(2).jpeg)
سۆران کەریم
هاوپه‌یمانیى ده‌وڵه‌تى یاسا پێشبینی ده‌كات، ڕیفراندۆم له‌سه‌ر سەربەخۆیی هه‌رێمى كوردستان، له به‌رژه‌وه‌ندیی جیابوونه‌وه‌ی هەرێمی کوردستان له عێراق كۆتایی پێبێت. جەختیش لەوە دەکاتەوە کە هاوپه‌یمانێتییه‌كه‌یان له‌گه‌ڵ هه‌ریه‌ك له یه‌كێتى و گۆڕان په‌یوه‌ندییان هه‌یه و به‌رده‌وامه، به‌ڵام له‌گه‌ڵ پارتى و سه‌رۆكى هه‌رێمی کوردستان هیچ په‌یوه‌ندییه‌كیان نه‌ماوه.“سه‌عد مەته‌ڵه‌بى”، سه‌ركرده له هاوپه‌یمانیى ده‌وڵه‌تى یاسا و كه‌سى نزیكی “نوورى مالیكی”، سه‌رۆكى هاوپه‌یمانێتییه‌كه، تایبەت بە (باسنیوز)ی ڕاگه‌یاند: "ئێمه دژ به‌و ڕیفراندۆمه‌ین كه سه‌رۆكى هه‌رێمى كوردستان داواى ئه‌نجامدانى ده‌كات و هیواخوازین گه‌لى كوردستان وه‌كو به‌شێك له عێراق بمێنێته‌وه".ئاماژه‌ى به‌وه‌ش دا، كه پێشبینی ده‌كه‌ن، ئه‌گه‌ر ڕیفراندۆمه‌كه بكرێت، زۆرینه‌ى ده‌نگ له به‌رژه‌وه‌ندیی ئه‌وه‌دا بێت، كوردستان له عێراق جیا بكرێته‌وه، به‌ڵام دواجار گه‌لى كوردستان زیانیان پێده‌گات و له‌گه‌ڵ ئه‌و عه‌ره‌بانه هه‌ڵناكه‌ن كه له‌گه‌ڵیاندا هاوسنوورن.
ئه‌و سه‌ركرده‌یه‌ی هاوپه‌یمانیی ده‌وڵه‌تى یاسا، كه هاوكات سه‌رۆكى گردبوونه‌وه‌ى گه‌نجانى ده‌وڵه‌تى یاسایه و له چوارچێوه‌ى ئیئتیلافی دەوڵەتی یاسا دایە، ئەوەشی بۆ (باسنیوز) ڕوون کردەوە: "هه‌رێمى كوردستان كۆمسیۆنی هه‌ڵبژاردنى سه‌ربه‌خۆى نییه كه له لایه‌ن حكوومه‌تى عیراقه‌وه دان پێدانراو بێت، بۆیه ئه‌مه له ئاینده‌دا ده‌بێته كێشه بۆ كوردستان، ئه‌گه‌ر ده‌وڵه‌ت ڕابگه‌یه‌نێت".
له‌باره‌ى په‌یوه‌ندییه‌كانى دەوڵەتی یاسا له‌گه‌ڵ لایه‌نه كوردستانییه‌كان، سه‌عد مەته‌ڵه‌بى بۆ (باسنیوز)ی ئاشکرا کرد: "ئێمه له‌گه‌ڵ یه‌كێتیی نیشتمانیی كوردستان و بزووتنه‌وه‌ى گۆڕان، په‌یوه‌ندییه‌كانمان به‌رده‌وامه و هیچ كێشه‌یەكمان نییه، به‌ڵام له‌گه‌ڵ پارتى دیموكراتىی كوردستان و “مه‌سعود بارزانى”، سەرۆکی هەرێمی کوردستان، په‌یوه‌ندیمان نه‌ماوه". جەختیشی لەوە کردەوە کە پەیوەندییەکانی نێوان “نووری مالیکی” و “مەسعود بارزانی” بە تەواوەتی پچڕاون، گوتیشی: “ئه‌گه‌ر په‌یوه‌ندییه‌كیش له‌گه‌ڵ پارتیدا هه‌بێت، ته‌نها له‌سه‌ر ئاستى كه‌سه‌كانه و په‌یوه‌ندیی فه‌رمى نییه”.
3/3/2016
