به مه‌به‌ستى تیشك خستنه سه‌ر دوایین پێشهات و ئاڵوگۆره‌كانى جیهان و ناوچه‌كه و ئێران و بزووتنه‌وه‌ى حه‌قخوازانه‌ى گه‌لى كورد له كوردستانى ئێران و هه‌روه‌ها ره‌وشى كورده‌كانى ده‌ره‌وه‌ى وه‌لات و خه‌باتى كورد له‌ده‌ره‌وه "تێكۆشان" بلاوكراوه‌ى ره‌سمى سازمانى خه‌بات دیمانه‌یێكى له‌گه‌ڵ به‌رێز كاك بابه‌شێخى حوسێنى سكرتێرى گشتى سازمانى خه‌بات سازداوه كه له ژماره‌ى ٢٤١ى تێكۆشان بلاوكراوه‌ته‌وه. ئه‌وه‌ى خواره‌وه ده‌قى وه‌لامه‌كانى به‌رێزیان به پرسیاره‌كانى تێكۆشانه: پ ـ مه‌یدانى ده‌ره‌وه‌ى كوردستان بۆ بردنه پێشه‌وه‌ى خه‌باتى كورد به برِواى ئێوه تا چ راده‌یێك گرینگه و له كوێى خه‌باته گشتیه‌كه جێ ده‌گرێ؟
و ـ هه‌ر چه‌ند من ماوه‌یێكى زۆر له ده‌ره‌وه‌ى كوردستان و له وه‌لاتانى ئوروپایی نه‌بووم و به‌باشى له هه‌ل و مه‌رجى زاڵ به سه‌ر ئوروپادا و ره‌وه‌ندى كورد ئاگاداریم نیه، به‌لام چالاكى و هه‌ڵسوورِانى كورده‌كانى دانیشتووى ئوروپا له چه‌ند مه‌یداندا به‌كه‌ڵك و به‌رچاو ده‌بینم، به‌تایبه‌ت له به‌رێوه‌بردنى بۆنه نه‌ته‌وه‌ییه‌كاندا ره‌وه‌ندى كورد له تێكرِاى وه‌لاتانى ئوروپایی به بێ جیاوازى پێكه‌وه كار ده‌كه‌ن، بۆ نمونه له بۆنه‌ى نه‌ورۆز كورده‌كان هاوده‌نگ و هاو هه‌ڵوێست جێژنى نه‌ورۆز ده‌گرن.
له‌گه‌ڵ ئه‌و پێشكه‌وتنانه‌ش پێویسته كورده‌كانى نیشته‌جێ له ئوروپا و له وه‌لاتانى دیكه‌ى جیهان شێلگیرانه‌تر و چالاكتر بێنه مه‌یدان، چونكه ده‌ور و جێگه‌ى ئه‌وان له جولانه‌وه‌ى ئازادیخوازیدا چاره‌نووس سازه و ده‌توانن كاریگه‌ریان هه‌بێ له سه‌ر زیاتر گه‌رم داهاتنى شۆرشى حه‌قخوازانه و هه‌روه‌ها نزیك بوونه‌وه‌ى هێز و لایه‌نه سیاسیه‌كانى گۆرِه‌پانى جوولانه‌وه‌ى ئازادیخوازیى كوردستان. هه‌روه‌ها ره‌وه‌ندى كوردى ده‌توانن چالاكتر بن له ناساندنى گه‌لى كورد و خه‌باتى حه‌قخوازانه‌ى، به ناوه‌نده جیهانیه‌كان و حكومه‌ت و جه‌ماوه‌رى ئه‌و وه‌لاتانه‌ى لێ نیشته‌جێن.
به‌تایبه‌ت كورده‌كان ده‌توانن كه له هه‌ركام له وه‌لاتانى ئوروپایی ژماره‌یان زۆره ده‌كرێ لۆبیان له پارلمانى وه‌لاتان هه‌بێ و كاریگه‌ریان هه‌بێ له سه‌ر سیاسه‌ت و هه‌ڵوێستى حكومه‌ته‌كان به قازانجى گه‌لى كورد. بێ گوومان كوردانى دانیشتووى هه‌نده‌ران ده‌توانن ده‌ور و كاریگه‌ریان له سه‌ر به‌ره‌و پێش چوونى جوولانه‌وه‌ى كورد و ئاگاداركردنه‌وه‌ى جیهانیان له سته‌م و بێعه‌داڵه‌تیه‌كان به‌رانبه‌ر هاونیشتمانان هه‌بێ.
پ ـ ماوه‌یێك له‌مه‌وبه‌ر سه‌فه‌رى ئوروپاتان كرد، ده‌كرێ له سه‌ر ئامانج و ئاكامه‌كانى ئه‌و سه‌فه‌ره بۆمان بدوێن؟
و ـ دیاره ئامانجى سه‌فه‌ره‌كه‌ى من چه‌ند لایه‌ن و مه‌به‌ستى هه‌بوو كه ئاماژه به به‌شێكیان ده‌كه‌م، یه‌كه‌م ئه‌وه‌ى كه پێویست بوو له نزیكه‌وه له‌گه‌ڵ كۆمیته‌ى ئوروپا و رێكخستنه‌كانى سازمان له وه‌لاتانى ئوروپایی له نزیكه‌وه كۆبینه‌وه كه به خۆشیه‌وه تواندرا چه‌ند كۆبوونه‌وه‌ى به‌رین رێكبخه‌ین و له‌و كۆبوونه‌وانه‌دا باسى كار و چالاكى رێكخستنه‌كانى سازمان له ده‌ره‌وه كرا و هه‌وڵدرا رێگه‌كان بۆ چالاكتر بوونى كۆمیته‌كان ده‌ست نیشان بكرێ و، له‌و پێوه‌نده‌دا هه‌نگاوى باش هه‌ڵبگیرێ بۆ زیاتر هه‌ڵسوورانى كۆمیته‌كانى سازمان.
له وه‌لاتى نوروێژ به‌هاوكارى ئه‌ندامانى سازمان یادى مامۆستا سه‌یید جه‌لال حوسه‌ینى رێبه‌رى نمونه‌یی سازمانى خه‌باتمان كرده‌وه، هه‌روه‌ها كۆبوونه‌وه‌یێكى گرینگمان له‌گه‌ڵ به‌شێكى وه‌زاره‌تى ده‌ره‌وه‌ى نوروێژ هه‌بوو كه له‌و كۆبوونه‌وه‌دا به ووردى سیاسه‌ت و هه‌ڵوێسته‌كانى سازمان و شێوه‌ى كار و چالاكى سازمانمان بۆ باس كردن. یه‌كێكى دیكه له چالاكیه به‌رچاوه‌كان، به‌رێوه‌بردنى رێ و ره‌سمى ٥ى خه‌رمانان یادى ٣١ ساڵه‌ى دامه‌زرانى سازمانى خه‌بات ى كوردستانى ئێران له شارى سارزبۆرگ له وه‌لاتى نوروێژ بوو، له‌گه‌ڵ ئه‌وه‌ى به‌رێوه‌چوونى ئه‌و رێ و ره‌سمه گرینگ بوو، له هه‌مانكاتدا به‌شدارى به‌رینى كوردانى دانیشتووى ناوچه‌ى ئوسفۆڵد كه ناوچه‌یێكى به‌رینه له وه‌لاتى نوروێژ زۆر به‌رچاو بوو. به‌شدارى به‌رینى كوردان له یادى دامه‌زرانى سازمانى خه‌بات بووه جێگه‌ى باسى خه‌ڵك.
پ ـ به برِواى به‌رێزتان كورد بۆ به‌ره‌و پێش بردنى جوولانه‌وه‌ى رزگاریخوازى له ده‌ره‌وه‌ى كوردستان ده‌بێ چ به‌رنامه و پرۆژه‌یێكى هه‌بێ و ئایا ئێوه هیچ كارێكتان له‌م پێناوه‌دا كرد؟
و ـ بێ گوومان باشترین به‌رنامه و پرۆژه بۆ كورد له ده‌ره‌وه یه‌ك ده‌نگى و یه‌كگرتووییه. ئه‌گه‌ر كورد له ده‌ره‌وه به هاوده‌نگى و یه‌ك هه‌ڵوێستى له ناوه‌نده جیهانیه‌كاندا خۆیان ده‌ربخه‌ن و داواكانیان پێشكه‌ش بكه‌ن، كاریگه‌رى یه‌كجار باشى ده‌بێ له سه‌ر باشتر ناساندنى جوولانه‌وه‌ى مافخوازانه‌ى گه‌لى كورد و زیاتر ریسوا كردنى ده‌سه‌لاتى ملهورِى ئاخونده‌كان له ئێران. دیاره ئه‌و كۆده‌نگى و یه‌ك هه‌ڵوێستیه ته‌نیا به كورده‌كانى دانیشتووى ئوروپا وه‌دی ناێی، به‌ڵكوو ده‌بێ رێبه‌رایه‌تى هێز و لایه‌نه‌كانى كوردستانى ئێران له كوردستاندا برِیار بۆ یه‌كده‌نگى و هاوكارى به كرده‌وه، بكه‌نه یه‌كه‌م ئه‌رك و كاریان، كه به‌داخه‌وه له ئێستادا ئه‌وه به‌رچاو ناكه‌وێ.
له پێوه‌ند به‌وه‌ى كه من چیم كردوه، له راستیدا له‌گه‌ڵ ئه‌وه‌ى ئه‌و ماوه‌یه‌ى من له ده‌ره‌وه بووم ماوه‌یێكى زۆر نه‌بوو، به‌لام ده‌توانم بڵێم كه له هه‌ر كۆرِ و مه‌جلیسێكدا له سه‌ر پێویستى یه‌كریزى و هاوكاریى، نه‌زه‌راتى سازمانى خه‌باتم هێناوه‌ته به‌رباس و به پێى مه‌جال هه‌وڵم بۆ نزیكى و هاوكارى هه‌مه لایه‌نه كه به‌ردى بناغه‌ى به‌ره‌و پێش چوون و گه‌شه‌كردنى جوولانه‌وه‌ى ئازادیخوازى گه‌لى كورد و جوولانه‌وه‌ى ره‌واى خه‌ڵكى ئێران له به‌رانبه‌ر رژیمى سه‌ره‌رۆى ئاخوندیه، داوه.
پ ـ ناوچه‌ى رۆژهه‌لاتى ناوه‌راست و به‌شێك له وه‌لاتانى باكورى ئافریقا هه‌ر وه‌ك بینیمان ئاڵووگۆرِى بنه‌رِه‌تیان له سیسته‌مى حوكمرانى تێدا پێكهات و هه‌نووكه‌ش ئه‌و شه‌پۆله ئاڵوگۆرِخوازیه به‌رده‌وامه، ئه‌و ره‌وشه هیچ كاریگه‌رى هه‌یه به نیسبه‌ت دۆزى ره‌واى كورد؟ هه‌روه‌ها پێت وایه كاریگه‌رى ده‌بێ له سه‌ر وه‌زع و چاره‌نووسى خه‌ڵكى ئێران؟
و ـ ئاشكرایه راپه‌رینه یه‌ك له دوای یه‌كه‌كان له ژماره‌یێك له وه‌لاتانى عه‌ره‌بی كه ئاكامه‌كه‌ى رووخانى سێ ده‌سه‌لاتى دیكتاتۆرى له میسر و تونس و لیبى لێ كه‌وته‌وه‌و، زۆر نزیكه كه چه‌ندین دیكتاتۆرى دیكه‌ش له ناوبچن، به‌باوه‌رِى من به گرینگرتین رووداوى سیاسى له‌م سه‌ده‌یه‌دا ده‌ژمێردرێ. ئه‌و ئاڵ و گۆرِه سیاسیه به‌رچاوانه و رووخانى ده‌سه‌لاته دیكتاتۆره‌كان و جێگرتنه‌وه‌یان به ده‌سه‌لاتى دیموكراتیك، من پێم وانیه كاریگه‌رى راسته‌وخۆى هه‌بێ له سه‌ر جوولانه‌وه‌ى ئازادیخوازى گه‌لى كورد، چوونكه ئه‌و راپه‌رینانه زیاتر بۆ گۆرِینى سیستمى حوكمرانى بوو، نه‌ك راپه‌رین و جوولانه‌وه‌ى میلله‌تێك بۆ وه‌ده‌ست هێنانى مافه زه‌وت كراوه‌كانیان. خه‌ڵك له میسر و تونس و لیبى خاوه‌ن وه‌لاتێكى سه‌ربه‌خۆ بوون و ئه‌وان ته‌نیا له چوارچێوه‌ى وه‌لاتى خۆیان له‌لایه‌ن حاكمانى دیكتاتۆره‌وه زوڵمیان لێ ده‌كرا، له حاڵێكدا كه گه‌لى كورد له‌لایه‌ن ده‌سه‌لاته چاوچنۆك و چاوبرسیه‌كانه‌وه كه ئامانجیان له ناوبردنى كورد و نیشتمانه‌كه‌یه‌تى زوڵمى لێ ده‌كرێ. له‌گه‌ڵ ئه‌و راستیه‌ش كاریگه‌رى باخۆیان هه‌یه له سه‌ر هاندانى جه‌ماوه‌رى كوردستان.
له پێوه‌ند به كاریگه‌رى له سه‌ر وه‌زعى ئێران، به‌ڵێ پێم وایه ئه‌و راپه‌رینانه و ئاكامه‌كه‌ى كه روخانى دیكتاتۆره‌كان بوو، ئاگاداركردنه‌وه‌یێك بوو بۆ ده‌سه‌لاتدارانى رژیمى ئاخوندى كه مه‌رگی ئه‌وانیش نزیكه و ئیتر ده‌ورانى ئیستبداد و دیكتاتۆرى له هه‌موو جیهان كۆتایی پێ هاتووه.
هه‌ر چه‌ند ئاخونده‌كان وه‌ك هه‌میشه به قسه و دروشمه‌كانیان هه‌وڵیان داوه كه راپه‌رینه‌كانى وه‌لاتانى عه‌ره‌بی به خۆیان و ئینقلابی خومه‌ینیه‌كه‌یانه‌وه پێوه‌ند بده‌ن، به‌لام نه‌ك ئه‌وه‌یان بۆ نه‌چووه سه‌ر به‌ڵكوو ده‌ركه‌وت كه ئامانجى ئه‌و ئینقلاب و راپه‌رینانه، بۆ له ناوبردنى دیكتاتۆره دزێوه‌كانه، كه یه‌كێك له‌و دیكتاتۆرانه رژیمى به‌شار ئه‌سه‌د له سوریه‌یه كه هاوپه‌یمانى رژیمى ئاخوندیه. له داهاتووشدا ده‌رده‌كه‌وێ كه رژیمى ئاخوندى ده‌كه‌وێته به‌رلافاوى غه‌زه‌بی خه‌ڵكى ئێران و ده‌سه‌لاتداران له ئێران وه‌ك باقى ملهورِه‌كانى دیكه‌ى جیهان ده‌كه‌ونه به‌ر په‌لامارى خه‌ڵكى وه‌زاڵه هاتوو.
پ ـ هه‌لایسان و ناوه‌رۆكى داواكارى و ده‌رئه‌نجامه‌كانى راپه‌رینه جه‌ماوه‌ریه‌كانى ناوچه‌كه چۆن هه‌ڵده‌سه‌نگێنن؟
و ـ ئه‌و راپه‌رینانه له دواى ده‌یان ساڵ زوڵم و بێدادى حكومه‌ته دیكتاتۆره‌كان و چه‌وساندنه‌وه‌ى بێ به‌زه‌ییانه‌ى خه‌ڵك هاته ئاراوه. به‌شى هه‌ره زۆرى میلله‌تى هه‌ر كام له‌و وه‌لاتانه له هه‌لێك و ده‌رفه‌تێك ده‌گه‌رِان تا رقى پنگ خواردووى چه‌ندین ساڵه‌یان به گژ ده‌سه‌لاتدارانى دژى ئازادى و پێشێلكارى مافى مرۆڤ دا بچنه‌وه.
ئه‌نجامى ئه‌و راپه‌رینانه ئه‌وه نیشان ده‌دا، كه سه‌رده‌مێكى نوێ و ژیانى شیاوتر و ئینسانى تر چاوه‌روانى میلله‌ته‌كانى ناوچه‌كه‌یه و ئه‌وه ده‌رده‌خا كه ئازادى و دیموكراسى جێگه‌ى سته‌م و ئیستبداد ده‌گرێته‌وه.
پ ـ به‌رێزتان دۆخى رژیمى ئێران له دواى ئاشكرا بوونى پیلانه ترۆریستیه‌كه‌ى واشینگتۆن و بلاوبوونه‌وه‌ى راپۆرتى ئاژانسى نێوده‌وڵه‌تى و ئاشكرابوونى لایه‌نه نیزامیه‌كانى به‌رنامه‌ى ئه‌تۆمیه‌كه‌ى چۆن هه‌ڵده‌سه‌نگێنن و به برواى جه‌نابت ئاكامى كه‌ڵه‌كه بوونى تاوانكارى رژیم و گوێ نه‌دان به داواى كۆمه‌ڵگاى جیهانى چى ده‌بێ؟ ئایا شیمانه‌ى هه‌لایسانى شه‌رِى نیزامى له دژى رژیمى ئێران ده‌كه‌ى؟
و ـ ئه‌وه یه‌كه‌م جار نیه كه ئاشكرا ده‌بێ رژیمى ئێران ده‌ستى له گه‌لاڵه‌ى ترۆریستیدا هه‌بێ. له سالانى رابردوو به به‌ڵگه ئاشكرا بووه كه رژیمى ئێران له ترۆرى خه‌ڵكى بێ تاوان و هه‌روه‌ها ناوه‌ندى سه‌ربازى ئه‌مریكا و وه‌لاتانى دیكه ده‌ورى سه‌ره‌كى گێرِاوه. هێرشى ترۆریستى بۆ سه‌ر هێزى ئاشتى پارێز له لوبنان له ده‌یه‌ى هه‌شتا و هێرش بۆ سه‌ر بنكه‌ى سه‌ربازى ئه‌مریكا له خوبه‌رى عه‌ره‌بستان و هه‌روه‌ها گه‌لاڵه‌ى رفاندنى كارمه‌ندى سه‌فاره‌ته‌كانى وه‌لاتانى رۆژئاوا له وه‌لاتانى ناوچه‌كه و ده‌یان كرده‌وه‌ى ترۆریستى دیكه به به‌ڵگه له سه‌ر تاونكارى رژیمى ئاخوندى و ده‌ست و پێوه‌نده‌كانى ئاشكرا بوون.
دیاره ئه‌و هه‌وڵه ترۆریستیه‌ى رژیم بۆ ترۆرى سه‌فیرى عه‌ره‌بستانى سعوودى له نه‌وعى خۆیدا، كرده‌وه‌یێكى نوێ بوو، به‌تایبه‌ت كه مه‌به‌سته‌كه‌ى ناوه‌ندێكى ره‌سمى دیپلۆماسى بوو. هاوكات له‌گه‌ڵ هه‌وڵ و پیلانه ترۆریستیه‌كان درێژه‌دانى ده‌سه‌لاتى ئاخوندى به به‌رنامه و گه‌لاڵه‌ى مه‌ترسیدار و گووماناویه ئه‌تۆمیه‌كانى، بۆته جێگه‌ى سه‌رنج و وه‌لاتانى ناوچه‌كه‌ش مه‌ترسیه‌كانیان به ئاشكرا راده‌گه‌یێنن. له‌گه‌ڵ كه‌ڵه‌كه بوونى ئه‌و پێشێلكاریانه و چه‌ندین سه‌رپێچى دیكه، پێم وایه كه وه‌لاتانى خاوه‌ن هێز به‌تایبه‌ت وه‌لاتانى رۆژئاوا، به‌م نزیكانه به‌رنامه‌ى هێرشیان بۆ سه‌ر رژیم یان بۆ سه‌ر ناوه‌نده ئه‌تۆمیه‌كانى نابێ. پێم وایه وه‌لاتانى رۆژئاوا زیاتر پشت ده‌به‌ستن به فشاره سیاسیه‌كان و هه‌روه‌ها توند كردنى ئابڵووقه‌ى ئابوورى و هه‌روه‌ها قه‌ده‌غه كردنى سه‌فه‌رى به‌رپرسانى رژیم و رێگه‌گرتن له چالاكى بانكه‌كانى رژیم. له‌گه‌ڵ ئه‌وه‌شدا پێم وایه ئه‌گه‌ر هیچ كام له فشاره سیاسى و ئابڵووقه‌كان كاریگه‌رى خۆیان نه‌بێ، ئه‌گه‌رى هێرشى سه‌بازى وجوودى هه‌یه و زۆرجاریش به‌رپرسانى وه‌لاتانى رۆژئاوا، رێگه‌ى به‌كار هێنانى هێزى سه‌ربازیان بۆ كۆتایی هێنان به كێشه‌ى ناوكه‌یی رژیم هێناوه‌ته به‌رباس.
مه‌سه‌له‌یێكى دیكه‌ش كه پێویسته بیڵێم و ره‌نگه هێندێك به بێ پێوه‌ند و دوور له مه‌وزووع بزاندرێ ئه‌وه‌یه كه رووخان و له ناوچوونى رژیمى به‌شار ئه‌سه‌د له سوریه هۆیێكى جیددی ده‌بێ بۆ فشار هێنانى زیاتر بۆ سه‌ر رژیمى ئاخوندى ئێران.
پ ـ له حاستى نێوخۆیی كێشه‌ى باڵه‌كانى رژیم به‌رده‌وامه و بگره قوڵتریش بۆته‌وه و ماوه‌یێك له‌مه‌وبه‌ر خامنه‌یی بابه‌تى لابردنى سه‌رۆك كۆمارى له ئێران هێنایه به‌رباس. ئه‌و بابه‌ته پێوه‌ندى به كێشه‌كانى ناوخۆوه هه‌یه و به برواى به‌رێزتان كێشه ناوخۆییه‌كانى رژیم به‌ره‌و كوێ ده‌رۆن؟
و ـ به‌ڵێ راسته كه كێشه‌ى باڵه‌كانى رژیم بوونى هه‌یه، به‌لام خامنه‌یی و ده‌ست و پێوه‌نده‌كانى به پشت به‌ستن به سپاى پاسداران و ناوه‌نده سه‌ركوتگه‌ر و ئه‌منیه‌تیه‌كان و به‌كار هێنانى هێز موخالفه‌كانى ناو ده‌سه‌لاتیان بێ توانا كردوه. دیاره خامنه‌یی كه باس له لابردنى سه‌رۆك كۆمارى ده‌كا، مه‌به‌ستى ئه‌وه نیه كه ئه‌حمه‌دى نژاد له سه‌ر كار لابه‌رێ. خامنه‌یی به خه‌یاڵى خۆى بۆیه ئه‌و باسه‌ى هێنایه گۆرِێ كه ئه‌وه بگه‌ێنێ كه رژیمه‌كه‌ى باوه‌رِى به نیزامى پارڵه‌مانى و دیموكراتیك هه‌یه و ده‌كرێ له داهاتوودا به‌ناو نوێنه‌رانى خه‌ڵك سه‌رۆكى حكومه‌ت هه‌ڵبژێرن و مه‌جلیس موتمانه به حكومه‌ت بدات.
پێم وایه ئه‌و قسانه‌ى خامنه‌یی له‌لایێك بۆ ده‌رخستنى ده‌سه‌لاتى بێ سنوورى خۆیه‌تى و له هه‌مانكاتدا وه‌ك مانۆرێكى سیاسیه و كه‌ڵكى ئه‌وه‌ى لێ وه‌رده‌گرێ كه هێزى خۆى نیشان بدا و ئه‌و ده‌وره‌ى كه وه‌لى فه‌قیه پێى دراوه بگێرِێ.
سه‌ره‌رِاى مانۆرِ و پروپاگه‌نده‌كان، و زاڵ بوونى خامنه‌یی و ده‌ست و پێوه‌نده‌كانى به سه‌ر ده‌سه‌لاتدا كێشه و ناكۆكى له ناوخۆى ده‌سه‌لات هیچ كات كۆتایی پێ نایه و، جه‌نگى ده‌سه‌لات له ناو هه‌موو ده‌سه‌لاته دیكتاتۆره‌كان بوونى هه‌یه و نه‌براوه‌یه.
پ ـ هه‌ڵبژاردنه‌كانى داهاتووى مه‌جلیسى رژیم كه قه‌راره له ١٢ى ره‌شه‌مه‌ى ئه‌مساڵ به‌رێوه بچێ، به برواى جه‌نابت هیچ ئاڵووگۆرێك له پێكهاته‌ى رژیم دا دروست ده‌كا و ئایا ده‌بێته هۆیێك بۆ ته‌سویه حیسابی باڵه‌كانى رژیم؟ به‌برواى به‌رێزتان هه‌ڵوێستى جوولانه‌وه‌ى كورد له كوردستانى ئێران له راست ته‌حریم و ده‌نگدان ده‌بێ چى بێ؟
و ـ به پێى ئه‌و ته‌جروبه‌ى له ٣٢ ساڵ ده‌سه‌لاتدارى رژیمى ئاخوندى هه‌یه، ده‌ركه‌وتووه كه رژیمى ئاخوندى هه‌ر نه‌وعه نمایش و شانۆیێكى هه‌ڵبژاردن به مه‌به‌ستى درێژه پێ دان به ده‌سه‌لاته ناره‌واكه‌ى به كار هێناوه. بێ گوومان هه‌ڵبژاردنى ئه‌م جاره‌ى مه‌جلیسى رژیم یه‌كێكى دیكه ده‌بێ له شانۆگه‌ریه‌كان. له پێوه‌ند به‌وه‌ى كه ببێته هۆیێك بۆ ته‌سویه حیساب له ناو باڵه‌كانى رژیم، پێم وایه باڵه‌كانى دیكه‌ى ده‌سه‌لات توانایێكى ئه‌وتۆیان نیه له به‌رانبه‌ر خامنه‌یی و ده‌ست و پێوه‌نده‌كانى. بۆیه باشتره بڵه‌ین خامنه‌یی ئه‌م شانۆى هه‌ڵبژاردنه به قازانجى ده‌ست و پێوه‌نده‌كانى و كه‌م هێزكردنى نه‌یاره بێ تواناكانى به كار دێنێ.
له پێوه‌ند به‌وه‌ى كه هێز و لایه‌نه سیاسیه‌كانى كوردستان چ هه‌ڵوێستێكیان ده‌بێ، پێم وایه وه‌ك هه‌میشه جیاوازى له هه‌ڵوێست و روانگه‌كانى هێزه‌كاندا ده‌بێ و یه‌ك هه‌ڵوێستى چ له پێوه‌ند به ته‌حریم و چ له پێوه‌ند به برِیارى به‌شدارى كردن له هه‌ڵبژاردنى شانۆیی وجودى نابێ.
پ ـ ئاڵووگۆرِه‌كان زۆر به خێرایی به‌رێوه‌ن و زۆر جار باسى ئه‌وه كراوه كه ماڵى كورد هێشتا له شێواوى دایه و رێك نه‌خراوه، راتان سه‌باره‌ت به‌م دۆخه چیه و پێشنیارتان بۆ نهێشتنى ئه‌و دۆخه و یه‌كیه‌تى و ته‌بایی نێوان بزوتنه‌وه‌ى كورد له كوردستانى ئێران چیه؟ به له به‌رچاوگرتنى هه‌موو ئه‌و پرۆژه و پێشنیارانه‌ى تا ئێستا دراون؟
و ـ سازمانى خه‌بات چه‌ند جار پێشنهادى داوه به حیزب و لایه‌نه سیاسیه‌كان و به‌م دواییه‌ش گه‌لاڵه‌یێكى ١٠ خاڵى بۆ هێز و لایه‌نه‌كانى كوردستانى ئێران ناردوه كه داوامان كردوه له سه‌ر نزیك بوونه‌وه و هاوكارى هه‌مه لایه‌نه وتووێژ بكه‌ین. به‌لام به‌داخه‌وه تا ئێستا ئاكامێكى ئه‌وتۆى نه‌بووه. ئه‌وه راستیێكه كه له نه‌بوونى یه‌كیه‌تى و هاوكارى هێز و لایه‌نه‌كانى كوردستانى خه‌ڵكى كوردستان به تێكرِا و خودى حیزب و لایه‌نه‌كان زیان ده‌بینن، هه‌موو ئه‌و راستیه ده‌زانن. هه‌ر بۆیه داوام ئه‌وه‌یه كه هه‌وڵ بدرێ یه‌كگرتوویی بكرێته به‌ردى بناغه‌ى ئه‌رك و كاره‌كانمان و كۆتایی بێنین به دووریى و لێكترازان و باشتره یه‌ك هه‌ڵوێست بین. له پێوه‌ند به مه‌سه‌له چاره‌نووس سازه‌كان ئه‌گه‌ر به پێچه‌وانه‌ى ئه‌و راستیانه كار بكه‌ین داهاتوویێكى تاریك چاوه‌روانى جوولانه‌وه‌ى كورد ده‌كا و مێژوو نامان به‌خشێ.
پ ـ له چوارچێوه‌ى هه‌وڵه‌كان بۆ هاوكارى هێزه‌كانى كوردستان، ماوه‌یێكه باسى به‌ستنى كۆنگره‌یێكى نه‌ته‌وه‌یی له هه‌ولێر به چاودێرى و هه‌وڵى سه‌رۆكى هه‌رێمى كوردستان ده‌كرێ؟ به برِواى به‌رێزتان ئه‌و كۆنگره‌یه كه ئه‌گه‌ر ببه‌سترێ تا چ راده‌یێك ده‌توانێ ئامانجه‌كانى بپێكێ؟
و ـ به برِواى من هه‌وڵ بۆ به‌ستنى كونگره‌ى نه‌ته‌وه‌یی كورد هه‌نگاوێكى پیرۆزه و ئه‌گه‌ر ئه‌و كونگره‌یه ببه‌سترێ ده‌كرێ كێشه‌كانى كورد له پارچه‌كانى كوردستان تێدا باس بكرێ و به هه‌ڵسه‌نگاندنى دروست تر روبه‌روى روداوه‌كان و پێشهاته‌كان ببینه‌وه. سازمانى خه‌بات ى كوردستانى ئێران پشتیوانى هه‌ر هه‌وڵێك له‌و چوارچێوه‌دا ده‌كا و باوه‌رِى وایه كه نزیكى و لێك گه‌یشتنى هێزه‌كان و ئاگادار بوون له سیاسه‌ت و هه‌ڵوێستى یه‌كتر پێویسته و له هه‌مانكاتدا رێگه خۆشكه‌ر ده‌بێ بۆ هاوكارى تێكرِایی و ده‌بێته هۆى كه‌م بوونه‌وه و كۆتایی هێنان به كێشه و ئاڵۆزیه‌كان له كوردستاندا. و هه‌روه‌ها رێگه له سیاسه‌ته ئاژاوه‌گێریه‌كانى رژیمى ئاخوندى و هه‌وڵه‌كانى ئه‌و رژیمه بۆ نانه‌وه‌ى ناكۆكى له نێوان گه‌لى كورددا ده‌گرێ. هه‌ر بۆیه سازمانى خه‌بات به ته‌واوى پشتگیرى و هاوكارى گرتنى كۆنگره‌یێكى نه‌ته‌وه‌یی كورد ده‌كا، به له به‌رچاوگرتنى تایبه‌تمه‌ندیه‌كانى جوولانه‌وه‌ى كورد له هه‌ركام له به‌شه‌كانى كوردستان و هه‌روه‌ها سیاسه‌ت و ئیستراتیژه‌كانى هێزه‌كانى هه‌ر كام له پارچه‌كان. به له به‌رچاوگرتنى ئه‌و راستیه رێگه‌كارى هاوبه‌ش ده‌ست نیشان و په‌سه‌ند بكرێ و ئه‌گه‌ر به‌و شێوه بچێته پێش پێم وایه ئامانجه‌كانى ده‌پێكێ و سه‌ركه‌وتوو ده‌بێ.
پ ـ له‌م قۆناغه‌ى ئێستا به له به‌رچاوگرتنى رابردوو و كار و كرده‌وه و سیاسه‌ت و داهاتوو، چاو له كارنامه‌ى سازمانى خه‌بات ده‌كه‌ى ئه‌و ته‌شكیلاته له كام پله ده‌بینى و ره‌خنه‌تان چیه له سازمان و چ په‌یامێكتان هه‌یه بۆ ئه‌و كه‌سانه‌ى هیوایان به‌م ته‌شكیلاته هه‌یه؟
ئه‌گه‌ر سه‌رنج بده‌ینه پێگه‌ى سازمانى خه‌بات، بێگوومان سازمانى خه‌بات هێزێكى شوێن دانه‌ر و گرینگه له جوولانه‌وه‌ى ئازادیخوازى كوردستانى ئێراندا، هه‌روه‌ها به‌رنامه و سیاسه‌تى سازمانى خه‌بات به‌رنامه‌یێكى سه‌رده‌میانه‌یه كه بۆ ئه‌م قۆناغه‌ى جوولانه‌وه‌ى كورد له كوردستانى ئێران به نمونه‌یی و كه‌م وێنه ده‌ژمێردرێ. به‌لام له‌گه‌ڵ ئه‌و جێگه و پێگه‌یه‌ى كه سازمانى خه‌بات و ئه‌و مێژووه پرشنگداره‌ى هه‌یه‌تى ده‌بێ ئه‌و راستیه‌ش بڵه‌ین، سازمانى خه‌بات وه‌ك پێویست نه‌یتوانیوه بچێته پێش و ده‌بێ كارى زیاتر بكرێ بۆ ئه‌وه‌ى وه‌ك ته‌شكیلاتێكى ره‌سه‌نى نیشتمانى و نه‌ته‌وه‌یی له مه‌یداندا چالاكتر و دیارتر بێ، ئه‌وه‌ش به كارى زیاترى به‌رپرسان، ئه‌ندامان و دۆستانى سازمانى خه‌بات و نه‌زه‌رات و پێشنهادى باش و هاوكارى خۆشه‌ویستان و دڵسۆزان ده‌كرێ.
له كۆتاییشدا ده‌ڵێم، سازمانى خه‌بات ته‌شكیلاتێكى ره‌سه‌نى نیشتمانیه و داهاتوویێكى پرشنگدار و دره‌وشاوه‌ى ده‌بێ. تێكۆشانى رابردووى سازمان زاڵبوون به سه‌ر كه‌ند و كۆسپه‌كان و تێپه‌رین به سه‌ر رۆژگاره سه‌خته‌كان ئه‌و راستیه به باشى ده‌رده‌خا كه سازمانى خه‌بات هێزێكى كاریگه‌ر و ریشه‌دارى كوردستانه.
