فەرید زامدار
دواى چه‌ند ڕۆژێك و پاش ڕیفراندۆمه مێژووییه‌كه‌ى كۆمه‌ڵانى خه‌ڵكى كوردستان، هێزه شه‌ڕانگێزه‌كانى عێراق به حه‌شدى شه‌عبىییەوە، هێرشیان كرده سه‌ر شار و شارۆچكه كێشه له‌سه‌ره‌كان و هه‌ر له شارى خورماتووه‌وه تا ده‌گاته شارى كه‌ركووك، ده‌ستیان به کوشتن و وێرانكردن و سووتاندنى موڵك و ماڵى هاووڵاتییانى كورد و تاڵان و بڕۆى ئه‌و هاووڵاتییانه و ئاواره‌بوونیان بۆ ناوچه‌كانى كه‌لار و گه‌رمیان و هه‌ولێر و سلێمانى و حه‌ڵاڵكردنى خوێنى مرۆڤى كورد، ئەنجامدانی ریفراندۆمیشیان کرد بیانوو بۆ ئەو دەستدرێژییە.
ئه‌وه له كاتێكدایه كه عه‌بادى و داروده‌سته‌كه‌ى و ده‌سه‌ڵاتدارانى عێراقى شیعه، ڕۆژانه بانگه‌وازى ئازادى و دیموكراسیه‌ت له عێراقى نوێى دواى (سەدام)دا ده‌كه‌ن.
من یه‌كێكم له‌و (سێ- چوار) ملیۆن كورده‌ى ده‌نگم داوه به (به‌ڵێ) و لێیشى په‌شیمان نیم، چونكه ئه‌و ده‌نگه سه‌روه‌رییه‌كى گه‌وره‌یه بۆ خۆم و بۆ كوردستان و به‌رگرى له‌و (به‌ڵێ)یه‌ى خۆم ده‌كه‌م، حه‌ق وایه هه‌موو ئه‌وانه‌ى ده‌نگیان به (به‌ڵێ) داوه به‌رگرى له‌و (به‌ڵێ)یه‌ى خۆیان بكه‌ن و دوژمنان دڵخۆش نه‌كه‌ن. بۆیە پێویستە سه‌ره‌ڕاى هه‌ڵه سیاسییه‌كان و به‌تایبه‌تى خیانه‌تى چه‌ند كه‌سێكى خۆپه‌رست له ڕیزه‌كانى (ى.ن.ك) كه پێشه‌كیى خیانه‌تیان له یه‌كێتى كرد و پاشان لە خورماتوویی و کەرکووکیەکان هه‌موو كوردستان، سەرکردایەتیی سیاسیی کوردستان ئه‌گه‌رچى ئێستا و له‌و قۆناغه هه‌سته‌وه‌ره‌دا كه پێویستى به یه‌كڕیزیى هه‌موو لایه‌كمان هه‌یه، به تایبه‌تى حزبه سیاسییه‌كانى كوردستان، ناكۆكییه‌كانیان دوا بخه‌ن و هه‌وڵه‌كانیان ته‌رخان بكه‌ن بۆ ده‌رچوون له‌و بارودۆخه ناهه‌مواره‌ى ئێستامان.
له‌و ماوه كورته‌دا، هه‌موو ده‌مامكه‌كانى (عه‌بادى) واڵا كران و ده‌موچاوه ڕاسته‌قینه شه‌ڕانگێزییه‌كه‌ى ئاشكرا بوو، كه چه‌ند داخ له‌دڵێكى قێزه‌ون و ناشیرینه، به‌ڵگه‌ش بۆ ئه‌وه دواى سه‌ردانه‌كانى بۆ لاى ناحه‌زانى گه‌لى كوردستان و دواى وه‌رگرتنى ئۆكه‌ىی توركیا و ئێران، حكوومه‌تى هه‌رێمى كوردستان ڕاگه‌یه‌ندراوێكى بڵاو كرده‌وه و داواى ڕاگرتنى شه‌ڕى له عێراق كرد له هه‌موو به‌ره‌كانى شه‌ڕ و ڕازیبوونى حكوومه‌تى هه‌رێم به (سڕ)كردنى ڕیفراندۆم و داواى گفتوگۆى له به‌غدا كرد. زۆربه‌ى زۆرى وڵاته زلهێزه‌كانى دونیا داوایان له (عه‌بادى) كرد كه ئه‌و پێشنیازه‌ى حكوومه‌تى هه‌رێم قبووڵ بكات و وتووێژ و گفتوگۆ ده‌ست پێ بكه‌ن، به‌ڵام ئه‌و پیاوه نه‌خۆشه دووچارى غروور و له‌خۆباییبوونێكى كوێرانه بووه و ده‌ڵێت ئه‌و (سڕكردن)ه قبووڵ ناكه‌م، به‌ڵكوو حكوومه‌تى هه‌رێم ده‌بێت سه‌رله‌به‌رى ئه‌نجامه‌كانى ڕیفراندۆم هه‌ڵبوه‌شێنێته‌وه و هه‌موو خاڵه سنوورییه‌كان و گومرگه‌كانیش بداته‌وه ده‌ست ناوه‌ند، به ناوچه گاز و نه‌وتییه‌كانیشەوە.
ڕاسته له‌به‌رامبه‌ر ئه‌و هه‌موو هه‌ڕه‌شانه‌ش جیهانى ده‌ره‌وه لێى بێده‌نگ نابێت و (موفاجه‌ئات)ى زۆر به‌ڕێوه‌ن، له‌وانه داننان به حكوومه‌تێكى (كۆنفیدراڵى) و له‌و دواییانه‌ش (عه‌بادى) له چه‌ند دیدارێكیدا ئاماژه‌یه‌كى ئاڵۆزى به سیسته‌مى (كۆنفیدراڵیه‌ت) له عێراقى داهاتوودا كرد، له‌و بڕوایه‌شدام دۆسیه‌ى (كۆنفیدراڵیه‌ت) بۆ كاتێكى گونجاو هه‌ڵده‌واسرێت و ڕۆیشتنى ڕۆژگار جارێكى تر دێته پێشه‌وه.
هیواداریشم عه‌بادى و داروده‌سته‌كه‌ى چیتر به‌رامبه‌ر كورد و حكوومه‌تى هه‌رێم نه‌وه‌ستنه‌وه به‌ر له كوردستان بۆ عێراقیش سه‌قامگیرى مسۆگه‌ر ده‌بێت و ئێمه‌ى كوردیش پێویست ده‌كات ده‌رس و عیبره‌تێكى باش له‌و هه‌ڵوێستانه‌ى (عه‌بادى) و دوژمنانمان وه‌ربگرین و ناوماڵى خۆمان ڕێك بخه‌ینه‌وه و خۆمان بۆ داهاتوو ئاماده بكه‌ین، چونكه غه‌درى زه‌مانه زۆر ده‌رفه‌تى گه‌وره‌ى له‌ده‌ست داوین به‌هۆى درك نه‌كردمان به (ئه‌حكامه‌كانى قۆناغه یه‌ك له‌دواى یه‌كه‌كانى ئه‌زموونى خه‌باتى سیاسیمان) و پێویسته نه‌هێڵین ئه‌و (ئه‌حكامانه) وا به‌ئاسانى تێپه‌ڕن و ده‌بێت له‌مه‌ودوا خوێندنه‌وه‌ى وشیارانه و ژیرانه‌مان له‌سه‌ر ئه‌و قۆناغه چاره‌نووسسازانه هه‌بێت و بتوانین به‌ره‌نگاریى كێشه‌كان ببینه‌وه و خۆمان له خانه‌كانى سه‌ركه‌وتن و به‌ره‌و پێشه‌وه‌چوون ببینینه‌وه و دیفاكتۆییانه مامه‌ڵه له‌گه‌ڵ ڕووداوه‌كاندا بكه‌ین.
له‌كۆتاییدا ده‌ڵێم، كێشه‌كانى عێراق و هه‌رێمى كوردستان به سیسته‌مى (كۆنفیدراڵیه‌ت) كۆتایی دێت و ته‌نیا چاره‌سه‌ره بۆ ده‌رچوون له ته‌نگژه‌كانى ئێستا و داهاتوو.
1/11/2017
