عەدنان موفتی
لەم هەڤپەیڤینەدا لەگەڵ (رووداو)، عەدنان موفتی، ئەندامی مەكتەبی سیاسی یەكێتی ، باس لە جیاوازی هەڵوێستی یەكێتی نیشتمانی كوردستان و پارتی دیموكراتی كوردستان دەكات لەهەمبەر كێشەكانی نێوان هەولێر و بەغدا و دەڵێ "یەكێتی وا بە باشتر دەزانێ گفتوگۆ لەگەڵ مالیكی بكرێ". هەروەها دەڵێ "ئێمە لەگەڵ بڵاوكردنەوەی بەڵگە نین لەسەر مالیكی و بە باشی نازانین"، ئەوە لەكاتێكدایە كە فوئاد حوسێن ، سەرۆكی دیوانی سەرۆكایەتی هەرێمی كوردستان لە هەڤپەیڤینێكدا لەگەڵ (رووداو)دا كە لە ژمارەی رابردوودا بڵاوكرایەوە كە مەسعود بارزانی سەرۆكی هەرێمی كوردستان گەیشتووەتە ئەو قەناعەتە كە گفتوگۆكردن لەگەڵ مالیكی هیچ سوودێكی نەماوەو باشترە لابدرێ.
هەڤپەیڤین: هیڤیدار ئەحمەد
رووداو: مالیكی لە چاوپێكەوتنیدا لەگەڵ كەناڵی ئێن ئاڕ تی، خەتای جێبەجێنەكردنی مادەی 140ی خستە ئەستۆی سەركردایەتی كورد و گوتی من ئەركی خۆم لەو رووەوە جێبەجێ كردووەو ئەوەی ماوە لای سەرۆك كۆمارە، وەڵامی ئێوە چییە؟
عەدنان موفتی: خەتاكەی نەخستووەتە سەر كورد، بەقەدەر ئەوەی ویستی بەرپرسیارێتی لەسەرخۆی لابدات و ئاماژەی بەوەكرد كە چەند هەنگاوێكی هاوێشتووەو لەڕووی پراكتیكییەوە پشتگیری لە لێژنەی جێبەجێكردنی مادەی 140 كردووە و نزیكەی ملیارێك دۆلاری بۆ قەرەبووكردنەوەی خەڵك خەرجكردووە. ئەو ئاماژەی بەوەكرد كە بەشێكی جێبەجێكردنی مادەی 140 پەیوەندی بە گۆڕانكاری سنووری ئیدارییەوە هەیە، ئەمەش وەك خۆی دەڵێ و هەر واشە، دەبووایە سەرۆكایەتی كۆمار ئەو پڕۆژەیەی پێشكەشی پەرلەمان بكردایە، چونكە ئەمە تەنیا ناوچە دابڕاوەكان ناگرێتەوە بەڵكو پەیوەندی بە ناوچەكانی دیكەی نێوان عەرەبی سوننە و شیعەشەوە هەیە، هەتا هەڵبژاردنی 2010ی عێراق ئەم كارە لەسەرۆكایەتی كۆمار نەدەكرا، چونكە ئەوكات سەرۆك كۆمار دوو جێگری سوننە و شیعەی هەبوو كە مافی بەكارهێنانی ڤیتۆیان هەبوو، هەر پڕۆژەیەك پێشكەش كرابا رەنگە یەكێكیان مافی ڤیتۆی بەكارهێنابایە، ئەگەر بیزانیایە لەبەرژەوەندی ئەوان نییە. ئێستا پرۆژەكە پێشكەش كراوە و لە پەرلەمانەو ئومێد دەكەین جێبەجێبكرێ. مالیكی لەو چاوپێكەوتنەدا هەوڵیدا بەرگری لەخۆی بكات و ئەمەش شتێكی سروشتییە، وەڵامی قسەكانی مالیكیش درایەوە كە ئەویش سروشتی بوو، ئێستا دەبێ چارەسەری واقیعبینانە بدۆزرێتەوە و بیر لەوە بكرێتەوە كە چی بكرێ. ئەو مەرجانەی كۆبوونەوەی هەولێر ئەگەر جێبەجێنەكران هەنگاوی دیكە چی دەبێ، ئایا بەردەوام بین لەو هەڵوێستە یاخود بەدوای چارەسەرێكدا بگەڕێین.
هەر كەسێك دەسەڵاتی سەرۆك وەزیرانی هەبێ كە لە دەستووری عێراقدا هاتووە سیمای دیكتاتۆری پێوە دیار دەبێ
رووداو: پێتوانییە مالیكی مەبەستی ئەوە بووبێ ناكۆكی لەنێوان كورد دروستبكات؟
عەدنان موفتی: نەخێر من وای نابینم، چونكە كاتی خۆی ئیبراهیم جەعفەریش نازانم پێش لادانی بوو یان دوای ئەوە هاتە كوردستان و كاتێك پرسیاریان لێكرد بۆ مادەی 140 جێبەجێناكەی، گوتی من ئەركی خۆم جێبەجێكردووە و ئەوەی ماوە لای سەرۆك كۆمارە، سەرۆك كۆماریش وەڵامیدایەوە و گوتی ڤیتۆ هەیە لە سەرۆكایەتی كۆمار، پڕۆژەكە ئامادەیە، بەڵام ئەگەر كۆدەنگی لەسەر نەبێ ناتوانم پێشكەشی بكەم، ئێستا مالیكی هەمان قسە دووبارە دەكاتەوە، بۆ ئەوەی بەرپرسیارێتی لەسەر خۆی كەمبكاتەوە، دیارە ئەو قسەیە راستە، بەڵام مانای ئەوەش نییە كە ئەو كەمتەرخەم نەبووە، هەموومان كەمتەرخەم بووین. ئەگەر مەبەستی ناكۆكی نانەوەش بووبێ كورد لەو رووەوە ئەزموونی تاڵی هەیە و تازە كەس ناتوانێ یەكڕیزی كورد تێكبدات. ئەو با قسەی خۆی بكات، بەڵام بەدڵنیاییەوە كاریگەری لەسەر ئەو یەكڕیزییە نابێت. بەڵێ جیاوازی لە بیروبۆچوون هەیە، بەڵام ئەو جیاوازییە نامانباتەوە بۆ دووبەرەكی و ناكۆكی سیاسی. ئێمە پابەندی ئەو نامەیەین كە لە كۆبوونەوەی هەولێر ئامادەكرا، ئەو نامەیە داواكاری تێدایە و ئێمە دەمانەوێ ئەو داواكاریانە جێبەجێ بكرێن. ئەوەش پێویستی بەوەیە دیالۆگ بكەین و رێكبكەوین، بەڵام ئەگەر هەر بینیمان لایەنی بەرامبەر نایكات و گوێ لە دیالۆگ ناگرێ، ئەو وەختە دەرگا بۆ شتی دیكە دەكرێتەوە.
رووداو: د.فوئاد حوسێن، سەرۆكی دیوانی سەرۆكایەتی هەرێمی كوردستان هەفتەی رابردوو گوتی كە بارزانی گەیشتووەتە ئەو قەناعەتەی چیتر ناتوانێ مامەڵە لەگەڵ مالیكی بكات، پێتوایە دەرفەتێك مابێ بۆ ئەوەی گفتوگۆ لەگەڵ مالیكی بكرێ؟
عەدنان موفتی: لە سیاسەتدا "نا" بە موتڵەقی ناگوترێ. دەتوانی بڵێی نا ئەگەر لایەنی بەرامبەر بەردەوام بێت لەسەر هەڵەیەك بۆ نموونە، دەتوانی بڵێی ئامادەنیم دابنیشم ئەگەر سیاسەتەكەی نەگۆڕێ. ئەگەر سیاسەتەكە بگۆڕێ بۆچی لەگەڵی دانانیشین، لە دانیشتنەكانی هەولێریش كە دواتر ئەو نامەیە ئاراستەی مالیكی كرا داوای لێكراوە ئەگەر ئەو مەرجانە قبووڵ بكات ئەوا مامەڵەی لەگەڵ دەكەین.
رووداو: كەواتە دەرفەتی گفتوگۆ لەگەڵ مالیكی ماوە؟
عەدنان موفتی: من پێموایە ئەگەر پابەندبێ بە دەستوور، بەڵێ ماوە.
رووداو: بەڵام لەنامەكەدا مۆڵەتی 15 رۆژ درایە مالیكی و لە 17ی ئەم مانگە مۆڵەتەكە كۆتایی هات و هیچ وەڵامێكی نەبوو؟
عەدنان موفتی: دەبێ وەڵامیان هەبووبێ، پێویستە لە نێوخۆیاندا وەك هاوپەیمانی نیشتیمانی كۆببنەوەو بۆچوونی خۆیان بڵێن، چونكە مالیكی نوێنەری ئەوانەو ئەوان زۆرینەن لە پەرلەمانی عێراق، ئەوان دەتوانن بڕیار بدەن لەسەر لادانی مالیكی و ئەگەر جیاوازی هەبوو لەسەر لادانی ئەوكات گفتوگۆی لەسەر دەكرێ.
رووداو: سەرۆكی هەرێمی كوردستان گوتی مالیكی بەرەو دیكتاتۆری دەڕوات، ئێوەش لەسەر ئەو رایەن؟
عەدنان موفتی: لە هەر وڵاتێكدا لێپرسراوێك ئەگەر دەسەڵاتێكی وای هەبێ كە لە دەستووری عێراقدا هاتووە، رەنگە سیمای دیكتاتۆریەتی پێوە دیاربێ و رەنگە حەزیش بكات دەسەڵاتێكی بێ سنووری هەبێ. بەڵام من هەمیشە گوتوومە لە عێراقدا جارێكی دیكە رێگە نادرێ دیكتاتۆر دروستببێ، دەستووریش رێگە نادات، هەرچەندە دەبووایە هەندێ لەو دەسەڵاتانەی لەدەست سەرۆك وەزیرانە درابانە سەرۆك كۆماریش تاوەكو باڵانسێك هەبێ، هەروەها پێكهاتەی عێراقیش كە لە سێ لایەنی سەرەكی سوننە و شیعە و كورد پێكهاتووە، رێگرە لە دروستبوونی دیكتاتۆری. ئەمە جگە لە توركمان و كلدان و ئاشووری و كەمینەكانی دیكە، ئیمكان نییە لە عێراقدا دیكتاتۆری حوكم بكاتەوە. گۆڕانكارییەكانی رۆژهەڵاتی نێوەڕاستیش دژی دیكتاتۆریەتن.
رووداو: لەو قەیرانەی ئێستا لە عێراقدا دروستبووە كورد چەندە خەتابارە؟
عەدنان موفتی: ناكرێ بەیەك رستە وەڵامی ئەوە بدرێتەوە، لە هەندێ تەوەردا خەتامان هەیە، لە مامەڵەدا یەك هەڵوێستیمان نەبووە، لەكەركووكدا دوو ئاسایش هەبووە و دوو ئیدارە هەبووە. هەندێ جار لە كاتی خۆیدا هەنگاوی پێویست هەبووە و نەنراوە، ئەمەش خەتایەكە، 2003 هەندێ شت هەبوون كە ئەوكات دەكران، ئێمە پێمانوابوو ناكرێن و ئێستاش هەموومان باجی ئەوە دەدەین.
رووداو: مەبەستت ئەوەیە كورد لە كەركووك یەك نەبوون؟
عەدنان موفتی: تەنیا لە كەركووك نەبووە، پێمانوابوو ناكرێ دوو هەنگاو لەو سنوورە بچینە پێشەوەو ئەگەر وابكەین دنیا خراپ دەبێ، ئەوە هەڵە بوو، مەبەستم ئەوە نییە پاساو بهێنمەوە و موزایەدە بكەین، منیش ئەوكات پێموابووە كە ناكرێ، كەچی ئێستا كە هەڵیدەسەنگێنن دەبینین ئەوكاتە هەڵەمان كردووە و باجەكەشی قورس بووە و تائێستا باجەكەی دەدەین. دووەم: هەندێ هەڵە هەیە رەنگە ئەوەندە پەیوەندی بە كوردەوە نەبووبێ بەڵكو پەیوەندی بە ئاڵۆزی دۆخی عێراق خۆیەوە هەیە و بڕیار وەرگرتن لە عێراق ئاسان نییە. حكومەتی هەرێمی كوردستان لە 2006ەوە یەكخراوەتەوە، بەڵام كە بەكردار یەكنەخراوەتەوە ئەوە كەمتەرخەمییە و كاریگەری هەبووە لەسەر جێبەجێكردنی مادەی 140 و زۆر شتی دیكەش، بۆ مامەڵەكردن لەگەڵ دراوسێیەكان و لەگەڵ حكومەتی عێراق هەموو ئەوانە هەڵە بوون. لەناو خۆشماندا ئەو دیموكراسیەی هەمانە نەمانتوانیوە وەك دامەزراوە بیچەسپێنین و وەك پێویست مومارەسەی ئەو دیموكراسییە نەكراوە چونكە فەرهەنگی دیموكراسیمان نییە.
رووداو: سەرۆكایەتی هەرێمی كوردستان هەڕەشەی بڵاوكردنەوەی بەڵگەی كردووە لەسەر مالیكی، پێتوایە ئەمە دوایین كارتە لەسەر مالیكی بەكاریدێنن؟
عەدنان موفتی: من بەباشی نازانم بەڵگە بڵاوبكرێنەوە. مادام ئێمە بەشێكین لە عێراق و هەر بەدوای چارەسەردا دەگەڕێین و هەمووشمان داوادەكەین پابەند بین بە دەستوور، دەبێ چی ئیمكان بێ ئەوە بكەین، داواكاریمان هەیە لە حكومەتی مالیكی و دەبێ جێبەجێیان بكات و ناكرێ هەنگاوی تاكڕەوانە بهاوێژرێ، بۆیە شەڕی راگەیاندن خراپە.
رووداو: دوای هەڕەشەی سەرۆكایەتی هەرێمی كوردستان، تاڵەبانی داوای راگرتنی شەڕی راگەیاندنی كرد، ئەمە بۆچوونی یەكێتییە كە بەڵگە بڵاونەكرێنەوە؟
عەدنان موفتی: پێش ئەوەش هەر پێم باش نەبوو، بەڵام ئێستا كە جەنابی مام جەلال و هەموو دۆستانی كوردیش پێیانوایە شەڕی راگەیاندن خراپە. ئەگەر شتێكمان هەیە لەسەر مێزی گفتوگۆ بەیەكتر بڵێین و رووبەڕوو ببینەوە و ئەگەر ئەوانیش گلەییان هەبێ دەبێ وەڵامیان بدەینەوە، بۆیە نابێ لە راگەیاندنەوە ئەو شەڕە بكەین.
دیكتاتۆری لە عێراقدا دروستنابێتەوە
رووداو: بەڵگەكان چین لەسەر مالیكی، كە هەڕەشەی بڵاوكردنەوەیان دەكرێ؟
عەدنان موفتی: نازانم.
رووداو: مالیكیش بەڵگەی لەسەر كورد هەیە؟
عەدنان موفتی: بەڵگە شتێكە و قسە شتێكی دیكەیە، هەموو قسەیەك دەتوانی بكەی لە راگەیاندنەكان، بەڵام كامەیان بەڵگەیە ئەوە گرنگە، من نازانم بەڵگە هەیە نە لێرەو نە لەوێ، بەڵام ئەوە كارێكی باش نییە، پێویست دەكات هەردوولا ئەمە رابگرن. چونكە كە دەرگات بۆ ئەوە كردەوە راتدەكێشێ بۆ هەڵوێستی خراپ و كار و كاردانەوەش دەبێ.
رووداو: لەو ماوەیەدا جیاوازیەك هەستی پێدەكرا لە هەڵوێستی یەكێتی و پارتیدا بەرامبەر ناكۆكییەكان لەگەڵ بەغدا، ئێوە ئەو جیاوازییە چۆن لێكدەدەنەوە؟
عەدنان موفتی: چونكە ئەمە مەسەلەی یەكێتی و پارتی نییەو ، سەرۆكی هەرێمی كوردستان بەرپرسیارێتی جیاوازە بەرامبەر بە خەڵكی هەرێمی كوردستان و سەرۆك كۆماریش بەرپرسیارێتی جیاوازەو هەریەكەو پابەندە بەو سوێندەی لەپەرلەمانی كوردستان و پەرلەمانی عێراق خواردوویانە. وەك دوو سەركردەی كورد جیاوازییەكی ئەوتۆیان نییە، جیاوازییان هەیە لە بۆچوون و چۆنیەتی مامەڵەكردن لەگەڵ كێشەكان. بەڵام لەڕووی مەسەلەی ستراتیژی جیاوازی ئەوتۆیان نییە. لە رێككەوتنی پێنج قۆڵی هەولێر كە سەرۆك كۆمار ئیمزای نامەكەی نەكرد لەبەر ئەوەبوو كە سەرۆك كۆمارەو دەبێ بێلایەن بێ، بەڵام كاك مەسعود لەجیاتی پارتی و یەكێتی ئیمزای كرد، ئینجا ئەگەر خەڵك پێیانوایە ئەوە جیاوازییە لەنێوان كاك مەسعود و مام جەلال، ئەوە وانییە بەڵكو بەرپرسیارێتییان جیاوازە.
رووداو:مام جەلالیش لەگەڵ ئەوەیە ئەگەر مالیكی بەوشێوەیە بەردەوامبێ دەبێ لابدرێ؟
عەدنان موفتی: خۆی ناتوانێ ئەو قسەیە بكات، ئەگەر بۆچوونیشی وابێ ناتوانێ ئەوە بڵێ، وەك رای تایبەتی خۆم پێموایە ئێمە داواكاریمان هەیە و دەبێ تەركیز لەسەر ئەو داواكارییانە بكەین، لابردنی هەر كەسێكیش رێگای خۆی هەیە، دیموكراسی چییە؟ ئایا هیچ كەسێك دەتوانێ لەسەر ئێمە بسەپێنێ كە دەبێ سەرۆكی هەرێمی كوردستان لابدەین، كەس ناتوانێ ئەو بڕیارە لەجیاتی میللەتی كورد بدات، ئەوانیش هەروا. ئێمە داواكاریمان هەیە و داواكاری ئێمە لەگەڵ عێراقییە و رەوتی سەدر یەكدەگرێتەوە و ئەگەر ئەو دواكارییانە فراوانبوون ئەوكات رێگای دیموكراسی دەگیرێتەبەر بۆ گۆڕانكاری و ئێستاش كۆبوونەوەكان بەردەوامن.
رووداو: دەگوترێ ئێران گوشاری كردووەتە سەر سەركردایەتی كورد كە باسی لادانی مالیكی نەكەن و ماوەیەك لەمەوبەر باڵیۆزی ئێران سەردانی بارزانی و تاڵەبانی كرد، گوشاری ئێران چەندە كاریگەر بوو؟
عەدنان موفتی: ئێران دەوڵەتێكی گەورەیەو سنوورێكی درێژی لەگەڵ عێراق و كوردستان هەیە و بەرژەوەندییەكی زۆریشی لەگەڵ عێراق هەیە جگە لە ململانێ لەگەڵ ئەمریكا و ناوچەكە. توركیاش هەروایە، لەبەرئەوە ئەو وڵاتانە هەریەكەو بەشێوەیەك لە شێوەكان بەدواداچوونی خۆیان هەیە بۆ رووداوەكان، بۆیە دێن پرسیار دەكەن و پێیانوایە كە دەبێ چارەسەری كێشەكان بە دیالۆگ بكرێ و باسی لادانی مالیكیشیان نەكردووە.
بەباشی نازانم بەڵگە لەسەر مالیكی بڵاوبكرێتەوە
رووداو: لەو باوەڕەدای مالیكی بڕوات؟
عەدنان موفتی: وەڵامی ئەو پرسیارە ئاسان نییە، مالیكی هەوڵی خۆی دەدا بمێنێتەوە و پێگەی خۆی لە نێو دەوڵەتی قانون بەهێز كردووەو لەگەڵ ئەنجوومەنی باڵای ئیسلامیش یەك هەڵوێستن لەسەر مانەوەی، ئەمە لە لێدوانی بەرپرسانی ئەنجوومەنی باڵای ئیسلامیدا دیارە.
رووداو: پارتی لەسەر ئەو رایەیە كە مالیكی لابدرێ، بۆچوونی یەكێتی چییە؟
عەدنان موفتی: ئێمە لەگەڵ ئەوەین داواكارییەكانمان جێبەجێبكرێن، ئەگەر نەكرا خەباتكردن بۆ لابردنی هەر كەسێك كە كۆسپ بێ و دەستوور پێشێل بكات، سروشتییە خەبات بكەین بۆ لادانی.
رووداو: كورد لە پڕچەككردنی عێراق دەترسن و سەرۆكی هەرێمی كوردستانیش ئەو ترسەی بە سەرۆكی ئەمریكا راگەیاند، ئایا ئەو ترسە لە جێگەی خۆیەتی، چونكە ئێوەش لە 2008 داواتان لە ئەمریكا كرد چەكی پێشكەوتوو بە عێراق نەدەن؟
عەدنان موفتی: با وردتر بڵێم لە 2008 لەگەڵ شاندێكی كۆنگرێسی ئەمریكا لە پەرلەمانی كوردستان داوامكرد ئەگەر ئەمریكا چەكی پێشكەوتوو بداتە عێراق دەبێ گرەنتی لێوەربگرێ كە ئەو چەكە دژی كورد و خەڵكی عێراق بەكارنەهێنرێ، چونكە نازانین سبەینێ چ حكومەتێك دروستدەبێ. دەبێ لەگەڵ ئەمریكا و هاوپەیمانانی خۆمان رێكبكەوین كە ئەو چەكەی دەدرێتە عێراق لەدژی كورد بەكارنەیێت، بۆیە ترسی كاك مەسعود لە پڕچەككردنی عێراق لە جێگەی خۆیەتی و دەبێ كورد و خەڵكی عێراق لەوە دڵنیابێ كە سوپای عێراق لە دژی میللەت بەكاریانناهێنێ وەك سوپای میسر، كاتێك خۆپێشاندانەكان كرا سوپای ئەو وڵاتە بێلایەن مایەوە.
رووداو: ئێستا پەیوەندی نێوان یەكێتی و بزووتنەوەی گۆڕان لە چ ئاستێكدایە، بەتایبەتی پاش دوایین كۆبوونەوەی نێوان هەردوولا؟
عەدنان موفتی: هەنگاو هەیە بۆ ئاساییكردنەوەی پەیوەندی نەك تەنیا لە نێوان گۆڕان و یەكێتی. گۆڕان ئێستا سیاسەتێكی تازەی گرتووەتەبەر، بەتایبەتی پاش سەردانەكەی سەرۆكی هەرێمی كوردستان و سەرۆكی حكومەتی هەرێمی كوردستان بۆ لای ئەوان و ئەوانیش وەڵامی سەردانەكەیان دایەوە و سەردانی سەرۆكی هەرێمی كوردستانیان كرد و لەگەڵ یەكێتیش چەند كۆبوونەوەیەكیان كردووە بۆ ئەوەی پەیوەندییەكە ئاسایی بكرێتەوە. وەك خۆیان دەڵێن بەردەوام دەبن لە ئۆپۆزیسیۆن و رەخنەگرتن، ئەمەش بەو مانایە نییە كە دوژمنایەتی بێت بەڵكو لەهەر شوێنێك كەموكوڕییەك هەبێ باسی دەكەن. ئەو پەیوەندییە لە قازانجی ئەوان و لە قازانجی حكومەتیشە.
رووداو: لە دوایین كۆبوونەوەی نێوان یەكێتی و گۆڕان، گۆڕان داوای گۆڕینی پارێزگاری سلێمانی كرد، یەكێتی ئامادەیە پارێزگار بگۆڕێ؟
عەدنان موفتی: مەسەلەی پارێزگار كاری حكومەتە و دەتوانن قسەیان لەگەڵ بكەن، بەڵام لە ئەنجوومەنی پارێزگای سلێمانی ئەگەر لەگەڵ لایەنەكانی دیكەی ئۆپۆزیسیۆن پێكەوەبن ئەوە مەسەلەیەكی دیكەیە. چەند مانگێكی دیكە ماوە بۆ هەڵبژاردنەكان و ئەگەریش هەڵبژاردنەكان دواكەوت ئەوە بۆ دوو سێ مانگ دەبێ و ئەوكات هەر لایەنێك زۆرینەی هێنا مافی خۆیانە پارێزگار لەوان بێت.
رووداو: ئەگەر گۆڕان داوای گۆڕینی پارێزگار بكەن و یەكێكی دیكە هەر لە یەكێتی لە شوێنی ئەو دابنێن رازی دەبن؟
عەدنان موفتی: ئەوان كێشەیان لەگەڵ بەهرۆز نییە وەكو شەخس، بەڵكو ئەوان دەڵێن لەبەرئەوەی لە ئەنجوومەنی پارێزگای سلێمانی زۆرینەن دەبێ پارێزگار لەوان بێ و ئەوەشمان بە فەرمی لەوان نەبیستووە بەڵكو لە رۆژنامەكان خوێندوومانەتەوە.
رووداو: لە سەردانەكەیدا بۆ مەكۆی بزووتنەوەی گۆڕان، باڵیۆزی ئێران، نەوشیروان مستەفای بانگهێشتكرد بۆ ئێران، ئێوە وەك یەكێتی ناڕەحەت نابن بەو سەردانە؟
عەدنان موفتی: ناوەڵڵا زۆر باشە، هەر حیزبێك ئەگەر ئۆپۆزیسیۆنیش بێ، چەند پەیوەندی فراوان بێ، بەڵام شەفاف بێ باشترە، چونكە چەند پەیوەندیت باشتر بێ سیاسەتەكەت واقعیتر دەبێ، پەیوەندی لەگەڵ ئێران و توركیا هەبێ ئەگەر شەفاف بێ ئەوا قازانج دەكەن. ئێستا دەرفەتی نهێنیش نەماوە و هەمووشتێك ئاشكرا دەبێ، چونكە كاتی خۆی لە 2007 لە قاهیرە لە دژی هەرێمی كوردستان رێككەوتنێك كرا و یەكگرتووش تێیدا بەشداربوو كە بە خۆشبەختانە زوو پەشیمان بوونەوە، زوو ئاشكرابوو. بۆیە چەند شت بشاریەوە خراپە و چەند ئاشكرای بكەی باشە و هەڵەش كەمتر دەبێ لەبەرئەوەی هەست بە بەرپرسیارێتی دەكەی، بۆیە ئەو پەیوەندییانە زەرەریان نییە.
