^{بزووتنەوەی کۆماریخوازان یادی ١٠ی خاکەلێوە ڕۆژی شەهیدانی کوردستان بەرز ڕادەگرێت
گەڵی کوردی خۆڕاگر!
کوردستانیانی سەربەرز!
ڕۆژی ١٠ی خاکەلێوە، ۷٨هەمین ساڵڕۆژی شەهیدکرانی پێشەوای گەورەی کوردان و یەکەمین سەرۆک کۆماری کوردستان واتە کۆماری دیفاکتۆی کوردستانە لە ۱۳۲٦/١٩٤٦دا،
لە ڕۆژی ۱۰ی خاکەلێوەی ۱۳۲۶ی هەتاوی نەمر و هەردەم زیندوو پێشەوا قازی محەممەد، هاوڕێ لەگەل شەهیدان حەمەحوسێن خانی سەیفی قازی و ئەبولقاسم سەدری قازی له‌دوو دادگای‌ ناعادلانه‌‌ و فه‌رمایشی‌ سەردەمی دەسەڵاتی ستەم‌شایی دا، حوکمی لە سێدارەدانیان بەسەردا سەپا و هەر له‌ چوارچرای‌ شاری‌ مه‌هاباد، واته‌ هه‌ر له‌و شوێنه‌ی‌ كه‌‌ لە ٢ی‌ ڕێبه‌ندانی ساڵی‌١٣٢٤/١٩٤٥ هه‌تاویی‌دا، بە بەشداری نەمر مەلا مستەفا بارزانی كۆماری‌ كوردستانی‌ بە شکۆ و هەیمنە و ئیرادەی پتەوی کوردایەتی لێ‌ راگه‌یه‌ندرابوو، لە ئەنجامی پشتیوانی نەکردنی زلهێزان لە کۆمار و پێشەوا و دۆزی کوردان، هەروەها خیانەتی زۆربەی سەرانی عەشایەری و نەبوونی ڕووحی خۆڕاگری، لەو لاشەوە دڕندەیی دەسەڵاتی ناوەندی، دوای تەسلیم بوونی ئاشتیانەی پێشوا و کۆمار لە پێناو گەل و وڵات دا ڕێک لەم شوێنەی سازدانی کۆمار، بە ناجوانمێرانە لە سێدارە دران و شەهید کران. هەمان ڕۆژیش له‌سه‌ر شان ‌و پیلی‌ خه‌ڵكی‌ به‌شه‌ڕه‌ف و کوردپەروەری‌ مه‌هاباد له‌گۆڕستانی‌ مه‌لا جامی‌ به‌خاكی‌ پیرۆزی‌ کوردستان سپێردران.
١٠ی خاکەلێوە ڕۆژێکی تاڵ و ناخۆش بوو لە مێژووی بزاوتی رزگاریخوازی کورددا کە تێیدا بەرجەستە ترین و بەرزترین کەسێتی مێژووی نوێی کورد واتە پێشەوا قازی سەرۆک کۆماری یەکەمین کۆماری مێژووی کوردستان لە بێدەنگی زلهێزانی جیهانی دابەشکەری کوردستان کە پشتیان لە کورد کردبوو و بە بڕیاری دەسەڵاتی بووکەڵەی پاڵەوی دووەم لە ئەنجامی نەبوونی روحی خۆراگری گشتگیر دوای پەیامی ئاشتی و دانووستاندن لە لایەن پێشەواوە و پاشان گیران و دەستبەسەر کردنیان بە شێوەی نامرۆڤانە شەهید کران.
لە ڕاستی دا بە بیرۆکەی سەرکردەی بە بلیمەتی کورد دوکتۆر عەبدوولڕەحمان قاسملوو، لە ۱۰ی خاكه‌لێوه‌ی ساڵی‌ ۱۳۵۸ی هه‌تاویی دا، ڕۆژی شەهید کردنی سەرکۆمار پێشەوا قازی و سەدری قازی و سەیفی قازی واتە ۱۰ی خاکەلێوە وه‌ك ڕۆژی‌ شه‌هیدانی‌ كوردستان‌ راگه‌یاند.
بە پێ بەڵگەگەلێکی باوەڕ پێکراو پێشه‌وا‌ و هاوڕێیانی‌ ئه‌وه‌نده‌ی‌ له‌ماوه‌ی‌ یازده‌مانگی‌ كۆماردا هه‌وڵیان دابوو، هه‌ر ئه‌وه‌نده‌ش له‌و دادگا فه‌رمایشی‌یانه‌ی‌ بۆ موحاكه‌مه‌كردنیان دانرا بوون، بە ئیرادەیەکی بەهێز و نەترسانە، بە له‌خۆبردوویی‌‌ و ئازایه‌تی‌یان له‌خۆیان نیشان داوه‌. له‌گه‌ڵ‌ هه‌موو ناره‌حه‌تیی‌ ده‌روونی ‌‌و ئه‌و ژیانه‌ تاڵه‌ی‌ كه‌ له‌ به‌ندیخانه‌ی‌ پادگانی‌ رێژیمی پاشایەتی ئێران لە مه‌هاباددا لە لایەن دژە گەلیانی دەرباری شاوە بۆیان پێك هاتبوو، نه‌ته‌نیا بڕوایان به‌كوردایه‌تی‌‌ و رزگاری‌ کوردستان لاواز نه‌ببوو، به‌ڵكوو زۆر جیددیتر‌، جەسوورتر، قایمتر و به‌ووره‌تر لەسەر ئارمان و ئامانجی نەتەوەیی و خواستە بەرحەق و ڕەواکانی کورد و کوردستان پێداگریان کردبوو.
بەشێک لە پەیام و وتە بەنرخ و خۆراگری مافخوازی پێشەوا لە دادگا.
داوا لە گەڵی کورد دەکەم یەکگرتوو و یەکڕیز بن تا دووژمن زەفەریان پێ نەبات و هەموو کات پێکەوە بن تا بتوانن سەرکەوتوو بن "
" ئەوانەی دەیانەوێ کورد لە مافە نەتەوەیەکان پاشگەز بکەنەوە خەیاڵیان خاوە، ئەوانەش دژایەتی وجوودی کورد دەکەن، ئینکار و دەستکاری خیلقەتی خوا دەکەن "
پەیام بۆ لاوان " لاوان رێگای فێربوونی زانست و خوێندن بگرنەبەر، دەردی کورد نەخوێندەواریە و دەرمان خوێندن و خوێندنەوە و زانست و زانیاری ".
روو بە ژنان " ژنانی کورد شایانی ئەوەن لە بەرزترین پلە و پایەی سیاسی و ئیداری دا بن ".
لە پەیوەندی بە شەڕ " ئێمە شەڕ بە رێگاچارەی نازانین، بەڵام بەو مانایە نیە لەسەر مافەمان بێ دەنگ بین، بۆیە ئاشتی بە کۆتا چارەسەر دەبینین "
دادگا و کاتی سێدارە دانی ناجوانمێرانەی پێشەوا
لە کاتی سێدارە "حه‌ز ده‌كه‌م له‌ئاخرین چركه‌ی‌ ژیانیشم دا به‌سه‌ربه‌رزی‌‌و چاوی ‌كراوه‌وه‌ له‌نیشتمانی‌خۆشه‌ویستم بروانم."
.
دادوەر: بۆ بارزانی بێگانەت پەناداوە و هێناوەتە بۆ ئێرە؟
پێشەوا قازی محمد: بارزانی لێرە لە مەهاباد بێگانە نیە و خاوەن ماڵە و کوردستان ماڵی هەموو کوردێکە و بارزانیش کوردێکی وڵات پارێز و دڵسۆزە.
دادوەر: تۆ ویستووتە ئێران دابەش بکەی و کوردستانی سەربەخۆ بنیات بنێی؟
پێشەوا قازی محەممەد: من سەدان جاری دیکەش لەم دادگایە و لە قوژبنی گرتووخانەدا دەنگی خۆم بەرز دەکەمەوە و روو بە دەوڵەتی تاران هاوار دەکەم کە داگیرکەر ئێوەن و ئێوە وڵاتتان لێ داگیر و دابەش کردووین.
دادوەر: کوردەکان بە رێبەرایەتی تۆ ویستیان خیانەت لە ئێران بکەن؟
پێشەوا قازی محەممەد : ئەگەر دەوڵەتی تاران کوردان بە خائین دەزانێ با دەست لەو مەڵبەندە هەڵبگرێ ئەگەر بە نیشتمان پەروەریان دەزانی لێگەڕێ با خۆیان کاروباری خۆیان بەرێوە ببەن و ئیدارەی کوردستان بکەن.
دادوەر: تۆ ئاڵای چەکوش و داسی شۆڕەوی کۆمۆنیستیت لە مەهاباد هەڵداوە؟
پێشەوا قازی محەممەد : من ئاڵای وڵاتی خۆمم هەڵداوە و ئەو ئاڵایەش ئاڵای کوردانە و ئاڵای هیچ وڵاتێکمان هەڵنەداوە و دڵنیا بن قەت دەستتان بەو ئاڵایە ناگات.
"ئێوه‌ قازی‌ محه‌ممه‌دێك ده‌كوژن، به‌ڵام بزانن له‌هه‌ر تنوكه‌خوێنێكی‌ من قازی‌محه‌ممه‌دێك شین ده‌بێته‌وه‌. داوا له‌گه‌لی‌كورد ده‌كه‌م خه‌باتی‌ خۆی‌ له‌پێناو رزگاریی‌كوردستاندا په‌ك نه‌خات، باوه‌ڕ به‌دەوڵه‌تی‌ خۆفرۆشی‌ تاران مه‌كه‌ن بژی‌كورد‌ و كوردستان".
بزووتنەوەی کۆماریخوازی رۆژهەڵاتی کوردستان، یادی رۆژی ١٠ی خاکەلێوە رۆژی شەهیدانی کوردستان بەرز رادەگرێت و لە بەرامبەر گەورەیی و قوودسییەتی سەرقافلەی شەهیدان پێشەوا قازی محەحمەد و هەموو شەهیدانی کوردستان سەری کرنووش دادەنوێنێ.
بەرزی و نەمری بۆ شەهیدان و سەرکەوتن بۆ گەلی کوردستان
بزووتنەوەی کۆماریخوازی رۆژهەلاتی کوردستان
١٠ی خاکەلێوەی ۲۷۲٥ی کوردی
٣٠ی مارسی ۲۰۲٥ زایینی}