^{مووسەوی وتەبێژی وەزارەتی دەرەوەی کۆماری ئیسلامی لێداوانەکانی وەزیری دەرەوەی ئەمریکا لە سەر ڕۆڵی کۆماری ئیسلامی لە پشت هێرشی فڕۆکە بێ فڕۆکەوانەکانی حوسییەکانی یەمەنی ڕەت کردەوە و دەڵێت؛ ئەم جۆرە لێدوانانە زۆرتر لە پلانی ڕێکخراوە نهێنی و سیخوڕییەکان دەچێت بۆ شکاندنی شکۆی وڵاتێک و بوار بۆ کرداری مەترسیدار خۆش دکات.}

^{ناوبراو باسی لە وردەکاری کردارە مەترسیدارەکانی داهاتوو نەکرد.}

^{مایک پەمپێئۆ وەزیری دەرەوەی ئەمریکا ڕۆژی سێ شەممە ٢٣ی خەرمانان، کۆماری ئیسلامی بە بەرپرسی هێری فڕۆکە بێ فڕۆکەوانەکان بە دامەزراوە نەوتییەکانی عەرەبستانی سعوودی زانی.}

^{مایک پەمپێئۆ لە تویتێک دا نووسیویەتی؛ تاران لە پشت نزیک بە ١٠٠ هێرش بۆ سەر عەرەبستانی سعودییەوەیە، ئەمە لەکاتیک دایە کە ڕووحانی و زەریف وا دەنوێنن کە لە هەوڵی چارەسەری کیشەکانیانن لە ڕێگەی دیپلۆماسییەوە. لە نێوان هەموو داواکارییەکان بۆ کەم کردنەوەی گرژییەکان، ئێران ئێستا هێرشێکی بێ وێنەی بۆ سەر دامەزراوە و سەرچاوەکانی وزەی جیهانی ئەنجام داوە. هیچ بەڵگەیەک نییە کە دەری بکات ئەم هێرشانە لە یەمەنەوە ئەنجام دراون.}

^{پەمپێئۆ وتوویەتی؛ ئێمە داوا لە هەموو وڵاتان دەکەین بە ڕاشکاوی و بە ئاشکرا هێرشەکانی ئێران مەحکووم بکەن. وڵاتە یەکگرتووەکان لەگەڵ هاوپەیمانەکانی خۆی هاوکاری دەکات تا گەرەنتی خستنەڕووی پێویستی وزە، تووشی کێشە نەبێت. ئێران دەبێت وڵام دەرەوەی دەستدرێژییەکانی بێت.}

^{لە لایەکی دیکەوە سێناتۆری کۆماریخوازی ئەمریکا لیندسی گراهام لە تویتێکدا دەنووسێت؛ ئیستا کاتی ئەوە هاتووە کە وڵاتە یەکگرتووەکانی ئەمریکا بژاردەی هێرش بۆ سەر پاڵاوگە نەوتییەکانی ئێران لە ئەگەری بەردەوامی ئاژاوەگێڕییەکانی و پیتاندنی یۆرانیۆم تاوتوێ بکات و پاشان دەڵێت؛ ئێران دەست لەم کارە نەرێنییانەی خۆی هەڵناگرێت، مەگەر ئەوەی وڵامەکەی بە چاوی خۆی ببینێت، بەڵام هێرش بۆ سەر پاڵاوگەکانیان پشتی ئەم دەسەڵاتە دەشکێنێت.}

^{وەزارەتی ناوخۆی عەرەبستان رۆژی شەممە هەواڵی هێرش بۆ سەر دامەزراوە نەوتییەکانی ئارامکۆی لە بەقیق و لە مەیدانی نەوتی خەریس بڵاو کردەوە. ئەم هێرشانە بوونە هۆی ئاگرکەوتنەوە لەم دامەزراوانە و وەزارەتی ناوخۆی عەرەبستان دەڵێت کە ئاگرەکە کۆنتڕۆڵ کراون.}

^{هاوکات میلیشیا شیعەکانی حوسی یەمەن بەرپرسایەتی ئەم هێرشانەی وەئەستۆ گرتووە.}

^{کۆمپانیای نەوتی ئارامکۆی عەرەبستان دەڵێت کە دامەزراوە نەوتییەکانی بەقیق، لە ٦٠ کیلیۆ متری باشووری ڕۆژئاوایی مەقەڕی سەرەکی ئەم کۆمپانیایە لە زەهران، گەورەترین ناوەندی پاڵاوتن و بەرهەم نەوتییەکانی جیهانە.}

^{خەریس دووەمین مەیدانی گەورەی عەرەبستانی سعوودییە.}

١٦/٩/٢٠١٩