^{ماوەی سێ رۆژە هێرشەکانی سەر دامەزراوە نەوتییەکانی کۆمپانیای ئارامکۆی سعودیە بوونەتە بابەتێکی گەرم. ئەمریکا رەتیدەکاتەوە حوسییەکان ئەو توانایەیان هەبێت و لەخاکی عێراقیشەوە هێرشەکە کرابێت. جارێکی دیکەش پەنجەی تۆمەتەکان روو لە ئێران دەکرێن.}

^{هاوپەیمانیی عەرەبی لە کۆنفرانسێکی رۆژنامەڤانیدا رەتیکردەوە، هێرشەکە لەیەمەنەوە ئەنجامدرابێت و دەڵێت، ئەو چەکەی لە هێرشەکەدا بەکارهاتووە، دروستکراوی ئێرانە.}

^{تورکی ئەلمالیکی، گوتەبێژی هاوپەیمانیی عەرەبی رایگەیاند "لێکۆڵینەوەکان بەردەوامن و کەسانی پسپۆڕ لە شانشینی یەکگرتووی سعودیە ئەنجامیدەدەن، هێزە هاوبەشەکانیش لەگەڵ کەسانی پسپۆڕ لەو بوارە سەرقاڵن. هەموو بەڵگەکان و ئاماژەکان ئەوە پیشاندەدەن ئەو چەکانەی لە هێرشە تیرۆریستییەکەدا بەکارهاتوون، ئینجا بۆ سەر بەقیق بێت یا خورەیس، لە ئێران دروستکراون".}

^{پێشتریش میدیای ئەمریکا لەسەر زاری بەرپرسانی ئەو وڵاتەوە بڵاویکردەوە، هێرشەکە لەڕێگەی 19 مووشەکی کرووزەوە و لە ئێرانەوە ئەنجامدراوە. ئەگەری کاردانەوەی سەربازی واشنتن و ریازیش بەدوور نازانن.}

^{وەزیری وزەی ئەمریکاش رایگەیاند، ئەو مامەڵەیەی ئێران جێگەی قبوڵکردن نییە.}

^{ریک پێری، وەزیری وزەی ئەمریکا دەڵێت "دەمەوێت دووپاتیبکەمەوە ئەمریکا بەتووندی سەرکۆنەی هێرشەکانی ئێران بۆ سەر شانشینی سعودیە دەکات و داوا لە وڵاتانی دیکە دەکەین هەمان کار بکەن. ئەم رەفتارە جێگای قبوڵکردن نییە و دەبێت باجەکەی بدەن. با بەهەڵەدا نەچین، ئەمە هێرشێکی بە مەبەستبوو کرایە سەر ئابووری جیهانی و بازاڕی وزەی جیهانی".}

^{لە توویتێكیشدا دۆناڵد ترەمپ، سەرۆکی ویلایەتە یەکگرتووەکانی ئەمریکا لەڕێگەی بەکارهێنانی هەردوو وشەی "ئامادە و لەسەرپێ"، ئامادەیی وڵاتەکەی بۆ رەفتار و جووڵە لەئاست تاوانبارەکەی هێرشی سەر دامەزراوە نەوتییەکانی سعودیەی خستەڕوو کە بەگوتەی ترەمپ، هۆکارێکیان هەیە وایان لێبکات بەو باوەڕە بگەن کە کێ و چی لایەنێک بووە هێرشەکەی ئەنجامداوە. دەشڵێت، با ببینین ئاخۆ چی روودەدات.}

^{شەوی رابردووش وەزیری دەرەوەی ئەمریکا بە سەرۆکوەزیرانی عێراقی راگەیاند، هێرشەکە لەنێو خاکی عێراقەوە ئەنجامنەدراوە و ئەمریکا رەتیشیدەکاتەوە حوسییەکانی یەمەن بتوانن هێرشی لەو جۆرە ئەنجامبدەن.}

^{ئەو رەتکردنەوەیە دوای ئەوە دێت، میدیاکانی ئەمریکا باسیان لەوە دەکرد، بەرپرسە ئەمریکییەکان گومانیان هەیە لە ئەنجامدانی هێرشەکە لەلایەن حوسییەکانەوە و زیاتر بە ئاراستەی ئەوە دەڕۆن هێرشەکان یان لە عێراق یان لە ئێرانەوە ئەنجامدرابن.}

^{بەڵام عێراق هەر زوو وەڵامی ئەو گومانانەی دایەوە، لیوا تەحسین، خەفاجی، گوتەبێژی وەزارەتی بەرگریی عێراق، بە تۆڕی میدیایی رووداوی راگەیاند "وەزارەتی بەرگریی ئێستا بە هەماهەنگی لەگەڵ فەرماندەییەکان و بە ئاگاداری فەرماندەی گشتی هێزە چەکدارەکانی عێراق سەرقاڵی لێکۆڵینەوەیە بۆ ئاشکراکردنی راستییەکان".}

^{عادل عەبدولمەهدی، سەرۆکوەزیرانی عێراق، پێش ئەنجامی لێکۆڵینەوەکان کەوت و رایگەیاند: "خاکی عێراق بۆ هێرشکردنەسەر دامەزراوە نەوتییەکانی سعودییە بەکارنەهێندراوە و پابەندی دەستوورین کە رێگە بە هێرشکردنەسەر وڵاتانی دراوسێ و دۆستانمان نادات".}

^{حکومەتی ئێرانیش لەسەر زاری گوتەبێژەکەیەوە رەتیدەکاتەوە وڵاتەکەی ئەنجامدەری هێرشەکە بێت و دەڵێت، ئەوەی ئەنجامدراوە کاردانەوەیە لەبەرامبەر هێرشەکانی هاوپەیمانیی عەرەبی بۆ سەر یەمەن.}

^{هەرچەندە حوسییەکانی یەمەن دوێنێ ڤیدیۆیەکیان بڵاوکردەوە کە رایانگەیاندبوو ڤیدیۆی ساتی هێرشەکەیە و لەڕێگەی درۆنەوە ئەنجامدراوە، بەڵام بەرپرسانی ئەمریکیش سوورن لەسەر ئەوەی ئێران هێرشەکەی ئەنجامداوە، چەند بەرپرسێکی ئەمریکی کە نەیانویستووە ناویان ئاشکرابکرێت، بە رۆژنامەی وۆڵ ستریت جۆرنالی ئەمریکیان گوتووە: زانیاری هەواڵگریان بە سعودیە داوە کە هێرشەکەی سەر بیرە نەوتییەکانی ئارامکۆ لە سعودیە لەلایەن ئێرانەوە ئەنجامدراوە و هەردوو وڵاتەکە ئامادەکاری بۆ وەڵامدانەوەی ئەو هێرشە دەکەن.}

^{شارەزایان: هێرشەکانی سەر ئارامکۆ، سعودیە بۆ کڕیارێکی گەورەی بەرهەمە نەوتییەکان دەگۆڕێت.}

^{کۆمپانیای ئینێرجی ئیسپێکتس کە راوێژ لەبواری وزە پێشکەش بە کۆمپانیاکانی نەوت دەکات، پێشبینی دەکات سعودیە بۆ کڕیارێکی گەورەی بەرهەمە نەوتییەکان بگۆڕدرێت.}

^{لەنوێترین راپۆرتیدا، کۆمپانیای ئینێرجی ئیسپێکتس ئاماژەی بەوە داوە، هێرشەکانی سەر دامەزراوە نەوتییەکانی ئارامکۆ بووەهۆی وەستان و لەکارکەوتنی بەرهەمی نزیکەی پێنج ملیۆن و 700 هەزار بەرمیل نەوت و بەشێك لە بەرهەمە غازییەکانی ئەو وڵاتە، کەمی غازیش کاریگەری دەکاتە سەر پرۆسەکانی پاڵاوتنی نەوت و ئەوەش جۆری نەوتی بەرهەمهێنراوی سعودیە لە سووکەوە بۆ مامناوەند و قورس دەگۆڕێت. سعودیەش ناچار دەبێت بڕێكی زۆر لە بەنزین و دیزل بکڕێت. لەبەرامبەریشدا، نەوتی هەناردەکراوی بۆ بازاڕەکانی جیهان، کەمدەکاتەوە.}

^{کۆمپانیای ئینێرجی ئیسپێکتس راشیگەیاند: هێرشەکانی سەر ئارامکۆ، جگە لە پەکخستنی نزیکەی لە 50%ـی بەرهەمی رۆژانەی نەوتی سعودیە، هاوکات بەرهەمهێنانی غازی سرووشتی بە نزیکەی لە 18% کەمکردووەتەوە.}

١٦/٩/٢٠١٩