سه‌لام عه‌بدولڵا
دانیشتوانی ئاوایی شیرەوەن لەناو وڵاتی خۆیاندا دەژین، كەچی پێیان دەڵێن ئاوارە یان"ئێرانی"و خۆشیان بەهۆی رەفتاری ناشایستە ودوور لە حورمەت لەلایەن حكومەتی هەرێم بۆ هاونیشتمانیانی خۆی، بەخۆیان دەڵێن"ئاوارە"!
ئێوە لەناو وڵاتی خۆتانن و خاوەن ماڵن
ئیمرۆ گوێبیستی ئاهەنگێڕانی هاونیشتمانەكانمان بووین لە گوندی شیرەوەن كە بە ناهەق و بەهۆی نەزانی پێدەڵێن"كەمپی"شیرەوەن وبە یادی"ئاو...ارەبوون"یانەوە رێكیانخستبوو.
چەند شەرمە بۆ حكومەتی هەرێم كاتێ هاونیشتمانیانی خۆی بەخۆیان دەڵێن"ئاوارە"
ئەمە هەواڵێكی زۆر دڵتەزێن و هەژێنەرە بۆ هەر خاوەن ویژدانێك، چونكە ئەگەر وەك پەنابەرێكیش رەفتاریان لەگەل بكرێت، ئەوا بەگوێرەی هەموو دەقە یاسایی، ئاسمانی و تەنانەت عەشیرەت و خێڵەكانی جیهان، هەر مرۆڤێك پاش32ساڵ لە پێكەوە ژیان، لە ماف و ئەركەكان یەكسان دەبێت لەگەل هاوڵاتیانی ئەو وڵات و هەرێم و ناوچانە.
ئایا بەرپرسەكانی كوردستان و عێراق كە زۆربەیان بە فعلی ئاوارە بوون و رەگەزنامەی وڵاتانی تریان هەیە ئەم راستییە نازانن؟!
بارودۆخی هاوڵاتیانی شیرەوەن، نموونەیەكە بۆ پێشێلكردنی مادەی6(هەموو مرۆڤێك لە هەركوێ بوو، مافی هەیە دان بە كەسایەتی یاساییدا بنرێت)و بڕگەی یەكەم لە ماددەی15ی جاڕنامەی جیهانی مافی مرۆڤە((هەموو كەسێك مافی ئەوەی هەیە ببێتە خاوەنی رەگەزنامەیەك كە بیەوێ)). حكومەتی هەرێم بەرپرسە لە پاراستنی مافی هاونیشتمانی دانیشتوانی ئاوایی شیرەوەن و دەبێ بە زووترین كات كار بۆ لابردنی ئەو كۆسپە یاساییە رەگەزپەرەستانە بدا كە بوون بە كۆسپ و گرفت بۆ هەموو ئەو هاونیشتمانانە.
