د.دلاوەر ئاژگەیی 

^{ئەمڕۆ داواکاری ڤیزای وڵاتان بە تایبەتی وڵاتانی ئەوروپی بۆ هاونیشتمانیانی کوردستان پرسێکی گرنگە بە تایبەتی بۆ ئەو کەسانەی کە بۆ وەرگرتنی چارەسەری پزشکی یا کاری بازرگانی یا خوێندن و گەشتوگوزار نیازی سەفەریان هەیە بۆ دەرەوەی وڵات.} بیگومان وەرگرتنی ڤیزا بە تایبەتی ڤیزای شنگن کارێکی ئەستەمە و رۆژانە خەڵکانێکی زۆر داواکاری پێشکەشی کۆنسوڵی وڵاتان دەکەن و چاوەڕوانی وەرگرتنی ڤیزای ئەوروپان و لە زۆر حاڵەتدا داواکارییەکانیان رەتدەکرێنەوە.

^{چارەسەری بنەڕەتی بۆ ئەم کێشەیە رێککەوتنی نێوان کوردستان و وڵاتانی ئەندام لە یەکێتی ئەوروپا و وڵاتانی دیکەیە بە شێوازیک کە رێککەوتن بکرێت تا لە داهاتوودا هاونیشتمانیانی کوردستان بە ئاسانی ڤیزایان پێ بدرێت بۆ ئەوەی بتوانن بە ئاسانی سەفەرەکانیان ئەنجام بدەن.} ئەو جۆرە رێککەوتنەش ناکرێت کاری لە سەر بکرێت تاوەکو ئەو کاتەی کوردستان وڵاتێکی سەربەخۆ نەبێت و بە پێی یاسایی نێودەوڵەتی مافی واژۆکردنی رێککەوتنامەکانی نێودەوڵەتی نەبێت.

^{ئەم بابەتە لە زۆر کۆبوونەوە لە گەڵ لایەنە دەرەکییەکان باسی لێوەکراوە و وەڵامەکە ئەوە بووە کە کوردستان ئەگەر وڵاتێکی سەربەخۆ و خاوەن پاسپۆرتی خۆی با دەیتوانی ئەو داواکارییە پێشکەش بە وڵاتان بکات و رێککەوتنی لە سەر بکات.}

^{لەلایەکی دیکەوە کۆمپانیا فڕۆکەوانیە بیانییەکان بە رێژەیەکی بەرچاو سەفەر بۆ کوردستان زیاد دەکەن و هێڵی ئاسمانی ئەو وڵاتانەی کە تاوەکو ئیستا گەشتیان بۆ کوردستان دەست پێنەکردووە، گەشتەکانیان دەست پێ دەکەن و ئەمەش دەبێتە هۆی دابەزینی نرخی بلیتی سەفەر بۆ هاونیشتمانیان.}

^{بە واتایەکی دیکە سەربەخۆیی کوردستان دەرگاکانی دەرەوە بەڕووی هاونیشتمانیانی کوردستان دەکاتەوە و بوار بۆ سەفەرکردن بە رێژەیەکی بەرچاو ئاسانتر دەکا.}

^{*دلاوەر ئاژگەیی، نوێنەری حکومەتی هەرێمی کوردستان لە یەکێتی ئەوروپا}

^12/9/2017