندا بە وردی چاودێریی چارەنووسی ئایشێ دەکەن.
26/1/2020
