ئازاد محەممەدزادە

^{ئێمە کوردی رۆژهەڵاتی کوردستان بەو ناهەماهەنگیەوە نە دەتوانین بەشەری چەکداری رێژیمی ئاخوندی بروخێنین و بیبەزێنین، و نە ئەوەیە کە رێژیم وا بە ئاسانی و بە نیەت پاکیەوە بێتە سەر مێزی وتووێژ و موزاکیرە سەبارەت بە چارە سەری پرسی کورد.}

^{خواستی کۆمەڵگای جیهانی و ئامریکا و ئەورووپاش سەبارەت بە گەمارۆکان رووخانی ریژیمی کۆماری ئیسلامی نیە، بەڵکوو راکێشانی رێژیمە بۆ سەر مێزی دانوستاندن لە گەڵ واشنتۆن. واتە گۆڕینی شێوازی رەفتار و عەمەلکردی تارانە روو بە رۆژئاوا و زڵێهزان.}

^{لە کێشەی نێوان ئێران و ئامریکا دا ، کورد بەرچاو نیە، کورد فاکتەر نیە، زلهێزانی جیهانی کورد وەک کارتێک بەکار دەهێنن روو بە داگیرکەران بۆ سات و سەودا و دەستەبەرکردنی بەرژەوەندیەکانی خۆیان.}

^{لە راستی دا واشنتۆن ناتوانی و نایهەوێ کە دەست لە کاروباری ناوخۆی ئێران سەبارەت بە پرسی گەلان و بە تایبەتی کورد وەربدات، ئەگەریش بیکات ئەوە کورد لە نێوان بەرداشی ئێران و ئامریکا دا ورد دەبێت، چۆن لە ئەساسدا ئامریکا تا ئێرەش بچووکترین پشتگیری و پشتیوانی سیاسی و مادی و مەعنەوی لە دۆزی نەتەوەیی کوردی رۆژهەڵاتی کوردستان نەکردووە.}

^{چی بکرێت:
بەڵام ئێمەی دەتوانین بە یەکگرتووی و یەکریزی و رێکخستنی ناوماڵی کورد و گوتاری هاوبەش و سەرئێشە دروست کردن بۆ حاکمیەت و خەباتی جەماوەری لە ناوخۆ و دەرەوە دا لەو دەرفەتانەی کە دێنە پێشمان کەڵک وەربگرین و هەنگاوبەهەنکاو پچینە پێش، تێبکۆشین بۆ پرسە سیاسی و نەتەوەییەکانی خۆمان و دەستەبەرکردنی مافەکانمان تەنانەت لە کەمترین مەجالیش دا.}

^{ئامریکا و ئەوروپا هیچ کات دەرفەت ناخولقێنن تا لە بەرژەوەندی خۆیان دا نەبێت، بۆیە کوردی رۆژهەڵاتی کوردستان دەبێت خۆی بتوانی بەستێن سازی بکات و دەرفەت بۆ خۆی بخولقێنێت، لەو دۆخە ناهەموارە خۆی دەرباز بکات و بچێتە ناو قازێکی ترەوە.}

^{پێویستە لە قۆناغی ئێستادا حیزبەکان کار لەسەر سیستەمێکی سیاسی و نەتەوەیی و ئیداری لە دەرەوە بکەنەوە کە لە بەرە و ناوەند بەهێزتر بێت، سیستەمی حکومەتی دیفاکتۆی لە تەبعییدا بۆ رۆژهەڵاتی کوردستان کە بتوانی رێبەرایەتی شۆرش و بزووتنەوەی نەتەوەیی رۆژهەڵاتی کوردستان بکات.
سیستەم دەبێت بە مەرجەعێکی بریاری دانی سیاسی و نەتەوەیی بۆ کوردی ئەو بەشە و بێگومان ئەوکات بە ملوێن خەڵکی ناوخۆ لە کۆی چین و توێژە جۆراوجۆرەکان و کەسایەتیە سیاسی، حقوقی، مەدەنی، ژنان و لاوان، نووسەران، هونەرمەندان، خوێندکاران و بەگشتی جەماوەری رۆژهەڵات بەشێوەی مادی و مەعنەوی و ناردنی رۆڵەکانیان بۆ پاراستنی ئەو دەستکەوتە بە چڕی خاوەندارێتی لێ دەکەن و خوێن دان و شەهید دان رەوایە، دەبێتە گیان بەخشین لە پێناو ئەمری واقع دا.}

^{لێرەدا پێویست و زەروورەتێکە کە حیزبەکان و جەماوەری ناوخۆی رۆژهەڵاتی کوردستان بە سوودوەرگرتن لە نەخشە رێگای بزووتنەوەی کۆماریخوازی رۆژهەڵاتی کوردستان وەک جەریانێکی سیاسی و فکری کە ئاڵتەرناتیڤ نیە و رۆڵی هەماهەنگی دەگرێت بۆ پرسە نەتەوەیبەکان، هەروەها مەنشووری بزووتنەوە زەرفێکی ئیستراتیژەکە بۆ ئەمرۆی رۆژهەڵاتی کوردستان، ئەرکە کە هەموو لایەنەکانی کە خۆیان لە ئاست چارەسەری پرسی خۆیان بە بەر رسیتر دەزانن بە جدی و خەمخۆری و بە رووحێکی نەتەوەیی و ئێرادەی تەواوە تێبکۆشن بۆ ساغ کردنەوە حاکمیەتی سیاسی کوردستانی لەشکلی مومکینی خۆیدا ( خودگەردانی، خودموختاری، فیدرالی، سەربەخۆیی) بە پێی زروف و توانا و بە لێکدانەوە و خوێندنەوەی هەلومەرجی ناوخۆیی رۆژهەڵاتی کوردستان و ئێران، سەروەری سیاسی بە شێوەی حکومەتی دیفاکتۆی دەتوانێت لە ئێستادا کە قۆناغی ناروونی و نادیاری چارەنووسی کوردە لە رۆژهەڵاتی کوردستاندا وەرچەرخانێکی سیاسی و گۆرانکارییەکی گەورە لە ژیانی سیاسی و بزووتنەوەی نەتەوەیی رۆژهەڵاتی کوردستان پێک بهێنێت و لەرووی بەسیستەم کردنی دێپلۆماسی، هێزی پێشمەرگە میللی، میدیایی نەتەوەیی، بریاری شەر و وتووێژ روو بەتاران، هاوپەیمانی لەگەڵ ئۆپۆزیسیۆنی سەراسەری، دامەزراوەی جۆراوجور و پێکهێنانی ناوەند و بنکەی و سەکۆی فکری و زانستی بۆ لێکۆلینەوە و توێژینەوە سەبارەت بە کۆی بابەتەکانی پەیوەندی دار بە رۆژهەڵاتی کوردستان .}

^{لە غەیری ئەوەدا قۆناغی دەرجالێدان، بەردەوام بوونی وەزعی مەوجوود، چەقبەستووی و جەنگی رەوانی و بەفیرۆدانی وزە و توانای ناوخۆیی حیزبەکان و هەڵتەکاندنی رۆژهەڵاتی کوردستانە.}

^{ئەوەی گرینگە کە تێکرا کاری بۆ بکەین، رۆژەڤ کردنی پرسی کوردی رۆژهەڵاتی کوردستانە، هەروەها پێویستە کە کوردی ئەو بەشە بێتە ناو بازنەی معادلاتی ناوچەیی و جیهانی و ناخۆیی ئێراندا. بێ گومان ئەوەش بە تێکۆشانی گشتگیر و لە چوارچێوەی پلاتفۆرمێکی هاوبەش دا و بە شێوەی سیستماتیک سەردەگرێت.}

٢٨/١١/٢٠١٨