سالح زاهیر زێباری
كەساتیا تاكێ كورد ب درێژاهیا دیروكێ كەفتی یە بەر ڤەكولینا گەروك و روژهەلاتناس و روژنامەڤان و ئەكادمیستێن روژهەلاتی و روژئاڤایی.ژ ئەنجامێ ڤەكولین و خاندن و شلوڤەیێن ل سەر كەساتیا كورد هاتیە كرن دیار بویە و ب گروڤەیا هەمی وان كەسێن روژەكێ ل سەر میللەتێ كەڤنار نڤێسی هەر ژ زینەفون و مسعودی و هەتا دگەهیە میجەر نوئیل و مینورسكی و باسیل نیكیتین و مارك سایكس و ئولاند ویلكنس و لازاریف ...هتد. ب سەدان كەساتیێن دی هەنە ب تایبەتی ل سەر كوردان و جڤاكێ كوردی و كەساتیا تاكێ كورد نڤێسیە و زور شارەزایێن دیتر هەبوینە دەمێ ڤەكولین ل سەر دەڤەرا روژهەلاتا ناڤین كری بەحسێ كوردا ژی هاتیە كرن.
ل ڤان هەمی ڤەكولین و خاندن و شلوڤا دا دیار دبیت كو تاكێ كورد ل جڤاكێن روژهەلاتی دا خودان كەساتیەكا جودا بویە و ب دەهان و سەدان سیفەتێن تایبەت هاتیە جوداكرن ل گەلێن دەڤەرێ ژ تورك و فورس و ئەرەب و چركەس و ئازر و ئەرمەنیا. ژ وان سیفەتێن كو كورد پێ هاتیە ناسكرن زیرەكا ویە وەك تاك و خودان هێزەكا بێ هژمار بویە تاكێ كورد كو گەلەك ژ شارەزایان وێ هێزا زور بو هەبونا ژیانەكا پری ئاستەنگ ڤەگەدرینن. تاكێ كورد بێ شەر شەركەر بویە ژ بەر زەحمەتیێن ژیانێ ژبەر بن دەستیێ,لەوما هەر دەمێ كەسەكێ ل سەر كوردا چەند پەیڤەك نڤێسی بن زیرەكی و ب جەرگ و خودان شیان و شەرڤانی ل كەساتیا تاكێ كورد نەهاتیە جودا كرن.
ب درێژاهیا دیروكێ گەلێ كورد هاتیە تەپەسەركرن ژ ئالیێ وەلاتێن داگیركەر ڤە , ڤێ چەندێ تاكێ كورد پالدایە بو هندێ كو هزر ژ ژیانەكا سەربەست و سەربەخو بكەت و بەردەوام كار بكەت ب چەكێ خویێ تایبەت شەرێ وەلاتێن مەزن و حكومەتان بكەت. زیرەكی و وێرەكیا كوردان بیە پەیڤەك یەكسان ل گەل ناڤێ كوردان. بدرێژاهیا دیروكێ هەتا سالا 2014 دەمێ تیرورستێن داعش هێرش كریە سەر سەنگەرێن هێزێن پێشمەرگێ كوردستانێ , داعش وەك هێزەكا درەندە و پری چەك و تاما خوسارەتێ نەدیتی ژ بەرسینگێ پێشمەرگەی ئەفسانە و ئەو پەیڤا دگوت داعش ناشكیێن وەكی ل دیروكێ دا دگوت مەغلول ناشكیێن ئەو بو شكستن. پشتی سەركەفتنێن بێ وێنەیێن هێزێن پێشمەرگەی و پاشڤە برنا تیرورستێن داعش و كوشتن و برینداركرن و گرتنا هزاران چەتێن داعش ب وی چەكێ سڤك و كەڤن كو د دەستێن پێشمەرگەی دا هەبوو, ناڤەندێن هەرێمی و نێڤدەولەتی و راگەهاندنێن جیهانی و هەتا سەركردێن مەزنە وەلاتێن جیهانێ ژ پشت زەریا ل سەروك ئوبامای هەتا ئولاند و پوتێن و هەتا دگەهیتە سەركردێن وەلاتێن عەرەبی و ئیسلامی كوهەتا ڤی چاخی بەرهەڤ نەبوینە ب زمان ژی دان پێدانێ ب سەربەخویا كەساتیا تاكێ كورد بكەن.
پەیڤێن كوردا ل شەرێ داعشێ رولەكێ مەزن دیت یان كورد شەرڤانێن زیرەكن و كورد بەرامبەر هەمی جیهانێ شەرێ داعشێ دكەن و رولێ كوردا ل شەرێ دژی داعشێ دا یێ میحوەریە و زورگرنگ و هەروەسا گوتنێن وەكی كوردا ل شەرێ داعشێ پێكهاتێن جودا جودا پاراستن...هتد.ئەڤە هەمی راستە و بو دیروكێ زور گرنگە و رەدەكا مەعنەوەیە و جهێ دلخوشیا هەر تاكەكێ كوردە دەمێ ب سەربەرزی و زیرەكی و شەرڤانیا تاكێ كورد دئێتە گوتن تایبەت بەرامبەر تیرورستێن داعش.
سوپاس بو هەمی ئالیەكێ بەس كورد نە زەنجی و هێزێن لیڤی نە ب كرێ شەری بكەن, نەخێر. كورد ڤی شەری دكەن بو رزگار بون ل تاریاتیا داعشێ كو بناڤێ ئولێ ئیسلامێ یێ پیروز ڤان هەمی قەبحەتان دكەن.هەروەسا تاكێ كورد وەكی بەحس ژێ هاتیە كرن تاكەكێ خودان شەرەف و نامیس بیە و چ جارا نەهێلایە كو كەسەك هێرشێ بكەت سەر ژنەكا كورد بەردەوام كوردا شەر كریە كو ژن نەهێتە هەتكرن بەرامبەر وەلاتان راوەستیانە نە كو داعشەكێ كو ب كرێ و ب بێ ئاقلی شەری دكەت. شەرێ كوردا بو پاراستنا توڤی پێكڤە ژیانێ یە ل ناڤ كوردستانێ دا.هەروەسا بو پێشڤەبرنا ڤێ هەرێمیە و ڤەگەراندنا ئاخا پیروزا كوردستانێ یە و گەهشتنە ب سەربەخویێ.ئەڤ شەرە نە بو چ كەسەكێ یە,لەوما ل جهێ هندێ ل سەر راگەهاندنێن جورا و جور بەحس ژ زیرەكیا تاكێ كورد و هێزێن پێشمەرگەی و شەرڤانێن كورد بێتە كرن, فەرە ل هەمێ جیهانێ كار بێتە كرن بو هندێ كوردستان سەربەخو بیت ئەڤە باشترین دیاریە بو پتر ژ دەه هزار قوربانیێن هێزێن پێشمەرگەی.
كاریگەریا كەش و هەوا و سروشتێ كوردستانێ و ئەو شەر و كوشتار و دەردەسەریێن ب ئەگەرێ داگیركاریێ هاتیە سەرێ گەلێ كورد, تاكەك ئاڤا كریە كو سیستەم هەبیت یان نە چەك هەبیت و نەبیت پشتەڤانی هەبیت و نەبیت ئەو هەر شەرڤانە و گیان فیدایە. لەوما زور ل گەروك و روژنامەڤان و ئەو كەسێن بیانی كو سەرەدانا كوردستانێ كری هەمی ب ئێك دەنگ و ب ئێك رەنگ ب جەرگ و قەهرەمانیا تاكێ كورد ددەنە نیاسین تایبەت ل شەرێ دژی داعشێ دا , بەلێ ئەڤ گوتنە هەمی د ڤان روژان دا مفای ب كورد و كوردستانێ ناگەهینن ژ بلی پشتەڤانیا راستە راست و پشتگیری كرنا سەربەخویا كوردستانی. ئەڤ پێنگاڤە دلێ خێزانێن شەهیدا خوش دكەت نە ئەو بیانێن كوردان ب( فورسانێن روژهەلاتێ) د دەنەنیاسین.
3/1/2017
