^{غەفوور مەخمووری}

^{کارکردن بۆ سەربەخۆیى کوردستان ئەرکى هەموو لایەکمانە
گەلى کوردستان بەدرێژایى مێژوو لە تێکوشان و بەرخودان دابووە، سەرەڕاى هەوڵەکانى لە ناوبردنى گەلى کوردستان بە خاک و خەڵکەوە، بەڵام توانیویەتى پارێزگارى لە بوونى خۆى بکات و رووبەڕووى هێرش و پەلامارى دوژمنان و داگیرکەران ببێتەوەو دواى هەر کەوتنێک بە گڕوتینێکى نوێوە هەڵسێتەوە.}

^{کورد وەک نەتەوەیەکى زیندووى رۆژهەڵاتى ناڤین لە رابردوودا رۆڵێکى کاراى گێڕاوە لە بیناکردنى شارستانییەتى ناوچەکەدا، بەدڵنیاییەوە ئەگەر بوارى پێبدرابووا ئێستا دەیوانى رۆڵێکى کاراتر ببینێت لە بیناکردنى کۆمەڵگایەکى مۆدێرن و دیموکرات لە رۆژهەڵاتى ناڤیندا، دەیتوانى نموونەیەکى زیندووى حوکمڕانى و پێکەوەژیان پێشکەشى هەموو جیهان بکات، بێگومان ئەمەش ئەو کاتە دەبێت کەوا گەلى کوردستان سەربەخۆو خاوەن دەوڵەتى خۆى بێت.}

^{سەربەخۆبوونى کوردستان کەوا بابەتى گەرمى ئێستاى میدیا جیهانى و ناوچەیی و ناوخۆییەکانە و بۆتە جێى بایەخ و لێکۆڵینەوەى ناوەندە سیاسى و ئەکادیمییەکانى جیهان وایکردووە کەوا دۆستمان زێدەبن و بەچاوى هیواوە لێمان بڕوانن، لەسەر ئێمەى گەلى کوردستان و سەرکردایەتى سیاسى کوردستانە کەوا بە بایەخەوە لە و پشتیوانییە بڕوانین و ئەو هەلە لەدەست خۆمان نەدەین و بە هەموو لایەکمان و بە هاوبەشى کارى بۆ سەربەخۆیى کوردستان بکەین و بیکەین بە پرسێکى نەتەوەیى و نیشتمانى، بۆئەم مەبەستەش پێویستە بە زووترین کات ناوەندى سیاسى کوردستان رێکبخرێتەوە و لەو پەرشى و بڵاوییە دەرباز بکرێت و (ئەنجوومەن سیاسى کوردستان) پێکبهێنرێت و تەواوى لایەنە سیاسییەکانى کوردستان بگرێتەخۆ.}

^{پێکهێنانى (ئەنجوومەنى سیاسى کوردستان)؛ دەبێتە فاکتەرێکى بەهێز بۆ یەکڕى و یەکدەنگى گەلى کوردستان و کۆکردنەوە و یەکخستنى توانا سیاسییەکانى گەلى کوردستان و، سەرەتایەک دەبێت بۆ خاوکردنەوەى گرژییە سیاسییەکان و کۆتایى هێنان بە ململانێى نێوان لایەنە سیاسییەکان و دەبێتە مینبەرێکى سیاسى بەهێزو مۆراڵ بەخش لەسەر ئاستى ناوخۆ و دەرەوە.}

^{دواى پێکهێنانى (ئەنجوومەنى سیاسى کوردستان)؛ پێویستە سەرکردایەتى سیاسى کوردستان (بۆردى سەربەخۆیى کوردستان) پێکبهێنێت، بۆئەوەى ئەم بۆردە بتوانێت کارنامەیەکى گشتگیر دابڕێژێت بۆ چۆنییەتى کارکردن بۆ ئەنجامدانى ریفراندۆم و هەنگاونان بەرەو سەربەخۆیى کوردستان، بێگومان بۆئەمەش دەکرێ سوود لە ئەزموونى زۆر لە میللەتان و وڵاتان وەربگیرێت، کەوا چۆن کاریان کردووە بۆ راگەیاندنى سەربەخۆیى خۆیان.}

^{پێویستە پێکهاتەى (بۆردى سەربەخۆیى کوردستان)؛ بریتى بێت لە کەسانى شارەزا لە یاسا نێودەوڵەتییەکان و کەسانى ناسراوو کاریگەرى کورد و بیانى کەوا ناسراو بن لەسەر ئاستى نێودەوڵەتى؛ بۆئەوەى بتوانن لەسەر ئاستى جیهان و لە ناوەندە بڕیاربەدەستەکان لوبى بۆ سەربەخۆیى کوردستان بکەن، کەسایەتى وابن کەوا خودان ئەزموون و بەدەسەڵات بن بۆئەوەى گوێیان لێبگیرێت، لەم رووەوەش دۆستى زۆر باشمان هەن.}

^{پرسى (سەربەخۆیى کوردستان)؛ پرسێکى نەتەوەیى و نیشتمانییە نەک پرسێکى حزبى، بۆیە پێویستە تەواوى لایەنە سیاسییەکان و پێکهاتە نەتەوەیى و ئایینییەکانى کوردستان لەم پرسەدا راوێژیان پێبکرێت و گوێیان لێبگیرێت و بۆچوونەکانیان بەهەند وەربگیرێت، ئەمەش وادەکات کەوا ئەم پرسە ببێتە پرسێکى میللى و هەموو لایەک ئەم پرسە بە پرسى خۆى بزانێت و بە گەرمى کارى بۆ بکات.}

^{ئەو هەلەى کەوا ئێستا بۆ گەلى کوردستان رەخساوە هەلێکى مێژوویە و پێویستە سوودى لێوەربگرین و لەدەست خۆمانى نەدەین و، نەیکەینە قوربانى بەرژەوەندییە حزبییەکان، لەم پێناوەدا پێویستە هەموو لایەکمان بەرژەوەندى خۆمان لە بەرژەوەندى گشتیدا ببینینەوە و، جلى تەنگى حزبایەتى فڕێبدەین و جلى کوردایەتى بپۆشین، ئەگەر هەموو لایەکمان سوودمان لەو هەلە مێژووییەى ئێستا وەرگرت و بەیەکەوە کارمان بۆ سەربەخۆیى کوردستان کرد، ئەوا شانازییەکى مێژووى بۆ گەلى کوردستان تۆمار دەکەین، ئەگەر ئەوەشمان نەکرد ئەوا مێژوو بەزەیى بەکەسدا نایەتەوە، بۆیە پێویستە بە رۆحییەتێکى نەتەوەیى و نیشتمانى کاربکەین و گەلى کوردستان بگەیەنین بە کەنارێکى ئارام، بێگومان ئەو کەنارە ئارامەش تەنها سەربەخۆیى و دامەزراندنى دەوڵەتى کوردستانە.}

^31/5/2017