^{زارا موحەممەدی چالاکی فەرهەنگی، دوای شەش مانگ لە دەسبەسەری ئازاد کرا.
زارا محەممەدی چالاکی فەرهەنگی و مامۆستای زمانی کوردی، دوای چەند مانگ لە دەسبەسەری بەشێوەی کاتی و بە دانانی بارمتە ئازاد کرا.
بەپێی ئەم هەواڵەی کە بە ناوەندی ڕاگەیاندنی “کوردستان و کورد” گەیشتوە، زارا موحەممەدی وانەبێژ و چالاکی فەرهەنگی و ئەندامی ئەنجومەنی فەرهەنگی_کۆمەڵایەتیی “نۆژین” دوای فشارێکی زۆر لەلایەن ناوەندە ئەمنییەکانی کۆماری ئیسلامییەوە، بە دانانی بارمتەی ٧٠٠ میلیۆن تمەنی و بەشێوەی کاتی ئازاد کراوە. زارا موحەممەدی کە ماوەی چەند مانگ پێش لەلایەن ئیتلاعاتی کۆماری ئیسلامییەوە لەگەڵ دوو ئەندام و بەڕێوەبەری ئەنجومەنی نۆژین دەسبەسەر کرابوو، دوای هەوڵێکی زۆری بنەماڵەکەی و چالاکانی مەدەنی و فەرهەنگی، بە دانانی بارمتە ئازاد کرا و گەڕایەوە نێو خەڵک و بنەماڵەکەی.
شایانی باسە کە ماوەی پێشوو، دادگای شۆڕشی کۆماری ئیسلامی قەبووڵی نەکردبوو کە زارا بە دانانی بارمتە ئازاد بکرێ بەڵام ئەوجارە بە هەوڵی چالاکان و لایەنگرانی زمان و شوناس و فەرهەنگی کوردی، بە دانانی بارمتەی ٧٠٠ میلیۆن تمەنی و بۆ ماوەیەکی کاتی ئازاد کراوە.}

٤/١٢/٢٠١٩