الشرقیه
مه‌سعود بارزانى، سه‌رۆكى هه‌رێمى كوردستان له چاوپێكه‌وتنێكدا له‌گه‌ڵ كه‌ناڵى الشرقیه، نووسینگەی سەركردەی گشتیی هێزی چەكداره‌كان، كه نورى مالیكى سه‌رۆكایه‌تى ده‌كات، تاوانبار كرد به كوشتنى شیعه‌كان و گوتى "بكوژانی شیعە هەموویان لە دەورووبەری نووسینگەی سەركردەی گشتیی هێزی چەكدارن".
بارزانى له‌و دیداره‌دا سه‌رسوڕمانى خۆى به‌رامبه‌ر س ه‌رۆكایه‌تى كۆمار و په‌رله‌مان و فراكسیۆنه‌كان ده‌رده‌بڕێ كه بێده‌نگن به‌رامبه‌ر ده‌سه‌ڵاتى تاكڕه‌وى نورى مالیكى، سه‌رۆك وه‌زیرانى عێراق.
سه‌رۆكى هه‌رێمى كوردستان له به‌شێكى دیداره‌كه‌دا باس له كه‌مبوونه‌وه‌ى رێژه‌ى كورد ده‌كات له سوپاى عێراق و ده‌ڵێت رێژه‌ى كورد له سوپاى عێراق بۆ 8% كه‌مبووه‌ته‌وه. له‌باره‌ى سوپاسالارى عێراقیش، كه كورده، بارزانى ده‌ڵێت "سوپاسالار لە هەموو دەسەڵاتەكانی بێبەشكراوە و وجوودی زیادە لەو پێگەیەدا".
ئەمه‌ى خواره‌وه ده‌قى دیداره‌كه‌یه:
الشرقیه: لە ڕۆژانی ئایندەدا ئێراق میوانداریی لووتكەی عەرەبی دەكات، ئایا ئێوە داوەتكراون؟ بۆ ئامادەبوون لەو كۆنگرەیە دەچنە بەغدا؟
سه‌رۆكی هه‌رێمی كوردستان : نەخێر من داوەت نەكراوم و ناشچمە بەغدا و ئەمە كاری من نییە، بەڵكو كاری برایانی دیكەیە من هیوای سەركەوتن بۆ ئەو كۆنگرەیە دەخوازم.
الشرقية: یەكەمینجارە دوای ماوەیەكی دوور و درێژ ئێراق میوانداریی ئەم كۆمبوونە دەكات كە هەموو دەوڵەتانی عەرەبی بەشداریی تێدا دەكەن، گرێدانی ئەم كۆنگرەیە لە بەغدا چ واتایەكی بۆ ئێوە هەیە؟
سه‌رۆكی هه‌رێمی كوردستان : ئەمە هەنگاوێكی زۆر گرنگە، لانی كەم داننانە بە حكوومەتی ئێراق لەو كاتەی دەوڵەتانی عەرەبی لە داننان بە بارودۆخی تازەی ئێراق موتەحەفیز بوون.
الشرقية: پێتان باشە گرفت و پرسە سیاسییەكانی ئێراق لەو كۆنگرەیەدا باس بكرێت؟
سه‌رۆكی هه‌رێمی كوردستان : من هیواخوازبووم گرفتە نێوخۆییەكانی ئێراق بەر لە گرێدانی لوتكەی عەرەبی لە كۆبوونەوەی سەركردە ئێراقییەكان گرێبدرێت، بەڵام ئەوە نەبوو و پێشموایە ئەگەر ئێراقییان خۆیان گرفتی خۆیان چارەسەر نەكرد، ناكرێ لە لوتكەی عەرەبیدا چارەسەر بكرێت، بەڵام ئاساییە خەڵك لە ڕاستیی كێشەكانی ئێراق ئاگاداربن.
الشرقية: كەواتە وا تێدەگەم ئێوە لە لووتكە دوور دەبن وهیچ دیدارێكتان لەگەڵ شاندە میوانەكان نابێت؟
سه‌رۆكی هه‌رێمی كوردستان : من لە هەمان كاتی كۆنگرەكەدا بەرنامەی سەردانێكم بۆ دەرەوەی وڵات هەیە كە بەر لە چەند مانگێك وادەكەی دیاریكراوە.
الشرقية: پرسیارێك دێتە ئاراوە، ئایا ئەو لوتكەیە پێگەی ئێراق و لە هەمانكاتدا پێگەی حكوومەت بەهێز دەكات، ئەم پرسە نیگەرانتان ناكات؟
سه‌رۆكی هه‌رێمی كوردستان : ئەگەر ئەم كونگرەیە بۆ بەهێزكردنی پێگەی ئێراق بێت ئەوە شتێكی ئاساییە، بەڵام ئەگەر بۆ بەهێزكردنی پێگەی تاكە كەسێكی دیاریكراو یان حكوومەت بێت بەتەنیا ئەوە لەبەرژەوەندیی گەلی ئێراقدا نییە، لەبەرژەوەندیی گەلی ئێراقدایە پێگەی خودی ئێراق بەهێز بكرێت نەوەكو كەسێكی دیاریكراو.
الشرقية: كەواتە مەترسیتان لە كاردانەوەی سەلبیی لووتكەی عەرەبی هەیە بەسەر پەیوەندیی نێوان هەرێم و بەغدا؟
سه‌رۆكی هه‌رێمی كوردستان : پێموایە پرسی لووتكەی عەرەبی هیچ گرفتێكی بۆ هەرێمی كوردستان نییە و هیچ گرفتێك لە نێوان هەرێم و ناوەند دروست ناكات، وەكو گوتم هیوای سەركەوتن بۆ كۆنگرەكە دەخوازم و هیوادارین بۆ بەهێزكردنی پێگەی كەسێك یان لایەنێكی دیاریكراو ئیستیغلال نەكرێت.
الشرقية: جەنابی سەرۆك ئەو گرفتەی ئەمڕۆی ئێراق چۆن وەسفدەكەن؟ گرفتی ئێوە لەگەڵ ناوەندە یان حكوومەتی ئێستا؟ واتا گرفتەكە لەگەڵ بەغدایە بەگشتی یاخود لەگەڵ ئەو حكوومەتە بەشێوەیەكی تایبەت؟
سه‌رۆكی هه‌رێمی كوردستان : بارودۆخی تازە و حكوومەتی ئێستا پێویستە هاوبەشانە بێت، واتا حكوومەتی ئێراق حكوومەتی شەراكەتی نیشتیمانی بێت، كوردیش ڕۆڵیان لە پێكهێنانی ئەو حكوومەتە و دووبارە داڕشتنەوەی بارودۆخی تازەوە هەبوو، بەڵام بەشێوەیەكی پلە بە پلە لە ماوەی6 ساڵی ڕابردوودا هەوڵی زۆر هەن بۆ دەستگرتن بەسەر هەموو دامودەزگاكانی دەوڵەت لەلایەن لایەنێكی دیاریكراو كە تاڕادەیەك لە هەوڵەكانیدا سەركەوتوو بووە، ئەمەش لەخۆیدا دژی دەستوور و دژی پرەنسیپی شەراكەت و دژی هەموو ئەو ڕێككەوتنانەن كە هەموو لایەك ڕەزامەندیی لەسەر داوە، ئەمە ئەسڵی گرفتەكەیە، گرفتەكە تەنها هی هەرێمی كوردستان نییە، بەڵكو گرفتی هەموو ئێراقە، پرسەكە پەیوەندی بە دیموكراسییەتی ئێراقەوە هەیە، ئەمە جگە لە شەراكەتی ڕاستەقینە لە حوكم، ئەمەیە گرفتی سەرەكی، بەڵێ گرفت لە نێوان بەغدا و هەرێمدا هەیە، ئەمەش لە ئەنجامی قۆرخكردنی دەسەڵات و پێشێلكردنی دەستوور و پەراوێزخستنی ئەوانی دیكە و گرنگی نەدانە بە شەراكەتی ڕاستەقینە.
الشرقية: بەڕوونی و ڕاشكاوی كەسایەتییەكی دیكەی غەیری بەڕێز نووری مالیكی هەبووایە لە حكوومەت بارودۆخەكە ڕێڕەوێكی دیكەی بەخۆوە دەبینی؟
سه‌رۆكی هه‌رێمی كوردستان : من نامەوێ پرسەكە مۆركێكی شەخسی بەخۆیەوە ببینێت، دەستوورێك هەیە زۆرینەی ئێراقییان دەنگیان بۆ داوە، ئەو دەستوورە حەكەمە، هەركەسێك بەو دەستوورە پابەند بووایە ئەو گرفتە ڕووی نەدەدا، كەواتە پابەندبوون نییە بەدەستوور و پێشێلكردنیشی هەیە، من ناتوانم بڵێم ئەگەر كەسێكی دیكە هەبووایە بارودۆخ باشتر دەبووە، چونكە هەركەسێك دەستووری پێشێلكردبووایە هەمان شت ڕوویدەدایەوە.
الشرقية: بەڕێزتان گوتتان شەش ساڵ، واتا 4+2 ساڵ، لە4 ساڵی یەكەم ئێوە هەموو گرفتەكانتان بەچاوی خۆتان بینی لەبەرچی ئێوە جارێكی دیكە بەنوێكردنەوەی ئەو حكوومەتە ڕازی بوون؟
سه‌رۆكی هه‌رێمی كوردستان : بەڕاستی ئەم پرسیارە لەجێیە، پرسیارێكە مافی گەلانی ئێراقە بیكات، من چەند جارێك هۆشداریم لەبارەی ئەو پرسە داوە و زۆرجاریش بەشێوەیەكی ڕاستەوخۆ پەیوەندیم بە جەنابی سەرۆك وەزیرانەوە دەكرد یانیش لە دیداری تایبەت و نامە گۆڕینەوەدا پێمگوتووە، من جەختم لەسەر پابەندبوون بەدەستوور و جێبەجێكردنی ڕێككەوتننامەكانی نێوانمان دەكردەوە هەمیشە بەڵێنی زۆرمان پێدەدرا، بەڵام بەبێ ئەنجام، بەگشتی بەرپرسیارێتییەكە دەكەوێتە سەرشانی هەمووان، لەبەرچی پەرلەمان بێدەنگ بوو؟ بەهەمانشێوە سەرۆكایەتیی كۆمار؟ چۆن ئەنجوومەنی وەزیران بەم بارودۆخەوە پابەندبوون؟
الشرقية: بابگەڕێینەوە بۆ ئەو ڕۆژەی حكوومەت تازە كرایەوە بەپێی ڕێككەوتننامەی هەولێر كە بەچاودێریی ئێوەوە گرێدرا و ئێوە دەستپێكی سەقامگیریی بارودۆختان دانا، بەشێوەیەك كە هەموو لایەنەكان بپارێزێت لەسەر بنەمانی شەراكەت، ئایا هەر لەسەرەتاوە ئیرادەی سیاسی بۆ ئەم شەراكەتە نەبووە؟
سه‌رۆكی هه‌رێمی كوردستان : ڕێككەوتنی هەولێر لەسەر چەند بنەمایەكەوە دامەزرا لەوانە: گەڕاندنەوەی هاوسەنگی بۆ هەموو دامو دەزگاكانی دەوڵەت، پابەندبوون بەدەستوور، هاوبەشیی ڕاستەقینە، چارەسەركردنی هەموو گرفتەكانی هەرێم و ناوەند، حكوومەتی تازە سەفقەیەك بوو لە نێوان لایەنە سیاسییەكاندا و بەتەوافوق پێكهێنرا واتا سەرۆكایەتیی كۆمار، سەرۆكایەتیی ئەنجوومەنی وەزیران، سەرۆكایەتیی ئەنجوومەنی نوێنەران و دەشكرا و پێویستیش بوو هەموو لایەنەكان بەو ڕێككەوتنانەوە پابەند بن، بەڵام هەر كە حكوومەت پێكهێنرا ڕێككەوتنەكان پشتگوێخران و بارودۆخ وەكو پێشتر گەڕایەوە و بەتاكڕەوی و پێشێلكردنی دەستوور.
الشرقية: بەڵام لەو ماوەیەدا ئێوە زیاتر لە جارێك لەگەڵ بەڕێز مالیكیدا كۆبوونەوە واتا دوای ڕێككەوتنی هەولێر و لێدوانی ئیجابیش هەبوون بەچارەسەریی كێشەكان و چەندین شاندیش بەسەرۆكایەتیی د. بەرهەم ساڵح چووە بەغدا، ئێوە واتان بە خەڵك نیشاندا ئیرادەیەك بۆ چارەسەركردنی كێشەكان هەیە، ئایا درۆ لەگەڵ ئێوەدا كرا؟
سه‌رۆكی هه‌رێمی كوردستان : ئێمە بەنییەتێكی ڕاستگۆیانە لەسۆنگەی پاراستنی بەرژەوەندیی ئێراق ڕەفتارمان كرد، وامانزانی هەموو لایەك ڕێز لەبەڵێن و ئیمزاكانی خۆی دەگرێت، بەڵێ ئێمە زیاتر لە جارێك دیدارمان هەبوو شاندی ئێمە چووە بەغدا و بەڵێنی زۆرمان وەرگرت، بەڵام هیچ بەڵێنێك نەهاتەدی، بەڵكو لە ماوەی ڕابردوودا لێدوانەكان توندبوون و گەیشتنە ڕادەی هێرشكردن بۆیە دەبووا وەڵاممان هەبێت.
الشرقية: وا باس دەكرێت گوایە هەندێ بەندی دیاریكراو هەن لە ڕێككەوتنی هەولێردا ئاشكرا نەكراون و باسیان لێوە نەكراوە، وایە؟
سه‌رۆكی هه‌رێمی كوردستان : نا وانییە، ئێمە باسمان لە پابەندبوون بە دەستوور، شەراكەتی ڕاستەقینە، گەڕاندنەوەی هاوسەنگی بۆ دامودەزگاكانی دەوڵەت و دانانی پەیڕەوێكی ناوخۆ بۆ ئەنجوومەنی وەزیران و چارەسەركردنی كێشەكانی زەوی و زار و ناوچە دابڕێنراوەكان، یاسای نەوت و غاز، پرسی پێشمەرگە و ئەنجوومەنی سیاسی كرد كە هیچیان جێبەجێ نەكران.
الشرقية: لە ڕێككەوتنی هەولێردا هیچ تەواوفقێك لەبارەی یاسای نەوت وغازەوە كرا؟ یان ئێوە لەناكاو بینیتان حكوومەت ڕەشنووسێكی تازەی یاسای نەوت وغازی پێشكەشكردووە؟
سه‌رۆكی هه‌رێمی كوردستان : ئێمە لە شوباتی2007 لە بارەی ڕەشنووسی یاسای نەوت و غازەوە ڕێككەوتین و پاشكۆیەك لەو یاسایەدا هەیە دەڵێ: ئەگەر تا مانگی ئایاری2007 ئەو یاسایە ئیقرار نەكرا، هەرێم و بەغدا مافی ئیمزاكردنی گرێبەستیان دەبێت، بۆیە دووپاتیدەكەمەوە، ئێمە هیچ شتێكی دژ بە دەستوورمان نەكردووە، لە ڕاستیشدا دەمەوێ خاڵێك ڕوونبكەمەوە، ئەو قسانەی لەبارەی نا دەستووری و نا شەفافیی گرێبەستە نەوتییەكانی حكوومەتی هەرێم دەكرێت، بە هیچ شێوەیەك ڕاست نییە، بەڵكو هەموو گرێبەستەكان لەبەردەم پەرلەمانی ئێراق و هەموو دامو دەزگا نێودەوڵەتییەكان دانراوە، بەڵام ئامانجی ڕاستەقینە لێرەدا وەستانە لە دژی پێشكەوتنی كوردستان كە ئەمە بەدیدی من كاریگەرییەكەی لە ئەنفال كەمتر نییە.
الشرقية: ئەمە دیدی گشتیی بەغدایە یاخود بەبۆچوونی ئێوە تەنها هی ئەو حكوومەتەیە؟
سه‌رۆكی هه‌رێمی كوردستان : ئەمە دیدی هەندێ كەسە.
الشرقية: دوایین وتاری بەڕێزتان زۆر ڕوون و ڕاشكاوانە بوو تووڕەیی پێوە دیاربوو، ئایا هۆكاری ئەو تووڕەییە چی بوو؟ ئایا هەوڵەكانی حكوومەت نەبوو بۆ گوشار خستنە سەر كۆمپانیاكانی نەوتی وەكو ئیكسۆن مۆبێل بۆ ڕاگرتنی چالاكییەكانیان لە وەبەرهێنانی نەوت لە هەرێمی كوردستان بەرامبەر بە دانی دەرفەتی وەبەرهێنانی نەوت لەكێڵگەی قورنەدا؟
سه‌رۆكی هه‌رێمی كوردستان : شتی زۆر كەڵەكە بوون لەوانەش ئەو پرسەی باست لێیەوە كرد، بابەتەكی دیكە وێناكردنی بارودۆخ وەكو ئەوە وابێت ئێمە لە دژی شیعە وەستاوین ئەمەش لە ناخەوە هەژاندمی، ئێمە لەگەڵ گەلی ئێراقین بە سوننە و بە شیعەوە، ئێمە لەگەڵ یەكبوونی ئێراقین، بەڵام ئێراقێكی دیموكراتی و ئامادەنین جارێكی دیكە لە ئێراقێكی دیكتاتۆریدا بژین هەموو گەلی ئێراقیش لەدژی دیكتاتۆرییەتە، بەڵێ پرسی نەوتیش لە ئارادا هەبوو بەتایبەتی بە تۆمەتباركردنی هەرێم بەوەی لەدژی دەستوور لەگەڵ كۆمپانیاكانی نەوت ڕێكدەكەوێت، دووپاتیدەكەمەوە، وەستان لە دژی پێشكەوتنی كوردستان دوژمندارییەكە كاریگەریی لە ئەنفال كەمتر نییە.
الشرقية: ئایا لەگوشارەكانیاندا سەركەوتن؟
سه‌رۆكی هه‌رێمی كوردستان : تا ئێستا سەرنەكەوتوون.
الشرقية: مەترسیتان لەوەدا هەیە لە ئایندەدا بەغدا لەو گوشارانەیدا سەربكەوێت؟
سه‌رۆكی هه‌رێمی كوردستان : ئەگەر مەسەلەكە گەیشتە ئەو ئاستە ئەنجامەكان زۆر مەترسیدار دەبن.
الشرقية: لەوتارەكەتاندا گوتتان ئێراق بەرەو هەڵدێر دەچێت، هۆكارەكەی چییە؟ ئایا بەهەڵە داڕشتنەوەی پرۆسەی سیاسییە؟ یانیش تاكڕەوی و قۆرخكردنی موڵك و سامانی ئێراقە لەلایەن كەسێك یان لایەنێكی دیاریكراوەوە؟
سه‌رۆكی هه‌رێمی كوردستان : بۆ بۆچوونی من هەڵەكە لە بونیادنانەوەی پرۆسەی سیاسیدا نییە، بەڵێ كەموكوڕی هەیە، بەڵام بنەماكان تاڕادەیەكی زۆر ڕاستن، هەڵە گەورەكە لێردا ڕێگەدانە بە كەسانێك بۆ ئەوەی كەسانێك دەسەڵات قۆرخ بكەن و بارودۆخ وەكو خۆی بمێنێتەوە.
الشرقية: هەروەها باسی ئەوەتان كرد سوپایەك هەیە وەلای بۆ یەك تاكە كەس هەیە، بەڵام سوپاسالار كەسایەتییەكی ناسراوی كوردە، ئایا دەسەڵاتی بلۆككراوە؟
سه‌رۆكی هه‌رێمی كوردستان : سوپاسالار لە هەموو دەسەڵاتەكانی بێبەشكراوە و وجوودی زیادە لەو پێگەیەدا، بەپێی دەستوور و ڕێككەوتنەكان قەبارەی سووپا دەبێ دیار بێت و سەركردەی فیرقەكان بەڕەزامەندیی ئەنجوومەنی نوێنەران دادەمەزرێن، لە ئەنجوومەن بپرسن بە سەرۆك و ئەندامەوە كێ ئاوا دامەزرێنراوە نەك تەنها بە ڕەزامەندی، بەڵكو تەنها وەكو ئاگاداركردنەوە؟ كەواتە كارەكە سەرتاپای لادانە لەدەستوور، لەلایەكەوە باسی پابەندبوون بە دەستوور دەكەن و لەلایەكی دیكەشەوە پێشێلی دەكەن. سوپای ئێراق وەكو نەوت و غاز وایە موڵكی هەموو ئێراقە و دەبێ بەبنەمای ڕاستەقینەی نیشتیمانییەوە و بەكولتوورێكی تازەی نیشتیمانییەوە بونیادبنرێت بە بەرگریكردن لە نیشتیمان و نابێ تێكەڵی پرسە نێوخۆییەكان بكرێت، ئێستا سوپا لەسەر بنەمای وەلا بۆ یەك كەس بونیاد دەنرێتەوە ئەمەش كارەساتە.
الشرقية: هیچ ڕێژەیەكتان هەیە وەكو دوا ڕێژە لەبارەی نوێنەرایەتی و وجوودی كورد لەسوپای ئێراقیدا؟
سه‌رۆكی هه‌رێمی كوردستان : ڕێژەكە بەردەوام لە كەمبووندایە و بەپێی زانیارییەكانم لەماوەی دواییدا گەیشتە كەمتر لە%8 و بۆ زانیاریشتان لەبەرایی دروستبوونەوەی سوپای ئێراق هەموو لایەنەكان خۆیان لەبەشداریكردن لەو سوپایەدا دەدزییەوە و ئەم سوپایە بە3 لیوای پێشمەرگەوە دامەزرایەوە وەكو سەرەتایەك بۆ دروستبوونی سوپای ئێراق و دوای ئەوەی بارودۆخی تاڕادەیەكی زۆر سەقامگیر بویەوە دەستیان بە دژایەتیكردنی كورد وئەفسەرانی كورد كرد وئێستاش لە وانەیە ژمارەیەكی زۆر كەمی كورد لەو سوپایەدا مابنەوە ئەوانیش هەمیشە دژایەتییان دەكرێت.
الشرقية: مەترسیی ئەوەتان هەیە ئەو هێزە ڕۆژێك شەڕتان لەگەڵ بكاتەوە؟
سه‌رۆكی هه‌رێمی كوردستان : بەو كولتوورەی دەیبینم و بەو لێدوانانەی لە هەندێ كەسدا گوێم لێی دەبێ دەڵێم بەڵێ ئەگەر لە توانایاندا بێت لەوانەیە لە دژی كورد و كەسانی دیكەش هێز بەكاردێنن نەوەكو تەنها كورد، من مەبەستم ئەوەیە پێویستە سوپا لە ژێر چاودێریی پەرلەمان بێت و هەموو گەلی ئێراقیش تیایدا بەشدار بێت و ببێتە سوپای ئێراق نەوەكو سوپای یەك كەس یان یەك حزب.
الشرقية: بەڵام جەنابی سەرۆك ئەو شتانە هەموویان لەبەرچاوتاندا ڕوویاندا؟
سه‌رۆكی هه‌رێمی كوردستان : من چەندین ساڵە داوای چارەسەریی بارودۆخەكە دەكەم، هەرچەندە پرۆژەیەك یان پێشنیارێك پێشكەش بكەین بەڵێنی زۆرمان پێدەدرێت كە دوای 3- 4 مانگ جێبەجێبكرێت، دواتر لەیاد دەكرێت یانیش ڕووداوێك وەكو لووتكەی عەرەبی ڕوودەدات و دەڵێن با ئەو كۆنگرەیە تەواو بێت ئنجا باسی لێوە دەكەین، بەوشێوەیە بارودۆخیان بەرەو ئەوەی ئەمڕۆ دەیبینین ڕاكێشا، ئەگینا من لەمێژەوە هۆشداریم لەمبارەیەوە داوە.
الشرقية: كەواتە ئێستا بارودۆخ ئاڵۆزە؟
سه‌رۆكی هه‌رێمی كوردستان : بارودۆخ گەیشتۆتە ئاقارێكی ترسناك و من داوام لەسەركردە سیاسییەكانی ئێراق كرد بەپەلە كۆببنەوە و بارودۆخەكە چارەسەربكەن، چونكە هیچ كەسێك تەحەممولی ئەو بارودۆخە ناكات.
الشرقية: بەبۆچوونی ئێوە كێ كلیلی چارەسەریی لەلایە؟ كێ دەتوانێ گۆڕانكاری دروستبكات؟
سه‌رۆكی هه‌رێمی كوردستان : هەمووان، پێویستە هەمووان لەو پرسەدا بەشداربن و كلیلی چارەسەری بەدەستی تەنها كەسێكەوە نییە ئەمەش پێویستیی بەكاری هاوبەش هەیە.
الشرقية: كاردانەوەكانت چۆن بینی بۆ بانگەوازەكەتان؟
سه‌رۆكی هه‌رێمی كوردستان : جارێ هیچ شتێك دیار نییە، چونكە هەموو لایەك چاوی لە كۆنگرەی وڵاتانی عەرەبییە.
الشرقية: هەر لە وتارەكەتاندا ئاماژەتان بە گۆڕینی هاوپەیمانییەكان كرد و ناوی مەجلیسی ئەعلا و تەییاری سەدریتان هێنا وگوتتان ئەوانە لەگەڵ ئێمەدان؟
سه‌رۆكی هه‌رێمی كوردستان : باڕاشكاو بم، من گوتم كەسانێك هەن دەیانەوێ ئەوە وێنا بكەن كە ئێمە لەدژی شیعەین، من بەهیچ شێوەیەك لە دژی شیعە نیم بە پێچەوانەوە هاوپەیمانی ئەوانم و ڕێز لە خەبات و قوربانیدانیان دەگرم و هیچ كەسێكیش بۆی نییە لە دژی ئەو پەیوەندییەدا كاربكات، من گوتم ئەو شیعانەی دەیانناسم كە لەگەڵ كورد دا وەستان لایەنگر و موریدانی ئیمامی حەكیم وهەردوو ئیمام سەدری شەهید من نەمگوت مەجلیسی ئەعلا یان تەیاری سەدری، لەوانەیە لە مەجلیسی ئەعلا و لە تەییاری سەدری كەسانێك هەبن لەگەڵ ئێمە بن كەسانێكیش نا. بۆ من زۆر سەیرە كەسانێك ئەمڕۆ بەناوی شیعەوە حوكم دەكەن و دژایەتیی كورد دەكەن و كورد لە خانەی دوژمنایەتی لەگەڵ شیعەدا دادەنێین، بێگومانیش لەوەدا سەرناكەون.
الشرقية: دەرچوون لەو قەیرانە گۆڕینی سەرتاپای پرۆسەی سیاسییە یاخود گرتنی لایەنێكی دیكەیە كە ئێوەی كورد خۆتانی تیا بەدوور بزانن؟
سه‌رۆكی هه‌رێمی كوردستان : با ڕاشكاو بم لەگەڵتان، خەیاری ئێمە چارەسەریی بارودۆخ و گەڕاندنەوەی پرۆسەی سیاسییە بۆ ڕێڕەوی ئاسایی خۆی، بەڵام بارودۆخی ئێستا بەهیچ شێوەیەك نەویستراوە، ئەمەش بەرپەرسیارێتیی هەموو سەركردەكانی ئێراقە ئەگەر بەجیددی كاریان بۆ چارەسەركردنی بارودۆخەكە كرد ئەوكاتە دەگەینە هەڵبژاردەی ڕاست وپێچەوانەكەشی زۆر سەختە.
الشرقية: هەنگاوی ئێوە چی دەبێت ئەگەر پێچەوانەكەی بوو؟
سه‌رۆكی هه‌رێمی كوردستان : بۆ گەلی كورد دەگەڕێمەوە و دەڵێم ئەوەیە بارودۆخ و بڕیاری خۆتان بدەن.
الشرقية: هیواتان لەلایەنە سیاسییەكانی دیكەدا نەبڕیوە؟
سه‌رۆكی هه‌رێمی كوردستان : نەخێر، بەڵكو كاری زۆریش دەكەین لەگەڵ لایەنی دیكە بۆ چارەسەركردنی بارودۆخ.
الشرقية: هەر لەبارەی هەنگاوی ئایندەتان ئایا ئێوە متمانە لە حكوومەت وەردەگرنەوە؟
سه‌رۆكی هه‌رێمی كوردستان : لەهەموو شتێك گرنگتر جێبەجێكردنی ئەو ڕێككەوتنانەیە كە ڕەزامەندیمان لەسەریان داوە، ئەمە جگە لەپابەندبوون بەدەستوور واتا پابەندبوونێكی عەمەلی نەوەكو تەنها بەقسە، دانانی پەیڕەوێكی ناوخۆ بۆ ئەنجوومەنی وەزیران و گەڕاندنەوەی هاوسەنگی بۆ دامو دەزگای دەوڵەت و نەبوونی تاكڕەوی بۆ بڕیاردان، شەراكەت لە حكوومەت هەر ئەوە نییە وەزیرێكت لە حكوومەت هەبێت وەكو كارتۆن لە سەر كورسی دانیشتبێ، شەراكەت واتا هاوبەشی لە بڕیار، پابەندبوون بەدەستوور، گەڕاندنەوەی هاوسەنگی بۆ دامودەزگای دەوڵەت و چارەسەركردنی گرفتەكانی نێوان هەرێم و ناوەند، ئەگەر ئەو گرفتانە چارەسەر بوو من هیچ گرفتێكی شەخسیم لەگەڵ هیچ كەسێكدا نییە، بەڵام ئەگەر تاكڕەوی لە بڕیاردان و قۆرخكردنی داهاتی دەوڵەت و دەستبەسەرداگرتنی لەلایەن كەسێكی دیاریكراوەوە ئەوە بۆ ئێمە قابیلی قبووڵ نییە و واتای گەڕانەوەیە بۆ دیكتاتۆرییەت كە بەهیچ شێوەیەك گەلی كورد قبووڵ ناكات لەحوكمێكی دیكتاتۆریدا بژیت.
كاتێكی دیاریكراو دادەنێن لەمبارەیەوە؟
سه‌رۆكی هه‌رێمی كوردستان : ئێستا ئێمە لەبەرایی كاركردن داین لەبەرایی ڕاوێژكردن لەگەڵ لایەنەكانی دیكە و بێگومان كات كراوە نییە ئەمجارە پێویستە هەموو هەنگاوەكان دیار و بەرچاو بن و مومكین نییە تەنها بە قبووڵكردن بە بەڵێن ڕازی بین، بەڵێنی بێ ئەنجام.
الشرقية: زۆر كەس هەن پێیانوایە ئێوە لە هەرێمی كوردستاندا بە ئارەزووی خۆتان ڕەفتار دەكەن كەواتە بۆ ناڕەزایی لەبڕیارەكانی ناوەند نیشاندەدەن؟ هەروه‌ها ئەوەش دەڵێن كە خاڵی ناڕوون لەدەستووردا هەن وایان كردووە ئێوە بە ئارەزووی خۆتان كۆنتڕۆڵی هەرێمی كوردستان بكەن؟
سه‌رۆكی هه‌رێمی كوردستان : دەبێ بەر لە هەموو شتێك پێناسەی ئێراق بۆ هەموو كەسێك دیار و بەرچاو بێت، ئێراق لە دوو نەتەوەی سەرەكی پێكهاتووە نەتەوەی عەرەب و نەتەوەی كورد، كوردستان پارێزگایەك نییە، كوردستان بەخاك و گەلەوە تەواوكەری ئێراقە پارێزگایەك نییە سەر بە وەزیری ناوخۆ یان سەرۆك وەزیران بێت، دواتر ئەوەی لە كوردستاندا هەیە لە ئەنجامی خەبات و قوربانیدانی سەدەها هەزار كەس بووە و مننەت نییە لەهیچ كەسێكەوە، گەلی كورد خۆی یەكبوونی ئارەزوومەندانەی لەگەڵ برایانی عەرەبی لە ئێراقدا هەڵبژارد پێویستە كورد بەو بنەمایە مامەڵەیان لەگەڵدا بكرێت، ئێمە لە كوردستاندا پەرلەمانمان هەیە، ئۆپۆزیسیۆنمان هەیە و هەموو شتێكیش دیار و بەرچاوە و شەفافانە مامەڵەی لەگەڵدا دەكرێت و كەسانێك هەن بەرهەڵستی دەكەن و حكوومەتیش كاری خۆی دەكات، ئێمە بەشایەدیی زیاتر لە100 ڕێكخراوی بیانی هەڵبژاردنێكی سەركەوتوومان بەڕێوەبرد، من ئیدیعای ئەوە ناكەم ئێمە (مەسەلی ئەعلاین)، بەڵام شانازیش بەو دەستكەوتانەوە دەكەین كە لەكوردستاندا بەدەستمان هێناوە بەتایبەتی لە ڕووی خزمەتگوزاری و ئاسایش و سەقامگیری، ئێمە ناڵێین ئەوەی كوردستان و ئەوەی بەغداش هی ئێمەیە، ئەگەر ئێمە بەشێك بین لەئێراق بەغداو حكوومەتی فیدراڵ هی هەمووانە، بەڵام ئێمە داوای بەشی هیچ هەرێمێكی دیكە ناكەین ئەگەر لە ئایندەدا لە ئێراق دروستبوو، ئەوەی هاتەدی بەپێی دەستوور بوو، بەپێی خەباتی ئەو گەلە و ناكرێ كوردستان بە پارێزگایەكی دیكەی ئێراقیدا بەراورد بكرێت و قبووڵیش ناكەین گەلی كورد لەسەر بنەمای چەند كەسانێك لەپارێزگایەكی سەر بە ناوەند مامەڵەیان لەگەڵدا بكرێت.
الشرقية: كەواتە ئەوەی لە بەغدا دەكرێت ڕەفتاری حزبێكی دیاریكراو یان لایەنێكە نەوەكو ڕەفتاری بەغدا بەگشتی؟
سه‌رۆكی هه‌رێمی كوردستان : حكوومەت بۆ كەسانێكی دیاریكراو جێهێشتراوە بۆ دەستبەسەرداگرتنی هەموو دامو دەزگاكانی دەوڵەت و خەڵكانی دیكەش وەكو تەماشاچی وەستاون، من تێناگەم ئەمە بۆ؟ هاوبەندیی نیشتیمانی، ئێراقییە، هاوپەیمانیی كوردستان، هەموو لیستەكان بێدەنگن و هەموو لایەكیش ئەم ڕاستییە دەزانن.
الشرقية: جەنابی سەرۆك ئاماژەتان بەهەوڵی وا كرد كە دەیانەوێ هەڵوێستی ئێوە بشێوێنن و لەم دەرفەتەشدا. مسعود بارزانی ئێراق بە قەیرانەكانی خۆیەوە بەجێبهێڵێت و سەربەخۆیی بۆ هەرێمی كوردستان ڕابگەیەنێت؟
سه‌رۆكی هه‌رێمی كوردستان : دوای شەڕی یەكەمی جیهان كاتێك كورد لەو بەشەی كوردستاندا واتا كوردستانی ئێراق لە مافی خۆی بێبەشكرا بە ڕیفڕاندۆم بۆ بڕیاردانی چارەنووسی دوو هەڵبژاردەی پێدرا بەوەی یان ببێتە بەشێك لە ئێراق یانیش بەشێك لە توركیا، گەلی كورد ژیانی ئارەزوومەندانەی لەگەڵ عەرەب هەڵبژارد، لەشۆڕشی مەزنی ئەیلوولی1961 دروشمی مەركەزیی شۆڕش: دیموكراسییەت بۆ ئێراق، ئۆتۆنۆمی بۆ كوردستان بوو، كوردستان هەمیشە ماڵێك بووە بۆ شۆڕشگێڕ و خەباتگێڕانی ئێراق كە هەركاتێك تووشی ڕاوەدوونان یان دەستگیركردن ببنەوە، دوای ڕووخانی ڕژێم من و فەخامەتی سەرۆك مام جەلال چووینە بەغدا و هەموو تواناكانی خۆمان خستە بەردەم بەغدا و گوتمان ئێمە و ئەزموونی كوردستان لە خزمەتی ئێوەداین كە لەهەموو بەشەكانی ئێراقدا پەیڕەو بكرێت و ئێراقێكی تازە بونیاد بنێینەوە، پەرلەمانی كوردستان خۆی یەكێتیی ئارەزوومەندانەی لەگەڵ برایانی عەرەبی لە ئێراقدا هەڵبژارد، كەواتە چ لە ئێمە پێویستە لەوە زیاتر؟ لەڕاپەڕینی ساڵی1991 دوو فەیلەقی سوپای ئێراق هەمان ئەو كەسانەی پرۆسەكانی ئەنفال و وێرانكردنی كوردستانیان جێبەجێ كردبوو خۆیان بۆ كورد بەدەستەوەدا و ئێمە ڕێزمان لێیان گرت و ئەوان بەوپەڕی ڕێزەوە بۆ كەسوكاریان گەڕانەوە، ئێمە سەلماندمان كە برای بەوەفاین بۆ گەلی عەرەب، بەڵام بەڕاشكاوییەوە دەیڵێم: ئێمە لەسیستەمێكی دیموكراسیدا دەژین لەگەڵ برایانمان و پاڵپشتیی برایانی عەرەبیشمان دەكەین بۆ ئەوەی دیكتاتۆرێكی دیكە حوكمیان نەكات و ئەگەر ئەوانیش بە حوكمی دیكتاتۆرێك ڕازی بوون ئێمە ڕازی نابین، ئەگەر ئامادەیی هەبوو بۆ هەبوونی ئێراقێكی دیموكراتی دەبێ یەكبوونی ئێراق بپارێزین، بەڵام ئەگەر حكوومەتی دیكتاتۆری ویسترا ئێمە نابینە بەشێك لێی. هەر لە وتارەكەتاندا گوتتان ئەو مژدەیەی كورد چاوەڕوانییەتی لە كاتێكی دیكە و سەردەمێی دیكەدا ڕادەگەیەنرێت، بەڵام هەر دەبێ ئەو ڕۆژە بێت؟ سه‌رۆكی هه‌رێمی كوردستان : من ئێستاش وا دەڵێم ئێمە نەتەوەیەكین وەكو هەر نەتەوەیەكی ناوچەكە، لەنەتەوەی عەرەب و فارس وتورك و هیچ نەتەوەیەكی دیكە كەمتر نین، نەتەوەی عەرەب بۆ چەند دەوڵەتێك دابەشكرا، كوردستانیش لە نێوان چەند دەوڵەتێك دابەشكرا و ڕێگەیان نەدا دەوڵەتی كوردی دابمەزرێنین، ئەو دابەشكارییە زۆر ناوازەیە و نابێ بەردەوام بێت، هیچ یەكگرتنێكی بەزۆر و هیچ دابەشكارییەكی بەزۆر بەردەوان نابێت بەنموونەی هەردوو ئەزموونی ئەڵمانیا و چیكۆسلۆڤاكیا،ئەڵمانیا بەزۆر دابەشكرا ودوای40 ساڵ دیسان یەكیگرتەوە، چیك وسلۆڤاك بەزۆر بەیەكەوە لكێنران و دوای40 ساڵ جیا بوونەوە، نەتەوەی كوردیش ڕۆژێك دەبێ یەكبگرێتەوە و دەرفەتی ئەوەی هەبێت بڕیار لە چارەنووسی خۆی بدات، بەڵام من هانی توندوتیژی نادەم وپێموانییە ئەم مافە بە چەك و بە توندوتیژییەوە بێتەدی، بەڵام دەبێ هەموو لایەك دا بەم ڕاستییەدا بنێت، ئێمە غەدرێكی گەورەی مێژووییمان لێكرا و دەبێ ئەو گەلە ئینساف بكرێ، من ئێستاش دەڵێم ئەو موژدەیە هەر دەبێ ڕابگەیەنرێ جا نازانم لە ژیانی مندا دەبێ یانیش لە ژیانی نەوەكانی دیكەی دوای من، ئەمە ڕاستییەكە نابێ ئینكاری لێبكرێت.
الشرقية: بەڵام ئەو هەنگاوە هاوپەیمانانی ئێوە ئیحراج ناكات؟
سه‌رۆكی هه‌رێمی كوردستان : ئەوەی لەدژی ئەم مافە ڕەوایەی ئوممەی كوردی بوەستێ هاوپەیمانی ئێمە نییە، من بەهاوپەیمانی نازانم ئەمە مافێكی ئاساییە وهاودژانی ئەو مافە یەك خاڵی شەراكەت لەگەڵیاندا كۆمان ناكاتەوە، ئەگەر نەتەوەی كورد دەرفەتی خۆی بۆ بڕیاردانی چارەنووسی خۆی وەرگرت پێویستە هاوپەیمانانی ئەو گەل و نەتەوەیە لەدژی نەوەستن.
الشرقية: لەبارەی پرسی تاریق هاشمیی جێگری سەرۆك كۆمارەوە، ئایا ئێوە لە میوانداریكردنی پەشیمانن؟
سه‌رۆكی هه‌رێمی كوردستان : من گوتم كوردستان هەمیشە شوێنێكە بۆ لەباوەشگرتنی هەر كەسێك تووشی ڕاوەدوونان ببێتەوە، من دەمەوی بەوردی ئەم پرسە ڕوونبكەمەوە، بەڕێز تارق هاشمی جێگری سەرۆك كۆمارە و نوێنەرایەتیی لیستێك دەكات كە هاوبەشی حوكمە، ئەمە جگە لەنوێنەرایەتیی تایفەكەی خۆی، ئەگەر ئەو بەڕاستی تا ئەو ئاستە تاوانبارە لەبەرچی ڕێگەی پێدرا بەغدا جێبهێڵێت، دواتر ئەو لەلایەن سەرۆك كۆمارەوە داوەتكراوە بۆ كۆبوونەوە و من نە دوور نە نزیك پەیوەندیم بەو پرسەوە نەبووە، من پاسەوانەكانی بێتاوان ناكەم لەوانەیە كەسانێك هەبن لەنێو تاقمی پاسەوانانی لەكاری نابەجێدا دەستیان هەبووبێت، من پێموابوو ئەگەر تەنانەت خۆیشی زانیاریی لەبارەی ئەو پرسەدا هەبووبێت پێویستە هەرسێ سەرۆكایەتی كۆببێتەوە و بڕیارێك بدات، بەڵام ئەو تاوانبارە و بەئازادیی خۆی لەبەغدا دێتە دەر و لەگەڵ سەرۆك كۆمار بەیاوەریی جێگرەكەی دیكەی كۆ دەبێتەوە، بۆ هەموویان بەجێیان هێشت و ئەركی دەستگیركردنیان خستە سەرشانی منەوە؟ من مەحاڵە ئەم كارە بكەم، چونكە پرسەكە لای من نەبوو، بەڵام كە مەسەلەكە گەیشتە ئەو ڕادەیە نەخێر من پەشیمان نیم و دووبارەی دەكەمەوە پێویستە دەزگایەكی بێ لایەنی دادوەری ئەم بڕیارە بدات.
الشرقية: كەواتە دادوەریی ئەمڕۆی ئێراق (نەزیه) نییە؟
سه‌رۆكی هه‌رێمی كوردستان : ئەوەی بینیمان هەر كەسێكی تاوانبار بە هەق یان بە ناهەق وەلای خۆی بۆ سەركردەی گشتیی هێزی چەكدار نیشانبدات دەبێتە كەسێكی بێتاوان وتێكۆشەر، كەسێكی بێتاوانیش بە یەك نووكە قەڵەم و بەفەرمانی قائیدی ئەعلا دەكرێتە تاوانبار و بكوژ بۆیە بەڕاستی هیچ متمانەم بەو دەزگایە نەماوە.
الشرقية: زانیاریی وا هەن گوایە هەوڵدەدرا ئێوە بەرەو گرفتێكی گەورەتر ڕابكێشرین بەوەی هاشمی سەفەری دەرەوەی وڵاتی پێبكرێت؟
سه‌رۆكی هه‌رێمی كوردستان : من نامەوێ بچمە نێو وردەكاریی زیاترەوە، بەڵام بەڵێ هەواڵێكی وامان پێگەیشت كە زۆر باشە ڕێگە بدرێ هاشمی بەرەو دەرەوەی وڵات ڕابكات بۆ ئەوەی لەو گرفتە ڕزگارمان ببێت، ئەمەش بەڕاستی زۆر ئیستیفزازی كردم و بەئیهانەیەكی گەورەم زانی، ئەگەر ئەو تاوانبارە بۆ هێشتیان لە بەغدا ڕابكات، هەندێ وای بۆ دەچن من بكوژی شیعەم داڵدە داوە، نەخێر من كەسی وا داڵدە نادەم و من وای نازانم و هیچ بڕوایەكم بەو لێكۆڵینەوەیە نییە كە كرا با هەرسێ سەرۆكایەتی لەگەڵ سەرۆكی لیستی ئێراقییە كۆببنەوە و بڕیار بدەن ئایا تاوانبارە بابیبەن، بێتاوانە با ڕێگەی پێبدرێت بچێتە دەرەوە، من دووپاتیدەكەمەوە لای من بە قەناعەتێكی ڕەهاوە ئەو ڕایە دروستبووە كە دەزگای دادوەری بەهیچ شێوەیەك سەربەخۆ نییە، بەڵكو لەژێر كاریگەریی سەركردەی گشتیی هێزی چەكدارە.
الشرقية: ڕێگە دەدەن سەفەر بكات ئەگەر ویستی؟
سه‌رۆكی هه‌رێمی كوردستان : ئەگەر بەشێوەیەكی ئاشكرا بوو خۆی ئازادە، بەڵام ڕێگەی ڕاكردنی بۆ خۆش ناكەین ئەو تا ئێستا جێگری سەرۆكی كۆمارە و بەڕاستی ئەوە گرفتی من نییە.
الشرقية: بەڵام ڕەوشت و پەروەردەتان ڕێگەتان پێنادات ڕادەستی بكەنەوە؟
سه‌رۆكی هه‌رێمی كوردستان : ڕاستە، چونكە من قەناعەتم بەوە هەیە پرسەكە بەسیاسیكراوە، ئەوان جەخت لەسەر سەربەخۆیی قەزا دەكەنەوە دە ئەوەش قەزا و لەڕاستیدا بكوژانی شیعە هەموویان لە دەورووبەری نووسینگەی سەركردەی گشتیی هێزی چەكدارن.
الشرقية: ئەم قسەیە مەترسیدارە جەنابی سەرۆك؟
سه‌رۆكی هه‌رێمی كوردستان : بەڵێ ڕاستە مەترسیدارە، بەڵام دووپاتی لەسەر دەكەمەوە.
الشرقية: هیچ دیدێكی دیكەتان بۆ هاوپەیمانییەكانی ئایندە هەیە؟ ئێوە تەواو لە دژی ڕێبازی لیستی دەوڵەتی یاسان ،دەوڵەتی یاساش بەشێكە لە هاوبەندیی نیشتیمانی كە ئێوەش لەگەڵیدا هاوپەیمانن، ئایا مەسەلەكە ئاڵۆز نییە؟
سه‌رۆكی هه‌رێمی كوردستان : بەڵێ ئاڵۆزە، بەڵام دەوڵەتی یاسا نوێنەرایەتیی هاوبەندیی نیشتیمانی ناكات، بەڵكو ڕێكخستنێكە لەو هاوبەندییەدا، ئێمە بە هاوپەیمانیمان لەگەڵ هاوبەندیی نیشتیمانی پابەندین و برایانی شیعە بە هاوپەیمانی ڕاستەقینە دەزانین و هاوپەیمانیشمان لە لیستی ئێراقییەدا هەیە ئەگەر لەگەڵ هەموو لیستەكەشدا هاوپەیمان نەبین، من پێموایە هاوپەیمانیی نوێ لەنێوان ئەو هێزانە دەبێت كە بڕواییان بەدیموكراسییەت هەیە.
الشرقية: هاوپەیمانیی تازە لەڕێدان؟
سه‌رۆكی هه‌رێمی كوردستان : لەوانەیە، ئەوانەی بڕوایان بەدیموكراسییەت هەیە لە شیعە و لە كورد و سوننە كە بەرامبەر قبووڵ دەكات و باوەڕی بە شەراكەتەوە هەیە لەسەر بنەمایەكی نیشتیمانی هاوپەیمانی دەبەستین.
الشرقية: هیچ بیرۆكەیەكتان لەلا گەڵاڵە نەبووە لەمبارەیەوە؟
سه‌رۆكی هه‌رێمی كوردستان : نەخێر جاری زووە بۆ ئەم مەسەلەیە.
الشرقية: جەنابی سەرۆك بارودۆخی سووریا زۆر نالەبارە، دەگوترێ كورد بەبێلایەنی وەستاوە، ئێستاش دەرفەتە بۆ كورد بۆ ئەوەی هەڵوێستی مێژوویی لەمبارەیەوە هەبێت، دەتوانن هەڵوێستی خۆتانمان بۆ ڕوون بكەنەوە كە ئایا ئامۆژگاریكارە یان پاڵپشتیكار؟
سه‌رۆكی هه‌رێمی كوردستان : كورد تەنانەت لەمافی هاووڵاتیبوونیشی بێبەشە لەسووریا چ لەلایەنی حكوومەت یانیش ئۆپۆزیسیۆن، بۆیە بۆ هەموومان گرنگە دان بەمافیان بنرێت ئەگەر حكوومەت ئەو كارەی كرد هیچ گرفتێكمان لەگەڵ حكوومەتدا نابێت ، بەڵام ئەگەر هەردوولا ئەوەی نەكرد لەگەڵ كێ هاوكار بن؟ولەسەر چ بنەمایەك؟ بەڵام پرسی سووریا بۆ ئێمە گرنگە و گۆڕانكاریش لەم وڵاتەدا ئەركی گەلی سووریایە و هەموو هەوڵێكیش بۆ یارمەتیدانی برایانی كوردمان لە سووریا دەدەین و دەبێ ئەوانیش واز لە ڕۆڵی خۆیان نەهێنن وهەوڵی دیاڵۆگ بدەن لەگەڵ ئۆپۆزیسیۆن بۆ داننان بە مافیان، ئەگەر گەیشتنە ڕێككەوتن لەگەڵ حكوومەت یان ئۆپۆزیسیۆن خۆیان بڕیاری لێوە دەدەن و ئێمە هیچیان لەسەر فەرز ناكەین، بەڵام پێموایە ڕێككەوتن لەگەڵ حكوومەت دوای ئەم خوێنڕشتنە بوو بەشتێكی زۆر زەحمەت.
