^{بزووتنەوەی کۆماریخوازی رۆژهەڵاتی کوردستان بەم هۆیەوە هاودەردی و هاوخەمی خۆیی بۆ بەرکەوتووانی ناوچە لافاولێدراوەکانی سەراسەری ئێران و خوارووی رۆژهەڵاتی کوردستان لە پارێزگا کورد نشینەکانی لۆرستان و ئیلام و بەشێک لە پارێزگای هەمەدان و کرماشان دەردەبرێت.}

^{هەروەک ئاگادارن لە گەڵ هاتنی پشووی نەورۆز و ساڵی تازە، شەپۆلێکی بەفر و باران بارینی بەخور زۆربەی شارەکانی ئێران و بەتایبەتی رۆژهەڵاتی کوردستانی گرتەوە کە لە ئاکامدا بەداخەوە خەسار و زەرەر و زیانێکی گیانی و مادی لێکەوتەوە}

^{لەدرێژەی زنجیرە لافاوێگەلێكی گەورە و یەک لەدوای یەک، كە زۆربەی پارێزگاکانی ئێرانی گەرتەوە، بەداخەوە سەرئەنجام شەپۆلەكانی سامناكی ئەم لافاوە رۆژهەڵاتی کوردستانیشی بێ بەش نەكرد، دیارە ناوچەکانی رۆژهەڵاتی کوردستان بە هۆی چری و شاخاویی بوون و هەڵکەوتەی جوگرافیایی بەرز و نارێک، زۆرترین رێژەی باران بارینی تێدا بەدی دەکرێت، کە لە ئەنجام دا ساڵانە چەندین لافاوی بچووک و گەورە بە خۆیەوە دەبینێت، بەڵام نەورۆزی ئەمساڵ ئاستی باران بارین بە رێژەیەکی یەکجار زۆر بوو کە لە ئاکام دا چەندین لافاوی چاوەرواننەكراو و گەورە لە رۆژهەڵاتی کوردستان بەدوای خۆیدا هێنا، بە تایبەتی چەندین پارێزگای کوردنشین لەوانە کرماشان و هەمەدان و لۆرستان و ئیلام بە شار و شارۆچکە و گوند و قەزاوە کەوتنە ژێر ئاو، کە بەداخەوە چەندین گوند و شار و ناوچە بەتەواوەتی نوقمی ئاو بوون و هەروەها بەسەدان هاووڵاتی کوردمان گیانیان لە دەست دا و برینداربوون، و هەزارانیش بێ ماڵ و ژیان بوون و ئێستا لەم وەرزی تەروتووشی دا لە چیا و بەرزاییەکان و دەرەوەی شار و گوندەکانیان بە هەزار مەشەقەتی و بەدبەختی ژیان بەسەر دەبەن.}

^{ئەوەی جێگای هەڵوێستە لەسەرکردنە کەمتەرخەمی کۆماری ئیسلامی و دام و دەزگا پەیوەندیدارەکان لە ئاست ئەو کارەساتە سروشتیە، کە ئەو بێ مولاباتییەی حکومەتی تاران و بەتایبەتی ئۆرگانەکانی فیریاگوزاریی کە لەگەڵ رق و قینێکی زۆری خەڵکی ناوچە لافاوبەرکەوتووەکان لە خوارەوەی رۆژهەڵاتی کوردستان و تێکرای خەڵکی ئێران بەرەوروو بوو، هەر بۆیەشە خەڵک ئەوەیان لاچاوەروانکراوە بوو کە هیچ تەزمینێک لە حکومەت نیە و خەڵک وەک پێشوو لە چەندین کارەساتی ناخۆش دا ئاستی خراپی پێراگەیشتن و خزمەتگوزاری دامەزراوە و ئۆرگانەکانی حکومەتی ئێرانیان بینیبوو .}

^{بزووتنەوەی کۆماریخوازانی رۆژهەڵاتی کوردستان بەداخ و کەسەربوونی خۆی بەم کارەساتە سرووشتییە رادەگەیەنێت و داوا لە سەرجەم گەلی کورد لە رۆژهەڵاتی کوردستان دەکات کە بە ئەرکی مرۆیی و نەتەوەیی و ئایینی خۆیان هەڵستن و هەر وەک لە پێشوودا لە چەندین رووداو و کارەساتی هاوشێوەدا نیشانیان داوە و بە رووحێکی یەکگرتووانەوە بە هەموو شێوەیەکی مومکین کە لە توانایان دایە لەرووی مادی و مەعنەوییەوە بەهانای لێقەوامانی ناوچەلافاولێدراوەکانەوە بچن و لانی کەمی بەشێک لە ئازار و مەینەتیەکانی هاونەتەوە و هاونیشتمانییەکانیان لە خوارەوەی رۆژهەڵاتی کوردستان سارێژ بکەنەوە.}

^{شوورای هاوئاهەنگی بزووتنەوەی کۆماریخوازانی رۆژهەڵاتی کوردستان}

١٥ی خاکەلێوەی ٢٧١٩ی کوردی ١٣٩٨/ ٣ی ئاپرێلی ٢٠١٩