(( كۆبانی ته‌نیا نیه ، كۆبانی نامووس و ویژدان و ناسنامه‌ی گشت كوردستانه ))
جه‌ماوه‌ری تێكۆشه‌ری كوردستان
كوردستانیانی خه‌باتگێڕ و شۆڕشگێر
نه‌ته‌وه‌یه‌كگرتووه‌كان،و ئه‌نجومه‌نی ئاسایش
ئه‌مریكا و هاوپه‌یمانی نێونه‌ته‌وه‌یی له‌دژی تیرۆرستانی داعش، و ئازادیخوازانی جیهان
چه‌ند ڕۆژێكه تاریك په‌رست و چه‌ته تیرۆرسته‌كانی داعش، به‌جۆره‌ها تانك و موشه‌ك و تۆپ وە چه‌كی قورس بوردومانی خه‌ستی كۆبانی ده‌كه‌ن، كه‌له‌ئه‌نجامی ئه‌و هێرش و په‌لاماره ناڕه‌وایه‌دا، به‌هه‌زاران هاوڵاتیانی مه‌ده‌نی و سڤیل ماڵ و حاڵی خۆیان جێهێشتووه، له‌سه‌ر ئه‌و بنه‌مایه داوا له‌ڕای گشتی و نه‌ته‌وه‌یه‌كگرتووه‌كان، و ئه‌نجومه‌نی ئاسایش و كۆمه‌ڵگای نێونه‌ته‌وه‌یی، و وه‌زاره‌تی پێشمه‌رگه و ئه‌مریكا و هاوپه‌یمانی نێونه‌ته‌وه‌یی له‌دژی تیرۆر و تیرۆرستانى داعش، و ئازادیخوازانی جیهان ده‌كه‌ین، له‌ڕێگای به‌رفراوانكردنی سنووری جوگرافی ئۆپڕاسیۆنه‌كان، هه‌ڵمه‌تی هێرشی ئاسمانی خێرا و به‌په‌له ئه‌نجام بده‌ن، و به‌هانای گه‌له‌كه‌مان بچن له‌هه‌رێمی كۆبانی و ڕۆژئاوای كوردستان، چونكه ڕه‌وش و دۆخه‌كه له‌و په‌ڕی مه‌ترسی و دووباره‌بوونه‌وه‌ی قه‌لاچۆكردن و پاكتاوی ڕه‌گه‌زی و كۆمه‌ڵكوژی، شێوه‌ى ڕووداو و كاره‌ساته‌كانی شنگالی دووه‌می لێ چاوه‌ڕوان ده‌كرێ، بۆیه ده‌بێ هێزه‌كانی هاۆپەیمانی نێونه‌ته‌وه‌یی له‌دژی تیرۆرستانی داعش، و هێزه‌كانی پێشمه‌رگه و په‌كه‌كه و هێزه‌كانی هه‌ر چوار پارچه‌ی كوردستان، زۆر به‌په‌له و به‌خێرایی فشاری نێونه‌ته‌وه‌یی دروست بكه‌ن و بڕیاری هه‌ماهه‌نگی و به‌هاناوه‌هاتنی ڕزگاركردنی هاوڵاتیانی سڤیلی كۆبانی بده‌ن. هه‌روه‌ها لەم پەیوەندیەدا پاڵپشتی و پشتگیری به‌یاننامه‌كه‌ی سه‌رۆكی هه‌رێمی كوردستان، و په‌رله‌مانی كوردستان،و مه‌كته‌بی سیاسی یه‌كیتی نیشتیمانی كوردستان و گشت فراكسیۆن و حزب و لایه‌نه سیاسییه‌كانی هه‌ر چوار پارچه‌ی كوردستان ده‌كه‌ین، و ئه‌و هه‌ڵوێستانه به‌به‌رز و پیرۆز ده‌نرخێنین و داواش له‌لایه‌نه‌كانی ڕۆژئاوای كوردستانیش ده‌كه‌ین هه‌موو ناكۆكیه‌كانی نێوانیان وه‌لا بنێن، و به‌یه‌ك گوتاری نه‌ته‌وه‌یی و هێزێكی یه‌كگرتووی نه‌ته‌وه‌یی ڕووبه‌ڕووی ئه‌و هێرش و په‌لاماره داگیركاریانه‌ی تیرۆرستانی داعش ببینه‌وه، و نه‌هێلین بستێك له‌خاكی پیرۆزی كوردستانمان لێ داگیربكه‌ن .
* بژی به‌رخۆدانی گه‌له‌كه‌مان له‌ڕۆژئاوای كوردستان و هه‌رێمی كانتۆنی كۆبانی
* نه‌فره‌ت له‌تیرۆر و تیرۆرستانی داعش
* بژی خه‌بات و ئیراده‌یی یه‌كێتی نه‌ته‌وه‌یی كوردستان
ناوی حزب و لایه‌نه كوردستانیه‌كان :
* ئه‌رته‌شی ئازادی ڕۆژهه‌ڵاتی كوردستان
* حزبى شيوعيى كوردستان / ڕێكخستنی باشووری كوردستان
*حزبی ئاینده‌ی كوردستان
* بزوتنه‌وه‌ی كۆماریخوازانی ڕۆژهه‌ڵاتی كوردستان
* یه‌كێتی شۆڕشگێڕانی كوردستان
* پارتی سۆسیالیستی كورد ( پاسۆك )
* پارتی سه‌ربه‌خۆیی كوردستان
* جولانه‌وه‌ی هاوڵاتی ئازاد و یه‌كسان
* پارتی ناسیۆنالیستی كورد
* ده‌سته‌ی سه‌رۆكایه‌تی حزبی ڕزگاری كوردستان
* بزوتنه‌وه‌ی نوێبوونی لاوانی كوردستان
* پارتی ڕزگاری نه‌ته‌وه‌یی توركمان
* پارتی لیبڕاڵ دێموكراتی كوردستان
* پارتی كۆماری كوردستان
29 / گه‌لاوێژ / 2714 كوردی
20 / 9 / 2014 زایینی
