هەولێر ٢٠شوبات/فەبرایەر (PNA)- له کۆبوونەوەی ئاسایی پەرلەمانی تورکیا، پەرلەمانتارێکی "پارتی گەلی کۆماری"(CHP) بێ‌ڕێزی به سەرۆکی هەرێمی کوردستان دەکات و پەرلەمانتارێکی "پارتی ئاشتی و دیموکراسی"(BDP) به توندی وڵامی دەداتەوه. 

له کۆبوونەوەی ئاسایی پەرلەمانی تورکیا "ئایتون چرای" پەرلەمانتاری سەر به CHP گوتی: "چۆن دەبێت نوێنەرانی مەسعود بارزانی به ناوی هاوکاری پاره بەسەر کەسوکاری "مردووەکانی رۆبۆسکی"دا بڵاو بکەنەوه و ئێوەش چاوپۆشیی لێدەکەن، ئەمه پێشێل کردنی سەروەریی ئێمەیه، ئێوەش بۆ سەرۆکی CHP ئاستەنگی دروست دەکەن و هۆکاری بێ‌واتای بۆ دێننەوه و بۆ سەرۆکی عەشیرەتێکیش رێگه خۆش دەکەن."

دوای ئەمه "ئاڵتان تان" پەرلەمانتاری BDP له وڵامی ئەو پەرلەمانتارCHP گوتی: "بۆ وڵام دانەوەی ئەندامی CHP هاتوومه که سووکایەتیی به سەرۆکی هەرێمی کوردستانی عێراق مەسعود بارزانی کرد، بەڵام پێش ئەوه ئەمەوێ AKP(پارتی داد و گەشەپێدانی دەسەڵاتدار) شەرمەزار کەومەوه، دەزانم ئەوان دەڵێن که چ پەیوەندیی به ئێمەوه هەیه، بەڵام من دەڵێم دەبوا ئێوه وڵامی ئەو گوتانەتان داباوه."

له کاتێک که ئاڵتان تان قسەی دەکرد، یەکێک له پەرلەمانتاران پێی گوتی که "تۆ هیچ ئیش و کارێکت نییه که بەرگری له مەسعود بارزانی دەکەی"، ئاڵتان تانیش به گاڵتەوه پێی دەڵێت: بەڵی مەسعود بارزانی ئامۆزامه و بەرگری کردن لەو ئەرکی سەر شانمە و ئەوەی پێی ناخۆشه با هەستێتەوه.

تان گوتی: "لێره به گوێرەی دیپلۆماسی و مافی نێودەوڵەتی و له چوارچێوەی مافی دەوڵەتیی دۆست و برامان هەرکەس لەسەریەتی شێوازێکی دروست بەرامبەریان بەکار بێنێت، ئەوانەی ئێوه به سووکایەتیی پێدەکەن و پێی دەڵێن سەرۆک عەشیرەت، لەناو کورد پێگەی خۆیان هەیه، هەر هاوڵاتییەکی بەشەڕەفی تورکیا، دەبێت ئەو قسانه ببێته به برینێک لەسەر دڵی. ئەم قسانه سوودێکی بۆ هیچ لایەک نییه و بەکارهێنانی ئەم شێوازه زۆر هەڵەیه."

ئەو پەرلەمانتارەی BDP وەبیری هێناوه که "کۆماری تورکیا میراتگری ئیمپراتۆری عوسمانییه و عوسمان بەگیش سەرۆک عەشیرەتێکه و سەرۆک عەشیرەت بوون شتێک نییه که مرۆڤ شەرمی لێ بکات و خۆزگه ئەو ئەدەب و نەریتەی که سەرۆک عەشیرەت هەڵگریەتی، هەندێک لەم برادەرانەی ئێره هەڵگری بان، ئێوه ناچاران ئەم شیوازه بگۆڕن."

ئاڵتان تان گوتی: من تێناگەم ئەو دۆژمنایەتی و نەفرەتەی ئێوه بەرامبەر کورد له کوێوه سەرچاوه دەگرێت؟ له ئەوروپا دوو ملیۆن "ئارناووت" هەیه که دوو و نیو دەوڵەتیان هەیه، چیچان و نەخچەوان دەوڵەتی خۆیان هەیه، لەم جیهانەدا میللەتی کوردی مەحروم کراو و زوڵم لێکراو له ژێر ئەو ئاسمانەدا هەرێمێکیان بەدەست هێناوه، بۆ هێنده بەرچاوتەنگن؟ ئەو نەفرەت و دۆژمنایەتییه بۆچی؟ ئێوه بەو نەفرەته چۆن دەتانەوێت تورکیا بەڕێوەببەن"

تان گوتی: راشکاوانه دەڵێم ئەو قسانه زۆر هەڵەیه و داوا لەو برادەرە دەکەم بێته ئێره و له قسەکانی پاشگەز بێتەوه.

سه رچاوه: په یامنیر