(2).jpeg)
د.هیوا سه‌ید سه‌لیم
هیچ كاتێك توركیا به قه‌د ئه‌و دوو ساڵه ئه‌زیه‌تی وڵاتانی ناوچه‌كه‌و ئه‌وروپای نه‌داوه ، توركیا به هاوكاری بۆ گواستنه‌وه‌ی ئه‌و ئه‌ندامانه‌ی داعش كه له ئه‌وروپاوه ده‌چوونه سوریا و عێراق وه‌ك وڵاتێكی پشتوپه‌نای داعش ناسراوه ، زۆرێك له چاودێران و یه‌رپرسانی ئۆپۆزسیۆنی توركیا له‌و دووساڵه په‌رده‌یان له‌سه‌ر هاوكاریه‌كانی حكومه‌تی پارتی دادوگه‌شه‌پێدان له توركیا بۆ رێكخراوی تیرۆرستی داعش ڕاماڵی و به ئاشكرا باسیان له هاوكاری حكومه‌ته‌كه‌ی ئه‌ردۆگان بۆ ئه‌و رێكخراو تیرۆرستیه ده‌كرد ، ئێستا له كاتێكدا كه توركیا بڕیاریداوه ببێته به‌شێك له هاوپه‌یمانیه‌تی نێوده‌وڵه‌تی دژ به داعش !!!
ده‌یه‌وێت به شێوازێكی تر سه‌رئێشه بۆ وڵاتانی ئه‌وروپا درووست بكات ، ئه‌ویش به ئاسانكاری بۆ رۆیشتنی لێشاوی كۆچبه‌ران له وڵاتانی سوریا و عێراق به هه‌رێمی كوردستانیشه‌وه بۆ وڵاتانی ئه‌وروپا .
ئه‌وه‌ی ئێستا ده‌وڵه‌تی توركیا ده‌یكات له كارئاسانی بۆ تێپه‌ڕبوونی كۆچبه‌ران و گه‌یشتنیان به لێواره‌كانی ده‌ریا له وڵاتانی ناو په‌كێتی ئه‌وروپا ، بۆ درووستكردنی پشێویه له‌و وڵاتانه ، كه توركیا ماوه‌ی چه‌ند ساڵێكه له چاوه‌ڕوانیانه تا قه‌بولی بكه‌ن به ئه‌ندام له یه‌كێتیه‌كه‌یان یه‌كێتی ئه‌وروپا ، ئه‌وه‌یان له‌سه‌ر ئاستی ده‌ولی و په‌یوه‌ندیه نێوده‌له‌تیه‌كان ، له‌سه‌ر ئاستی ناوچه‌كه‌ش هه‌ر له‌سه‌ره‌تایی سه‌ڕهه‌ڵدانی شۆرشی سوریا ، ده‌وڵه‌تی توركیا خوازیاری ئه‌وه‌بوو له گۆڕانكاریه‌كانی سوریا رۆڵی سه‌ره‌كی پێبسپێردرێت ، له‌و پێناوه‌ش چه‌ند مه‌رجێكی هه‌بوو ، هه‌رله‌وه‌ی هاوپه‌یمانان به‌ڵێنی ئه‌وه‌ی پێبده‌ن كه رژێمی سوریا ده‌روخێنن و ده‌ستی توركیاش ئاوه‌ڵابكرێت له درووستكردنی ناوچه‌ی ئارام له‌ناو خاكی سوریا وئه‌و ناوچه‌یه‌ش له ژێر كۆنتڕۆلی خۆیدا بێت ، هاوكارینه‌كردنی هێزه كوردیه‌كان به تایبه‌تیش پارتی یه‌كێتی دیموكراتی (په‌یه‌ده) .
ئێستا كاتێك دوو ساڵ به‌سه‌ر شۆرشی سوریا تێده‌په‌ڕێت نه رژێمی سوریا رووخاوه ، نه‌توركیاش ده‌رفه‌تی پێدرا كه ناوچه‌ی ئارام له‌ناو خاكی سوریا درووست بكات ، په‌یه‌دیش نه‌ك هه‌ر هاوكاری كرا بگره له دوایین دیداری برێت مه‌كگورگ نوێنه‌ری ئۆباما بۆ شه‌ڕی داعش و ساڵح موسلیم و مه‌سعود بارزانی كه له‌م چه‌ند رۆژه ئه‌نجام درا ، هێزه‌كانی یه‌په‌گه و یه‌په‌ژه وه‌ك به‌شێك له هاوپه‌یمانی دژ به داعش قه‌بوول كران ، له‌به‌رامه‌به‌ر هه‌موو ئه‌و گۆڕانكاریانه‌ی كه هیچیان به خواست و له قازانجی توركیا نه‌بوون ، ئه‌و وڵاته دێت چی ده‌كات ؟
ده‌بینین توركیا هاتووه ده‌رگا له‌به‌رده‌م لێشاوی په‌نابه‌رانی سوریا ده‌كاته‌وه بۆ ئه‌وه‌ی له‌لایه‌ك به جیهان بڵێت كه به قسه‌ی توركیاتان نه‌كرد ، به‌وه‌ی ئه‌گه‌ر ناوچه‌ی ئارامتان درووستكردبا ئێستا خه‌ڵك به‌وشێوه‌یه رووی له وڵاتانی ئێوه نه‌ده‌كرد ، به دیوه‌كه‌ی تریش توركیا پێیوایه به‌و دۆخه‌ی درووست بووه ئیتر ده‌بێت وڵاتان بزانن به‌بێ ئه‌و ئاشتی و ئارامی بۆ ناوچه‌كه ناگه‌ڕێته‌وه .
به‌و سیاسه‌ته‌ی كه توركیا و ده‌سه‌ڵاتدارانی ئاكپارتی به‌ڕێوه‌ی ده‌به‌ن ، ئیدی نه‌ك توركیا خه‌ونی بوونه ئه‌ندامی له یه‌كێتی ئه‌وروپا نامێنێت ، بگره توركیا وه‌ك وڵاتێك كه مایه‌ی هه‌ڕه‌شه‌یه بۆ ته‌واوی وڵاتانی ناوچه‌كه و رۆژئاوا ده‌ناسرێت ، ئه‌وه‌شیان رێك پێچه‌وانه‌ی ئه‌و به‌رنامه‌یه كه ئه‌حمه‌د داودئۆغلو پێش ئه‌وه‌ی ببێته سه‌رۆك وه‌زیرانی توركیا داینابوو ، كه ناوی نابوو سفركێشه ، واتا سفر كردنه‌وه‌ی كێشه‌كانی وڵاته‌كه‌ی .
ئه‌مه‌و توركیا به هه‌مان شێوه مامه‌ڵه له‌گه‌ڵ كۆچبه‌رانی هه‌رێمی كوردستان ده‌كات ، له‌وه‌ی ئه‌وپه‌ڕی كارئاسانی ده‌كات بۆ رۆیشتنیان و به جێهێشتنی وڵاته‌كه‌یان ، كه جاران وێسته‌گه‌ی زه‌حمه‌ت بۆ گه‌یشتن به ئه‌وروپا له‌به‌رده‌م كۆچبه‌رانی كورد وڵاتی توركیا بوو ، كه كۆچبه‌ران ده‌یان چیرۆكی ناخۆشیان هه‌یه له گرتن و ئازاردان و رووتكردنه‌وه‌یان له لایه‌ن باندو مافیاكانی توركیا ، به‌ڵام ئێستا ئه‌وه نه‌ماوه چونكه توركیا به‌رژه‌وه‌ندی له‌و كۆچه‌دایه .
21/9/2015
