^{گۆڤاری ( چركە ), ژمارە 99 , ئەمڕۆ سێشەممە 20 / 8 / 2013} 

^{دیمانە: گۆران شاخەوان
بۆ قسەكردن لەسەر ئەدای كاركردنی لیژنەی ئامادەكاری كۆنگرەی نەتەوەی كورد و ئامانج لە بەستنی كۆنگرە، هەروەها ڕۆلی ئۆپۆزسیۆن لەسەر بەستنی كۆنگرەی نەتەوەیی و، قسەكردن لەسەر چۆنیەتی ئیشی ئەو كۆمسیۆنانەی كە لەلایەن لێژنەی ئامادەكاری كۆنگرە پێكهێنراون و, چوونی شاندێكی لێژنەی ئامادەكاری كۆنگرە بۆ ڕۆژئاوای كوردستان، چركە گفتوگۆیەكی تایبەتی لەگەڵ غەفوور مەخمووری ئەندامی لێژنەی ئامادەكاری كۆنگرەیی نەتەوەیی و، سكرتێری گشتیی یەكێتی نەتەوەیی دیموكراتی كوردستان YNDK سازكرد.}

^{چركە: ئایا بە بۆچوونی بەڕێزتان كۆنگرەی نەتەوەی دەبێتە چارەسەر بۆ گشت كێشەكانی نەتەوەی كورد؟
غەفوور مەخمووری: سەبارەت بە بەستنی كۆنگرەی نەتەوەی كورد لەم كاتەدا گرنگیەكی تایبەتی خۆی هەیە، بە باوەڕی ئێمە دەبێتە هۆی كۆكردنەوەی تواناكانی كورد لەسەر ئاستی نەتەوەی و نشتیمانی و، هەوڵێكە بۆ یەكخستنی گووتاری سیاسی كوردستانی لەم قۆناغەدا، ناوچەی ڕۆژهەڵاتی ناوەڕاست لەبەردەم كۆمەڵێ‌ ئەگەر و پێشهات و گۆڕانكاری گەورە دایە، پێویستە لەم كاتەدا كوردیش ناو ماڵی خۆی ڕێكبخات لەسەر ئاستی كوردستانی گەورە، بۆ ئەوەی ببێتە ژمارەیەكی بەهێزتر لە ناو هاوكێشە سیاسییەكانی ناوچەكە تا بتوانین بە یەكدەنگی پێشوازی لەم ئەگەر و پێشهات و گۆڕانكارییانەدا بكەین.
بۆیە بە بڕوای من كۆنگرە هەوڵێكە بۆ یەكخستنەوەی كورد, هەروەها بۆ شەقامی كوردیش گرنگە تاكی كورد هەست بەوە دەكات كە سەركردایەتی سیاسی كوردستان هەوڵی دەدات بۆ یەكێتی نەتەوەیی و ئەوەش وا دەكات كەوا لەڕووی دەروونییەوە هەموو ئەو سنوورە دەستكردانەی نێوان بەشەكانی كوردستان تێكبشكێنرێن. 
لە ڕووی روحیەوە ئەمە زۆر گرنگە بۆ كورد بە دڵنیایەوە یەكبوون و یەكێتیمان وا دەكات بەرەو ئایندەیەكی گەش هەنگاوبنێین، بەستنی كۆنگرەی نەتەوەی لە چارەسەری یەكجاری دۆزی گەلی كوردستان نزیكمان دەكاتەوە}

^{.
چركە: ئایا كۆنگرەی نەتەوەی دەبێتە هۆكارێك بۆ بنبركردنی ململانێی سیاسی گشت حیزبە كوردییەكان؟
غەفوور مەخمووری: من باوەڕم وایە كۆنگرەی نەتەوەیی كورد دەبێتە دامەزراوەیەكی نەتەوەی و نشتیمانی وەكو مەرجەعێكی بڕیاری سیاسی كورد تەماشا دەكرێت، هەر كێشەو ململانێیەك لە نێوان لایەنە سیاسییەكان هەبێت لەو سەنتەرەوە گفتوگۆی لەسەر دەكرێت و هەوڵی چارەسەری بۆ دەدرێت. لە ماوەی ڕابردوو كە شەڕی یەكترمان كرد یان ئەو هەموو كێشانەی هەمانبوو لەكۆتایشدا نەگەیشتینە هیچ ئامانجێك و تەنها بەزیانی خۆمان كۆتای پێهات، حەق وایە سوود لە ڕابردوو وەربگرین لە داهاتوودا وەكو كورد بیربكەینەوە جلی تەنگی حیزبایەتی لەبەر خۆمان دابكەنین، لە حیزبایەتی تەنگ زۆر زیانمان كرد با ئیتر كوردایەتی بكەین, با كارێكی وابكەین ئەوەی لەڕێی حزبایەتی تەنگەوە لەدەستماندا با بە كوردایەتی كردن بەدەستی بێنینەوە.}

^{چركە: ئایا بودجەی دارایی كۆنگرەی نەتەوەی كورد لەلایەن كێوە دابینكراوە؟
غەفوور مەخمووری: هەرچی تێچووی كۆنگرەی نەتەوەی كورد هەیە، گشت مەسروفاتەكانی كۆنگرە لەلایەن سەرۆكایەتی كوردستان دابینكراوە.} 

^{چركە: ئایا ڕۆڵی سەرۆكی هەرێمی كوردستان لە كۆنگرەی نەتەوەی كورد چۆن دەبینی؟
غەفوور مەخمووری: بە ڕاستی دەبێت ئەوە لەبەر چاو بگیرێت كە ئەو كۆبوونەوەی لە 22_7_2013 لەسەر داوەتی جەنابیان بوو، پێشووتریش لەم بوارەدا زۆر كاركراوە، بە بۆچوونی من لێرەشدا جەنابیان ڕۆڵێكی باش دەبینێت بۆ یەكخستنەوەی ناو ماڵی كورد، لەسەر هەموو ئاستەكان كاری باشیكردووە، لەماوەی ڕابردوودا لەسەر پرسی كورد لە باكووری كوردستان و ئەو نزیكبوونەوەیەی هەیە جەنابیان رۆڵێكی بەرچاوی هەبوو كە لە ئەنجامدا پڕۆسەی ئاشتی لێوە بەرهەم هات كە ئێستاش بەردەوامە، هەروەها لە ڕۆژئاوای كوردستان ماوەیەكی زۆرە كار لەسەر ئەوە دەكات كە ناكۆكی نێوان لایەنە سیاسییەكان چارەسەر بكات، لەسەر دەستپێشخەری جەنابی بارزانی رێكەوتنامەی هەولێر ئیمزا كرا لە نێوان لایەنە سیاسییەكانی ڕۆژئاوای كوردستان. لە ڕۆژ هەڵاتیش سەرقاڵی ئەوەیە كێشەی نێوان لایەنەكان چارەسەر بكات و لێكیان نزیكبكاتەوە، هەروەها لە باشووری كوردستانیش بەرنامەی تایبەتی خۆی هەیە بۆ رێكخستنەوەی ناو ماڵی كوردستان، بۆیە من بڕوام وایە كە ڕۆڵێكی كاریگەرتر دەبینێت لەناو كۆنگرەی نەتەوەی كورد، پێویستە ئێمەش بەهەموو لایەك پشتیوان و هاوكاری بین, جەنابی سەرۆكی كوردستان وەكو كەسایەتییەك لەسەر ئاستی ناوچەیی و نێودەوڵەتی و لەسەر ئاستی كوردستانیش كەسێكی ناسراو و حیساب بۆكراو و مامەڵە لەگەڵكراوە، بۆیە ڕۆڵێكی كاریگەری دەبێت.}

^{چركە: ئایا لە كوردستان هەموو لایەنە سیاسییەكان وەكو پێویست هاوكاری سەرۆكی هەرێمیان كردووە؟
غەفوور مەخمووری: بەداخەوە حیزب و لایەنە سیاسییەكان وەكو پێویست هاوكار و پشتیوانی جەنابی سەرۆك بارزانی نەبووینە.}

^{چركە: ئایا كەجەكە پابەندی بریارەكانی كۆنگرەی نەتەوەی كورد دەبێت، ئەگەر هاتوو بڕیارەكانی كۆنگرە لە خواستی ئەوان نەبوون؟
غەفوور مەخمووری: ئێمە لە لیژنەی ئامادەكاری كۆنگرەی نەتەوەی تاكو ئێستا وەكو یەك تیم كاردەكەین، هەستم بە هیچ ململانێیەكی حیزبی نەكردووە، لە بەرژەوەندی كۆما جڤاكێن كوردستان KCK یشە كە هاوكار بێت بۆ سەرخستنی كۆنگرەی نەتەوەی كورد، لەبەرئەوەی پەیامی كۆنگرە پەیامێكی ئاشیخوازانەیە، ئێستا ئەوانیش لە پڕۆسەی ئاشتیدان لەگەڵ توركیا، بۆیە پێشبینی ئەوە ناكەم هۆكار بن بۆ دروستبوونی كێشە، لەسەر بڕیارەكانیش لەناو كۆنگرە كە هەموو لایەنە سیاسییەكان بەشدار دەبن، ئێمە قسەمان لەسەر ئەوە كردووە كە ڕەچاوی تایبەتمەندی بەشەكانی دیكەی كوردستان بكرێت، لەبەرئەوەی بەڕەچاوكردنی تایبەتمەندی بەشەكانی دیكەی كوردستان ستراتیژییەتی هاوبەش بۆ بزافی رزگاریخوازی نشتیمانی كوردستان دادەڕێژرێ‌.}

^{چركە: بڕیار وایە لیژنەیەك بنێردرێتە ڕۆژئاوای كوردستان، تا چەند ئەو لیژنەیە دەتوانێت هەموو ڕاستییەكان نیشان بدات؟
غەفوور مەخمووری: ئێمە لە كۆبوونەوەی 12ی مانگ كۆمیسیۆنێكمان پێكهێنا كە سەردانی ڕۆژئاوای كوردستان بكەن، ئەمەش لەسەر داوای جەنابی سەرۆكی كوردستان بوو، داوای كرد كە لیژنەیەك دروستبكەین بۆ ڕۆژئاوای كوردستان بینێرین، بۆ ئەوەی لێكۆڵینەوە لەسەر ڕەوشی سیاسی و ئەو ڕووداوانەی لەوێ‌ ڕوودەدەن بكەنە ڕاپۆرتێك و هەموو ڕاستییەكانی تێدا دەربخەن، ئەو لیژنەیە كە دەچێت بۆ ڕۆژئاوا ڕاپۆرتێكی گشتگیر لەسەر رەوشی ڕۆژئاوای كوردستان دەنووسێ‌، هەموو ئەو ڕووداوانەی ڕوودەدەن چ لە بواری سیاسی یان كۆمەڵایەتی یان هەر بوارێكی دیكە تێیدا ئاماژەی پێ دەكرێ‌، هەروەها چۆنیەتی هاوكاریكردنیشیان تێدا دەنووسرێ‌ كە چۆن دەتوانین هاوكارییان بكەین، ئەم ڕاپۆرتە دەدرێتە لیژنەی ئامادەكاری كۆنگرە، ئێمەش دەیدەینە سەرۆكایەتی كوردستان لە وێشەوە هەڵوێستی پێویست وەردەگرێ‌.}

^{چركە: ئەمەریكا ڕایگەیاند كە سەرۆكی هەرێمی كوردستان نابێت هاوكاری ڕۆژئاوا بكات؟ بیركردنەوەی جەنابت چیە؟}

^{غەفوور مەخمووری: تاكو ئێستا سەرۆك بارزانی نەیگوتوە ئێمە بە چ شێوەیەك تەداخول دەكەین، بەڵكو گوتویەتی ئێمە هەموو توانایەكمان دەخەینە گەڕ بۆ هاوكاریكردنی برایان و خوشكانمان لە ڕۆژئاوای كوردستان, مەرج نیە هاوكاریكردنیش مەسەلەی سەربازی بێت ڕەنگە هاوكاری لە ڕێگەی كۆمەككردن بێت یاخود لە بواری تەندروستی و ناردنی دەرمان و ئامێرەكانی نەشتەرگەری بێت، یاخود هاوكاری لە بواری دیبلۆماسی بێت و, كاربكەین بۆدابینكردنی پاراستنی نێودەوڵەتی بۆ ڕۆژئاوای كوردستان، یان لە ڕووی ناردنی خواردەمەنی یان لایەنی ماددی بۆ تەواو كردنی پرۆژەكانیان.
دوای ئەوەی لیژنەكە گەڕایەوە و ڕاپۆرتەكەمان بەدەست گەیشت پێشكەشی سەرۆكایەتی كوردستان كرا، لەوێوە دیراسەی بۆ دەكرێ‌ تا بزاندرێ‌ لە چ ڕووێكەوە هەڵوێست وەربگیردرێت.}

^{چركە: ئەگەر ئەو لیژنەیەی دەچێتە ڕۆژئاوا ئەنجامەكانی لە بەرژەوەندی پەیەدە نەبوو، ئایا پەیەدە بەمە ڕازی دەبێت؟
غەفوور مەخمووری: حەزدەكەم شتێك راستبكەمەوە، چونكە لە ڕاگەیاندنەكان هەموو شتێك وەكو خۆی باس ناكرێ‌، بەداخەوە لە ڕۆژئاوای كوردستان خەڵكانێك هەن ئیدارەی شەڕ دەكەن و خوێن دەرژێ‌، خەڵك لەو پەڕی زەحمەتی ژیاندان، كەچی كۆمەڵێكیش لێرە لە هوتێلەكان خەوتوون، خەوتووی هوتێلەكانی كوردستانن، خەڵكیش پێشمەرگەی سەنگەرەكانە، ناكرێت بەیەك چاو سەیری هەردوولا بكرێت، باوەڕیش ناكەم كە پارتی یەكێتی دیموكرات PYD ڕێگری لەخەڵك بكات كاری سیاسی نەكات، لایەنێك ئەگەر بنكەیەكی جەماوەری نەبێت و, نەتوانێ‌ دەستبەرداری ئیمتیازاتەكانی خۆی بێت لە كوردستان، لە پشوو بێت و نەتوانێ‌ بچێتەوەو هەموو ئەو نەهامەتی و دەردەسەریانە بچێژێ‌ دەبێت ئەو پروپاگەندانە بكات.
چەندین جار لە كۆبوونەوەكان PYD دەڵێت دەرگا كراوەیە ئەوەی هاتۆتە كوردستان با بگەڕێتەوە و ئەگەر هێزیشیان نیە ئەوا ئێمە پاسەوانیان دەكەین، بەداخەوە ڕاگەیاندنەكانی كوردستان زۆر بێ بەرنامە كاردەكەن و ڕاستیەكان دەشێوێنن. ئەگەر ڕۆژئاوای كوردستان ئازاد بوو چۆن دەبێت بەیەك چاو سەیری ئەوانە بكرێت كە لە سەنگەرەكانی جەنگدا بووینە لە دەردەسەری و زەحمەتی ژیاون لەگەڵ ئەوانەی كە لە هوتێل خەوتوون، چۆن دەبێت بگەڕێنەوە و بڵێن ئێمەش هاوبەشین لەگەڵتان. رێكەوتنامەی هەولێر هەیە لە نێوان ئەنجوومەنی نشتیمانی كورد لە سووریا و ئەنجوومەنی گەلی ڕۆژئاوای كوردستان كە لەسەر دەستی سەرۆك بارزانی واژۆ كراوە ئەمە باشترین نەخشە رێگایە بۆ چارەسەری كێشەكان, بەڵام بەداخەوە تاكو ئێستا كۆبوونەوەیەكیشیان نەكردووە.}

^{چركە: داخستنی سنوور بەسەر خەڵكی ڕۆژئاوای كوردستان بۆتە نیگەرانی زۆربەی هاوڵاتیانی باشوور و ڕۆژئاوای كوردستان. ئایا هەڵوێستی جەنابتان چیە سەبارەت بەم داخستنە؟
غەفوور مەخمووری: گرتنی سنوور هەڵەیەكی زۆر گەورەیە، هەڵەیەكی كوشندەیە كە باشووری كوردستان كردوویەتی، پێویستە ئەم سنوورە بەزووترین كات بكرێتەوە، چونكە نابێت ئێمە ئەو سنوورە دابخەین و بیكەینە كارتێكی فشار لەسەر لایەنە سیاسییەكان تا پێكبێن، داخستنی سنوور دەبێتە هۆی برسیبوونی خەڵك، منداڵی كورد لەوێ‌ بێ‌ شیر دەمێننەوە و لەبرسان دەمرن، نەخۆشخانەكان بێ‌ دەرمان دەبن میللەتەكە بەشێوەیەكی گشتی زەرەرمەند دەبن، من ئەمە بە سیاسەتێكی دروست نازانم، داواكارم بەزووترین كات ئەم سنوورانە بكرێنەوە، داخستنی ئەم سنوورانە تێڕوانینی خوشك و برایانمان لە ڕۆژئاوا بەرامبەر بە باشووری كوردستان دەگۆڕێت و بەشێوەیەكی دیكە سەیرمان دەكەن، نابێت لە بەرژەوەندی لایەنێكی سیاسی میللەتێك برسی بكەین، دەبێت بەهەموو شێوازێك پشتیوان و هاوكاری كوردانی ڕۆژئاوا بین، لەبەرئەوەی لە ڕابردوودا ڕۆژئاوای كوردستان یارمەتی باشووری كوردستانی داوە و بەدەیان كەسیان لە شۆڕشی ئەیلوول و گوڵان شەهیدكراون، چەندانی دیكەیان ئێستا پێشمەرگەن لێرە، ئێستاش ئەڕكێكی نەتەوەیی و نشتیمانییە كە دەستی هاوكارییان بۆ درێژ بكەین، نەك سنووریان بەسەر دابخەین.
هەواڵ هاتووە كە چەندین منداڵ بێ‌ شیر ماونەتەوە و لەبرسان مردوون، هەروەها گشت ئاشەكان وەستاون بەهۆی بێ‌ كارەبایی ناتواندرێت گەنم بكرێتە ئارد، وە بەهۆی نەبوونی ئارد نانەواخانەكان وەستاون ناتوانن نان دروست بكەن.
گرتنی سنوور لەبەرژەوەندی هەندێك بەرپرس دایە كە شەوانە بە قاچاغ بازرگانی لە نێوان باشوور و ڕۆژئاوادا دەكەن، گرتنی سنوور هەندێك كەس دەوڵەمەند دەكات و میللەتێكیش برسی دەكات.}

^{چركە: وەكو هەموو لایەنە سیاسیەكان كێتان پێباشە ببێتە سەرۆكی كۆنگرەی نەتەوەیی كورد؟
غەفوور مەخمووری: بۆ مەسەلەی سەرۆكایەتی كۆنگرەیی نەتەوەیی كورد بە ڕاستی لەم قۆناغەدا كار بۆ ئەوەدەكەین كە سەرۆكی كۆنگرە كەسێك بێت وەكو كەسایەتییەك لەسەر ئاستی ناوچەیی و نێودەوڵەتی و لەسەر ئاستی كوردستانیش كەسێكی ناسراو و حیساب بۆكراو و مامەڵە لەگەڵكراو بێت، بۆ ئەوەی ڕۆڵێكی كاریگەری هەبێت، من وەكو ڕای تایبەتی خۆم لە ئێستادا جگە لە سەرۆك مەسعود بارزانی كەسێكی دیكە بە شایستەی ئەو كارە نابینم.}

^{چركە: ئایا ڕۆڵی ئۆپۆزسیۆن چۆن دەبینی سەبارەت بە پێكهێنانی كۆنگرەی نەتەوەی كورد؟
غەفوور مەخمووری: ئۆپۆزسیۆن هۆكارە بۆ كامل بوونی پرۆسەی بە دیموكراتیزە بوونی هەر كۆمەڵگایەك، بوونی ئۆپۆزسیۆن زۆر گرنگە لەهەر كۆمەڵگەیەكدا، بەڵام پێویستە ئۆپۆزسیۆنێكی تەندروست بێت، ئۆپۆزسیۆنێك بێت كار لەسەر باشتركردنی ڕەوشی سیاسی و ئابووری و كۆمەڵایەتی ئەو كۆمەڵگایە بكات، لەهەمان كاتدا كار بكات لەسەر بەرەوپێشبردنی سیستەمی حوكمرانی لەو كۆمەڵگایەدا لە كوردستان، ئەوەی من دەیبینم ئۆپۆزسیۆن دەستەڵات ڕەت دەكاتەوە و هەروەها بە پێچەوانەوەش دەستەڵاتیش ئۆپۆزسیۆن ڕەتدەكاتەوە، گیانی یەكتر قبوڵكردن لە نێوانیاندا نیە.}

^{چركە:ئایا ئۆپۆزسیۆن ئەو ڕۆڵانەیان بینیوە لە كوردستان؟
غەفوور مەخمووری: لەماوەی ڕابردوو لە كوردستان ئۆپۆزسیۆن توانیویەتی فشارێك لە ڕووی سیاسی دروست بكات، بەڵام بۆ باشتركردنی ڕەوشی كۆمەڵایەتی و ئابووری و سیستەمی ئیداری ئەو كۆمەڵگایە من هەستم بە شتێكی بەرجەستە نەكردووە كە ئۆپۆزسیۆن كردبێتی.}

^{چركە: هەندێك لە نووسەران دەڵێن كۆنگرەی نەتەوەی كورد كۆنگرەی حیزبەكانە نەك نەتەوەی كورد بە شێوەیەكی گشتی، تێڕوانینی جەنابت چیە بۆ ئەمە؟
غەفوور مەخمووری: بەڕاستی تێڕوانینی من ئەوەیە، كە ئێمە وەكو لیژنەی ئامادەكاریی كۆنگرەی نەتەوەیی هەوڵدەدەین كەوا كۆنگرەكە كۆنگرەی نەتەوەیی بێت نەك كۆنگرەی حیزبەكان، بۆ ئەم مەبەستەش كاری باشمان كردووە, ژمارەی بەشداربووان 600 ئەندامن بەم شێوەیە دابەشكراون %45 بۆ حیزب و لایەنە سیاسییەكان، %35 بۆ رێكخراوەكانی كۆمەڵگەی مەدەنی، %10 بۆ گەنجان، %10 بۆ كەسایەتی سەربەخۆیە, هەروەها لەو 600 ئەندامە دەبێت رێژەی ئافرەتان%40 بێت.
ئێمە هەوڵدەدەین گشت چین و توێژەكان بەشداری بكەن، لەبەرئەوەی بەڕاستی نامانەوێ‌ كۆنگرەی حیزبەكان بێت، هەوەها نوێنەری كوردانی ئوردەن و لوبنان و ئاسیای ناوەڕاست و,بەشداردەبن, لە هەر شوێنیك كورد هەیە بانگێشتی كۆنگرەی نەتەوەیی كورد دەكرێت، ئێمە ئامانجمان ئەوەیە ناو ماڵی كورد ڕێكخەینەوە نەك كۆنگرەی حیزبی ببەستین.}

^{چركە: دەگوترێ‌ دوو كورسی لە ڕیزی پێشەوە دەمێنێتەوە و وێنەی مام جەلال و ئۆجەلان ی لەسەر دادەندرێ‌، ئایا ئەمە تا چەند ڕاستە؟ ئەگەر وابكرێت ئەی چیدەكەن بۆ فەلەكەدین كاكەیی و شێركۆ بێكەس؟
غەفوور مەخمووری: تاكو ئێستا لەسەر ئەم بابەتە قسەمان نەكردووە، ئێمە كۆمیسیۆنی مۆدێلی كۆنگرەمان هەیە ئەوان بریار لەسەر ئەو مەسەلانە دەدەن، بەڵام تا ئێستا لەسەر ئەمە قسە نەكراوە.}

^{چركە: زۆرجار دەبیسترێ‌ كە ئێران و توركیا فشاریان هەیە لەسەر حیزبەكان لەناو كۆنگرەی نەتەوەی كورد؟ لێكدانەوەی بەڕێزتان چیە سەبارەت بەم قسەیە؟
غەفوور مەخمووری: هەستمان بە هیچ فشارێكی ئەوتۆ نەكردووە، ئەوەی من تێبینی دەكەم وڵاتانی دەوروبەر دڵخۆش نین بە بەستنی ئەم كۆنگرەیە، چونكە لە بەرژەوەندی ئەوان نیە كە كورد یەكدەنگ بێت، ئەگەر كورد هەموو یەكدەنگ بوو ئەوا بەهێزتر دەبێت، ئەوان لەلای خۆیان وا تەماشا دەكەن كە زیان بە بەرژەوەندی ئەوان دەگەیەنێ‌، ئەوەی من تێبینیم كردووە لە كەناڵە ڕاگەیاندنەكانی توركیا رۆژنامەنووسان زۆر بە گرنگییەوە لە كۆنگرەی نەتەوەی كورد دەڕوانن و چەندین هەواڵ و گوتاریان لەسەر نووسیوە.}

^{چركە: ئەگەر بەشێوەیەكی سەرەكی بەشەكان و ئەدای كاركردنی ئەو بەشانەی پێكتان هێناون بۆ خوێنەرانی شیبكەیتەوە؟
غەفوور مەخمووری: ئێمە هەشت كۆمیسیۆنمان پێكهێناوە، كەوا بەم شێوەیە:
یەكەم: كۆمیسیۆنی پرەنسیپە هاوبەشەكان: ئەو كۆمسیۆنە كاردەكات لەسەر ئەوەی پرەنسیپی هاوبەش لە نێوان پارچەكانی كوردستان و هەروەها لایەنە سیاسییەكان كۆبكاتەوە، هەروەها كاردەكات بۆ ئەوەی پەیمانێكی نەتەوەیی هەبێت كە گشت لایەنە سیاسییەكان ئیمزایان كردبێ‌، تێیدا شەڕی ناوەخۆ واتە كورد كوشتن تەحریم و تەجریم بكرێ‌ و شەڕی كورد كوشتن بە هێلی سوور دابندرێ‌، كاردەكات لەسەر مەسەلەی ئاشتی ناوەخۆیی و دەرەكی، هەروەها دیاركردنی سیمبۆلی نەتەوەیی.
دووەم: كۆمیسیۆنی سیاسی: ئەم كۆمسیۆنە لە پێناوی یەكخستنی گوتاری سیاسی كوردو، داڕشتنی ستراتیژێكی نەتەوەیی هاوبەش بۆ بزاڤی رزگاریخوازی نشتیمانی كوردستان ، بە ڕەچاوكردنی تایبەتمەندی بەشەكانی دیكەی كوردستان كاردەكات.
سێیەم: كۆمیسیۆنی مافی پاراستنی ڕەوا: ئەم كۆمسیۆنە كارەكانی پەیوەستن بە چۆنیەتی بەرگری لەخۆكردنی كورد لەكاتی پێویست و ئەو هەرەشانەی لێیدەكرێ‌, راستە ئێمە پەیامی ئاشتیمان پێیە بۆ ئەو نەتەوانەی لەگەڵیاندا دەژین, ئەگەر قبوڵیشیان نەكرد یا هێرشكرایە سەر نەتەوەكەمان لە هەر سات و كاتێكدا دەبێت مافی خۆپاراستنمان هەبێت، هەروەها كاردەكات لەسەر مەسەلەی پێشمەرگە و زیندانیانی سیاسی و بنەماڵەی شەهیدان و ئەنفالكراوان و كەم ئەندامانی سەنگەر.
چوارەم: كۆمیسیۆنی ئابووری و ژینگە: تێڕوانینێكی ئابوورییانە لەسەر ئابووری كوردستان و، لێكۆڵینەوە لەسەر ژینگەی كوردستان دەكات، چۆن ژینگەی خۆمان بپارێزین و پاكی بكەینەوە لە ئاسەواری شەڕ.
پێنجەم: كۆمیسیۆنی راگەیاندن: ستراتیژییەتی راگەیاندن لەسەر ئاستی نەتەوەیی دادەرێژێ‌ و كار لەسەر ئەوە دەكات چۆن سوود لە راگەیاندن وەربگرین بۆ گەیاندنی پەیامی كورد بە كەناڵە بڕیار بەدەستەكانی جیهان و راگەیاندنەكانی دەرەوە، هەروەها راگەیاندن چۆن دەتوانێ‌ خزمەت بە پرسی رەوای كورد بكات.
شەشەم: كۆمیسیۆنی مۆدێلی كۆنگرە: ئەم بەشە كار لەسەر شێوازی بەستنی كۆنگرە دەكات كە وەكو دامەزراوەیەكی نەتەوەیی بمێنێتەوە دەستەیەك هەڵدەبژێردرێت كە سەرپەرشتی كار و بەدواداچوونی بڕیارو راسپاردەكانی كۆنگرە بكات. 
حەوتەم: كۆمیسۆنی زمان و كلتور و رۆشنبیری و هونەر: ئەم كۆمیسیۆنە لەسەر ئاستی نەتەوەیی كاردەكات بۆ یەكخستنی زمان و رێنووسێكی یەكگرتوو ، هەروەها پاراستن و پێشڤەبردنی كلتور و هونەرو رۆشنبیری نەتەوەیی كوردو ناساندنیان بە نەتەوەكانی دیكەی جیهان .
هەشتەم: كۆمیسیۆنی كۆمەڵگەی ئازاد: لەم بەشەدا كاردەكرێت لەسەر ئاستی نەتەوەیی كە گرنگی بە رۆلی لاوان و ئافرەتان بدرێت، هەروەها چۆن دەتواندرێ‌ كۆمەڵگەیەكی مۆدێرنی مەدەنی بنیات بندرێ‌، هەروەها هەوڵدەدا بەرنامەیەكی سەردەمییانە دابڕێژێت بۆ چارەسەركردنی هەموو ئەو كێشەو ئارێشانەی لەناو هەناوی كۆمەڵگەی كوردستاندا هەن.
بەشێوەیەكی گشتی ئەوە شێوازی كارو خەباتی كۆمسیۆنەكانی لێژنەی ئامادەكاری كۆنگرەی نەتەوەیی كوردە.}

^20/08/2013