هێمن عەبدوڵڵا

^{گوتەبێژی حەشدی شەعبی هۆشدارییەكی سەرنجڕاكێشی داوەتە توركیا: "لە هەر شوێنێك لە موسڵ تووشی هێزە توركییەكان ببین، وەك داعش مامەڵەیان لەگەڵ دەكەین". لێدوانەكە بۆیە سەرنجڕاكێشە، چونكە هەم حەشدی شەعبی و هەم سوپای توركیاش ناڕەزاییان هەیە لەسەر بەشداریكردنیان لە شەڕەكەدا، كەچی شیر و تیر لەیەكدی دەسوون. هەولێر و بەغدا و هاوپەیمانانیش دەڵێن هۆكاری دواكەوتنی ئۆپەراسیۆنەكە لەسەر ئەوەیە رێككەوتن نەكراوە بۆ قۆناغی پاش داعش كە كێ بەشداری بكات و دوای ئەوە چۆن بەڕێوەببرێت، بەڵام هەرواش وێنەی موسڵی پاش داعش وردە وردە خەریكە زەلال دەبێت. وێنەی شارێك كە وەك حەلەبی لێدێت و هەر كۆڵانێكی دەكەوێتە دەست هێزێكی ئیقلیمی.}

^{موسڵ بووەتە كێكێك كە بۆ هەریەكە لە بەشداربووانی ئۆپەراسیۆنە چاوەڕوانكراوەكە تامێكی جیاوازی هەیە. بۆ عەبادی و حكومەتی عێراق، چوونەوەی سوپای عێراق بۆ نێو موسڵ كڕینەوەی شكۆیەكی لەدەستچووە كە مالیكی-ی ركابەری عەبادی سەبەبكاری بوو. بۆ كوردستان تامی ئۆپەراسیۆنەكە لەوەدایە دۆزی ناوچە كوردستانییە ناكۆكی لەسەرەكان، كە تا بەر لە هاتنی داعش گرێكوێرەیەكی گەورە بوو و زۆرمان وامان دانابوو كە ئیدی دۆڕاندوومانە لەو دۆزەدا، ئاسانتر چارەسەر دەبێت.}

^{بۆ هاوپەیمانان و بەتایبەتیش ئیدارەی ئۆباما، سەركەوتن لە موسڵ هاوكارییەكی باش دەبێت بۆ سەركەوتن لە هەڵبژاردنە چاوەڕوانكراوەكەی كۆتایی ئەمساڵ. بۆ ئێران كێكەكە هەمان تامی سەركەوتنی ستراتیژیی ئەو دەوڵەتەیە لە ململانێكانی عێراق و سووریا و لوبنان و یەمەن. ئەوەی لەو نێوانەدا هێشتا پشكی دیار نییە و پەلە پرووزەیەتی شتێكی بەربكەوێت توركیایە. بێگومان بۆ ئەویش موسڵ تامی وەدیهاتنی خەونێكی عوسمانییانەیە كە دەمێكە بەم ناوچەیەوە دەبینرێت.}

^{هەموو ئەوانە وادەكەن وێنەی موسڵی پاش داعش لەوەی ئێستا ترسناكتر بێت. بەتایبەتیش كە نموونەی حەڵەب هێشتا چیرۆكێكی بەردەوامە و بە قۆناخەكانی موسڵی ئێستادا تێپەڕیوە. لە حەلەب سەرەتا حكومەتی سووریا هەبوو. دوایی شارەكە دابەش بوو بۆ سەر سێ بەش: بەشێكی حكومەت، بەشێكی ئۆپۆزیسیۆن و بەشێكی كورد. دواتر شەڕ لەنێو شار درێژەی كێشا. هێزی نوێی توندئاژۆ هاتن و شیرەكە هێندە كۆن بوو كە فێڵی تێكەوت.}

^{ئەنجامی كۆتایی ئەوەیە كە ئێستا ئەمریكا و هاوپەیمانەكانی و رووسیا و توركیا و سووریا و ئێران و گرووپە توندئاژۆكان و كوردیش لەو شارەدا لە كۆڵان بە كۆڵان و ماڵ بە ماڵی خەریكی یەكلاكردنەوەی حیساباتەكانیانن لەگەڵ یەكدی. شەڕی حەڵەب و وێنەی منداڵانی قوربانیی جەنگ لە حەڵەب و مەرگەساتەكانی هێندە دووبارەبوونەتەوە كە چیدی خەڵك راناچڵەكێنن.}

^{ئەوەی كە دیارە موسڵیش لەپاش داعش بەو ئاراستەیەدا دەڕوات. رەنگە سەرەتا شەڕەكە لەنێوان هێزە شیعە و سوننەكاندا دروستبێت. بەدوایدا هەندێك گروپی جیهادیی سپۆنسۆركراو لەلایەن توركیا و سعودیە و قەتەرەوە دروست دەبن و دەست بەسەر هەندێك ناوچەیدا دەگرن. هێزە شیعەكانیش دەستەوەستان نابن و بەیارمەتیی ئێران هەندێك ناوچەی دیكە كۆنترۆڵ دەكەن.}

^{كۆمەڵگەی نێودەوڵەتی چاوەكانی دادەخات و رووسیا پاش ئەزموونی سەركەوتووی لە سووریا، فڕۆكە و هێز بۆ عێراقیش دەنێرێت. توركیا و ئەمریكا و هێزەكانی دیكەش بۆ راگرتنی باڵانسی هێز، فڕۆكە بۆ پشتیوانی لە هێزە سوننە و دژە ئێران و رووسییەكان دەنێرن. ئەنجامەكەشی ئەوە دەبێت كە ماوەیەكی دوور و درێژ باشووری كوردستان یان دەبێتە مەیدانی جەنگێكی ئیقلیمی، یان هاوسنوور دەبێت لەگەڵ زۆنی جەنگ. مەترسیی گەورەتریش ئەوەیە بەو حاڵەوە كە هەمانە، ئاگرەكەی موسڵ باشووری كوردستانیش بسووتێنێ و دوو ئیدارەی كوردی بەسەر دوو بەرەی شیعە و سوننەدا دابەش ببن.}

^11/10/2016