گۆران ھەڵەبجەیی

^{سەرەتا پیرۆزبایی لە گەلی کورد دەکەم لە باکوور، کە توانیان سەربەرزانە لەو ھەڵبژاردنانەدا دەرچن.بەڵام بەدەر لەمە دەبێ وەڵامی ئەو پرسیارە گرنگەش بدرێتەوە کە لە فەیسبووک لە لایەن دڵسۆزانەوە بە نیگەرانیەوە خرایە ڕوو. پرسیارەکە دەڵێ بە پێی ئەنجامی ھەڵبژاردەکان ، ھەدەپە ھەندیک شارەوانی لەدەست داوە ،بەمەش ڕێژەی دەنگەکانی دابەزیەوە ، ھۆکار چیە کە دەنگەکانیان کەمی کردووە؟}

^{بەر لە وەڵامدانەەی ئەم پرسیارە گەرەکە بگەڕێینەوە بۆ چەند ساڵێک لەمەوبەر یا ڕوونتر پاش ھەڵبژاردنەکانی پەرلەمانی تورکیا. لەو دەمەدا ئەردۆغان بە ئومید بوو کە ھەدەپە ڕێژەی ١٠٪ نەھێنێت و پێی نەخاتە پەرلەمان ، بەڵام کە ئومیدەکەی نەھاتە دی ، سیاسەتێکی دوژمنکارانەو نائینسانی پەیڕەو کرد دژ بە ھەدەپە.}

^{ھەموو دەزانین کە ھەر حیزبێک لە دەمی ڕەوشێکی سەوغڵەم و ئازادیدا دەتوانێت ممارەسەی سیاسەت بکات و گەشەبکات و بەرنامەی خۆی ڕابگەیەنێت، بە پێچەوانەوە ھەر دۆخێکی ناھەموارو نالەبار بەسەلبی کاردەکاتە سەر ئەو حیزبە لەھەموو پێگەکاندا.}

^{بەرنامەکەی ئەردۆغان بۆ سەرکووتکردنی ھەدەپە بە چەند قۆناغێکدا تێپەری لە:}

^{*دەستگیرکردنی سەلاحەدین دەمیرتاش و چەندین ئەندام پەرلەمان و تا دەگاتە زیندانکردنی ھەزارەھا ئەندام لە پۆستە جیکاندا.}

^{*لادانی ژمارەیەکی زۆر لە سەرۆک شارەوانیەکانی باکوور بە یاسای{قەیوم} و دانانی کەسانی سەر بە ئاک پارتی لە شوێنیان.}

^{*خولقاندنی دۆخێکی تۆقینەرو سەربازی لە زۆربەی دەڤەرە کوردەیەکاندا.}

^{*گواستنەوەی خێزانی سەرباز و پۆلیس و میت و فەرمانبەرانی ئیداری بۆ ناوچە کوردیەکان کە ئەمانە ھەموو دەنگیان بە ئاک پارتی دا لەو ناوچە کوردیانە.}

^{*ڕێگە نەدان بە ھەدەپە بۆ پروپاگەندەی ھەڵبژاردن لە میدیاکانەوە وەک ھەر حیزبێکی تر و درووستکردنی ئاستەنگی بۆیان لە دڕاندنی پاکێتەکانیان تا ھێرش کردنە سەر ئەو ئەندامانەی کە پلاکێتەکانیان ھەڵدەواسی.}

^{*ھەرەشەکردن لە گوندنشینەکان کە دەنگ بە ھەدەپە نەدەن.}

^{*مەیسەرکردنی ھۆکاری گواستنەوە بۆ ئەندامان و لایەنگرانی ئاک پارتی و گواستنەوەیان بە پاس بۆ بنکەکانی ھەڵبژاردن لە ناوچە دوورەدەستەکاندا.}

^{* درووستکردنی ئاستەنگی بۆ گوند نشینەکان بۆ گەشتن بە بنکەکانی دەنگدان.}

^{*دەرکردنی چاودێرانی سەر بە ھەدەپە لە ھەندێک لە بنکەکاندا لە لایەن پۆلیس و جاندرمەوە.}

^{*درووستکردنی ناسنامەی ساختە بۆ پەنابەرە سوریەکان و دەنگدانیان بە ئاک پارتی لە شارە کوردەیکانی باکووردا، کە زۆربەیان باگراونی ئیسلامیان ھەیە.}

^{*بەھێزی ھەستی ئاینی زۆریک لە کوردانی باکوور بە تایبەتی ناوچە گووندنشینەکان ، کە زۆریک لەوانە ئەردۆغان بە پێغەمبەر دەزانن و ھەستی ئاینیان زاڵە بەسەر ھەستی نەتەوایەتیاندا.}

^{*کڕینی زۆریک لە خەڵک بە پارەو مەنسەب و چەک و زۆرشتی دیکە لە لایەن ئەردۆغانەوە. ،بەتایبەت ھەندێک لە سەرۆک عەشیرەتەکان {نمونەی عەشیرەتەکانی دەڤەری شەرناخ}}

^{*وەک چۆن یەکیتی و پارتی دووحیزبی دەسەڵاتدارن و زۆر بە ئاسانی لە ھەڵبژاردنەکاندا بە ئارەزووی خۆیان تەزویر دەکەن ، بەھەمان شیوەش ئەردۆغان لە شارە کوردیەکان تەزویری زۆری کردەوە ،ھەندێکیشی ئاشکرا بوون.}

^{جا لەم دۆخە خراپەدا کە ھەڵبژاردنەکانی تێدا ئەنجام درا ،گەر ھەدەپە ھیندە شارەوانی بەدەست ھێنابیت، من بەسەرکەوتنێکی مەزنی دەزانم و نابێت لە بەھای کەم بکەینەوە.}

^{دوا شت گەرکمە ئاماژە بە خاڵێکی گرنگ بکەم ئەوەیش دۆڕاندنی کاندیدەکانی ئەردۆغانە لە ئەنقەرەو ئەزمیر و ئەستەمبوڵ، پتر لە [٣] ملیۆن کورد لە ئەستەنبوڵ دەژی، پێدانی دەنگی ئەوانە بە ڕکابەرەکەی ئەردۆغان پارسەنگی بەلای کاندیدەکەی حیزبی گەلی کۆماری قوورس کردو ھەڵبژاردنەکەی بردەوە . ئەم شتەش لە کن ئەردۆغان شاراوە نیەو باش دەزانێت کە کورد ھۆکاری سەرەکی دۆڕاندنی کاندیدەکەی بوو لە ئیستەمبوڵ.}

3/4/2019