^{موعتەسەم نەجمەدین}

^{بە شێوەیەكی گشتی نكۆڵی لەوە ناكرێت ئەوەی ئەمرۆ لە سەر ئاستی گەردونی رودەدات، جێگیربونی فەوزا و ئاڵۆزیەكی زۆرە لە سەرجەم جومگەكانی ژیان، هۆكاری سەرەكی ئەمەش ئەوەیە كە ئەمرۆ جیهان لە قۆناغی پەرینەوەدایە بۆ قۆناغێكی باڵاتر، ئەمەش لە سەر ئەرزی واقع بارێكی ناجێگیر و ئاڵۆزی، سیاسی و كۆمەڵایەتی و ئابوری و كلتوری و دەرونیشی دروستكردوە، ئەم ناجێگیری و پەرینەوەو بەرەوپێشچونەش لە هەموو ناوچە و وڵاتەكاندا بە یەك خێرایی و یەك ئاراستە و هاوشان ناچێت بە رێوە، هەر وڵاتێك بە باڵای خۆی پشكی گۆران و نوێبونەوە یان بەرەو پێشچونی بەر دەكەوێت، لەم چوارچێوەیەدا خێرایی و ئارستەی بەرەوپێشچون و گەشەكردنی وڵاتانی دواكەوتوو، جگە لە هەڵگری خەسڵەتی سستی و ئیفلیجی، هەڵگری كۆمەڵێ قەیرانی ئیداری و كۆمەڵایەتی و سیاسی و ئابوریشە، ئەم رەوشە لەم وڵاتانە وایكردوە كێشە و گرفتەكانی پەرینەوە زۆر خەستر و ناجێگیرتر بێت لە وڵاتانی پێشكەوتوو. لەم بازنەیەدا ئەگەر هەرێمی كوردستان بە نمونە وەرگرین، كۆمەڵێ قەیران وابەستەی واقعی كوردی بوون كە هەر یەكەیان بە هەردوو باری ئاسۆیی و عەمودی بە شێوەیەك تا كرۆك شۆر بونەتەوە، شیكار دەگەیەنێتە ئەو باوەرەی كە ئەم قەیران و كێشانە زگماكی كۆمەڵگای كوردین.}

^{چڕبونەوەو تێهەڵكێشبوونی كێشە وگرفتە سیاسی و كۆمەڵایەتی و ئابوری و ئیداریەكانی هەرێمی كوردستان لەم كات و ساتەدا كە لە ئاكامی یەكگرتنی هەردوو هۆكاری خۆیەكی و دەرەكی، واتە كەم شارەزایی و ناهۆشیاری تاك و دواكەوتویی كۆمەڵگای كوردی و ئیفلیجی دەسەڵاتە سیاسیەكەی لە دۆزینەوەی چارەسەر بۆ گرفت و قەیرانەكانی لەلایەك و دەستێوەردانی نەیارانی كورد بۆ لە باربردنی ئەم ئەزمونە و تێكدانی ئەم واقعە و شێواندنی بەها و ئاكار و شكاندنی هەموو پیرۆزیەكان لە لایەكیتر، واقعێكی سیاسی نادروست و دۆخێكی نا ئارام و بارێكی ناجێگیری دروستكردوە.}

^{كوردستان ئەمرۆ وەك هەر وڵاتێكی تری گەشەكردو لە قۆناغی پەرینەوەدایە لە كۆمەڵگایەكی بەكاربەری دواكەوتوەوە بۆ دانانی بناغەی كۆمەڵگای مەعریفە، لە ئابوری كشتوكاڵی و پیشەوەری و شوانكارەیەوە بۆ ئابوری مەعریفە، لە سەردەمی راگەیاندنی كاغەزەوە بۆ راگەیاندنی ئەلكترۆنی و كەناڵی ئاسمانی، لە شاری بازاری ناوەندەوە(الاسواق المركزیە) بۆ شارێك ناوەندی نیە، ئەم گۆڕانكاری و دیاردانە ئەوە دەخوازن لە بواری سیاسیشدا كوردستان زەمینەی پەرینەوە لە قۆناغی دیموكراسی نوێنەرایەتی هەقیقیش بۆ دیموكراسی میدیایی برخسێنێت، نەك كاركردن بە ئاراستەی پەروەردەكردنی مرۆڤی دۆگما و عەقائیدی، نەك توانای دامەزراندنی دیموكراسی نوێنەرایەتیشی نەبێت، زەمینەی گۆرینی سروشتی تاكی كوردی لە هاوڵاتی ئاساییەوە بۆ مرۆڤی تۆرە ئەلكترۆنیەكان برەخسێنێت، كۆی ئەم خواستانە گۆران و نوێبونەوەی گەوهەری لە سەرجەم چەمك و بوارەكانی ژیان دەخوازێت، گۆڕان لە سیستەمی كۆمینیكەیشن، پەیوەندیەكانی نێوان تاك و تاك، تاك و كۆمەڵ، تاك و دەسەڵات، دەسەڵات و كۆمەڵ، گۆڕانی گەوهەری لە گرێبەستی كۆمەڵایەتی دەخوازێت.}

^{لەم سات و كاتەدا لە ئاكامی نزمی ئاستی هۆشیاری و لاوازی بیركردنەوەمان و سستی تێگەیشتنمان بۆ خواستەكانی ئەم قۆناغە، كۆی دەسەڵات و كۆمەڵگای كوردی لە بازنەیەكی بۆشدا دەخولێینەوە، ئێمە لە بارێكداین دوای دەیان ساڵ خەبات و تێكۆشانمان بۆ ئازادی و مافی چارەی خۆنوسین لە دوای بە دەست هێنانی لە پەیرەوكردندا دەیخنكێنین. خەباتمان بۆ دیموكراسیەت لە مومارەسەكردندا ریسوایدەكەین.
بەرهەمی هەموو خەبات و قوربانیمان بۆ كۆتایهێنان بە زوڵم و زۆر، داهێنانی شێواز و سیستەمێكی نوێی زوڵم و چەوسانەوەیە. كێشەی سەرەكی وگەورەی ئێمە ئەمرۆ لە عەقڵماندایە، ئێمە گرفتمان لەگەڵ چەوتیی سیستەمی بیركردنەوە و زاڵبونی باوەری دۆگما بە سەر عەقڵ وبیركردنەوەماندایە.}

^{گرفتی تاكی ئەمرۆ وەك ئەوەی عەلی حەرب دەیڵێت(لە گەوهەردا شەری مرۆڤ  نیە لە گەڵ جیهانگیریدا، گرفتی پێكدادانی شارستانیەكان نیە، یان شەر و ناكۆكی نێوان ئیسلام و رۆژئاوا نیە، بەڵكو شۆكی مرۆڤە لە گەڵ عەقڵ و دەرونی خۆی، گرفتی مرۆڤە لەگەڵ خودی خۆیدا. لەم چوارچێوەیەدا ئێمە وەك كورد گرفتمان لە گەڵ عەقڵ و هۆش و تێروانیندا هەیە، ئیمە لە بارێكداین توانای رەتكردنی عەقڵیەتی شاخمان نیە.}

^{لە بواری سیاسیدا گومان لە وەدا نیە كە دەسەڵات و سیستەمی سیاسی كوردستان لە قەیراندایە، بۆیە دەڵێم قەیران، چونكە كۆی كێشە و گرفتەكان تێهەڵكێش و وابەستەی یەكتربوون، بە شێوەیەك ئەگەر بە قەیرانیش نەبوبێتن، بەرگی قەیرانیان لەبەركردوە، بۆیە پێویستی بەخۆداچونەوەو سەرلەنوێ دارشتنەوەی هزر و شێوازی سیستەمی سیاسیمان بوە بە زەروریەتێكی مێژویی. ئەوەی لە كۆمەڵگا و رەوشی گشتی ئێمە روویداوە، لە لایەك لە ئاكامی بوونی مێژویەكی خوێناوی و شەر و ناكۆكی نێوان حیزب و لایەنە سیاسیەكان و بەردەوامبونی تا ئەمرۆش، لە لایەكیتر بە هۆی دەستێوەردانی نەیارانی كورد بۆ ئەم ئەزمون و كیانەی دامان مەزراندوە، ئەم دوو فاكتەرە پێكەوە بوون بە هۆكاری سەرەكی تێكچونی ئاشتەوایی كۆمەڵایەتی و شێواندنی یەكریزی ناوماڵی كورد. ئاڵۆزی و قوڵی و بەرینی ئەو شەر و ململانێیانە وایكردوە بناغەی پەیوەندیە كۆمەڵایەتیەكان، بەڵكو ژێرخانی دەسەڵات و كۆمەڵگای كوردی لە ریشەوە هەڵوەشێنرێتەوە یان تێكبشكێت، بۆیە زۆر جار شەر و ململانێ سیاسیەكان كارەساتی كوشتن و پاكتاوكردنی زۆر قێزەوەنی لێكەوتوەتەوە، لەلایەكیتر بێ توانایی لە دامەزراندنی سیستەمێكی دیموكراسی هاوچەرخ و رەتكردنی عەقڵانیەتی تاكرەوی و باوەری دۆگمای گشتگیری، بناغەی سەرەكی تێكچونی ناوماڵی كوردە، ئەم سروشتە سەرتاپا كۆمەڵگای كوردی گرتوەتەوە لە دەسەڵات و ئۆپۆزسیۆن، بازار و بازرگانی، رۆژنامەنوسی و روناكبیری، رێكخراو و كۆمەڵەی مەدەنی.. هتد، ئێمە ئەمرۆ لە بارێكداین سەرجەم جومگەكانی ژیانی سیاسی و كۆمەڵایەتی و كەلتوری و ئابوریمان ، دامەزراوەو رێكخراوەكانمان لە دەسەڵاتی تەشریعی، جێبەجێكردن، دادوەری، رێكخراوەكانی كۆمەڵگای مەدەنی و مافی مۆڤ، راگەیاندن و روناكبیری، ..هتد لە قەیراندایە.}

^{لە راستیدا ئێمە ئەمرۆ لە حاڵ و بارێكداین نەك هەر درز كەوتوەتە یەكریزی ناوماڵی كوردەوەو ئاشتەوایی كۆمەڵایەتیمان شێواوە، بگرە ئەم كێشەیە خەریكە دەبێت بە قەیران و شكان. سروشتی ئەم كێشانە كە بە شێوەیەكی گشتی بە دوو ئاراستەو لە دوو بواردا چڕ دەبێتەوە، یەكیان كێشەی نێوان عەقڵیەتی ئیسلامگەرایی و خواستی ناڕوون و كەم میروەتی عیلمانیەتی ئەم وڵاتەیە، كە دۆخێكی هزری شێواو و تێروانینێكی ناڕوونی دروستكردوە، ئەویتر كێشەی نێوان  خودی حیزب و لایەنە سیاسیەكان خۆیانە بە عیلمانی و ئیسلامیەوە، قەیرانێكی زەقی نێوان هەردوو رەوتی ئیسلامی و عیلمانی وڵاتانی عەرەبی، نێوان خودی ئیسلامیەكانی وڵاتانی ئەو وڵاتانەیە بە كۆپی بۆ لای ئێمە نێردراوە.}

^{لە مێژووی خەباتی رزگاری كوردا بەردەوام سێ هزری جیاواز بە هەموو كێشە و كەم و كوریەكیانەوە وەك سەرچاوەی خەباتی سیاسی و چەكداری بونی هەبووە ئەوانیش هزرەكانی (نەتەوایەتی، ماركسیزم، ئاینی)ە، لەم سێ هزرە چەندین رەوت و حیزبی سیاسی بە پۆشاك و سیمای جیاوازەوە دامەزراون، بەڵام بەدەگمەن بووە ئەم لایەنانە بەبێ شەر و ناكۆكی ژیابێتن یان ناكۆكیەكانیان دور لە بەكارهێنانی هێز چارەسەر كردبێت، سروشتی شەر و ململانێكانی كورد بە درێژای مێژوو ئەوەندەی شەری بەرژەوەندی حیزبی و شەخسی بووە ئەوندە ململانێ و جەنگی جیاوازی هزر و بیرورا نەبووە. بۆ نمونە جەنگی نێوان عیلمانیەتی كوردی ئیسلامیەتەكەی هیچ كات شەری هزری و جیاوازی بیرورا نەبوە، ئەوەندەی شەر لە سەر كورسی دەسەڵات و دابەشكردنی دەسكەوت و داهات بووە، بۆیە هیچ كات ئەم شەرە نەیتوانیوە بە ئارامی و ململانێی سیاسی و هزری دور لە بەكارهێنانی هێز و بەعەقڵانیەت بەرێوە بچێت.}

^{بەدرێژای خەباتی رزگاری نەتەوەی كورد تا ساڵی 1994 و دامەزراندنی یەكگرتوی ئیسلامی وەك باڵێكی ئیخوان موسلمینی عەرەبی بە پۆشاكی كوردیەوە، چەمكی خەباتی ئاینی لە دوای نەتەوەییەوە هاتووە، بەڵام لە دوای دامەزراندن و گەشەكردنی حیزبی ئیسلامی لە سێبەری ئەو زەمینە نیمچە ئازادەییەی واقعی كوردیدا، ئیسلامیەكانی كورد بە تەواوی بونە بە شێك لە بزوتنەوەی ئیسلامی عەرەبی و ئەجندای ئیسلامی عەرەبی و توركییان هەڵگرد، لەم كاتەوە چەمكی رزگاری نەتەوەی و نیشتمانیان نەك هەر خستە دوای خەباتی ئاینی، بگرە كردە قوربانی ئەجندای حیزبە ئیسلامیە عەرەبیەكان، لەو كاتەوە هاوكێشەی خەبات و شۆرش لای گروپە ئیسلامیەكان گۆڕا. لە راستیدا ئەمە یەكەم درزە كە ئیسلامیەكان خستیانە ناو یەكڕیزی خەباتی رزگاری و نەتەوەیی كوردییەوە. لە دوای ئەمانیش پەیوەندی و هەڵسوكەوتی نادروست و توند و تیژی نێوان دەسەڵات و ئۆپۆزسیۆن ئەو ئاشتەوایی و یەكریزی ناوماڵی كوردیان بە تەواوەتی شێوان و درزەكەیان كرد بە لێكترازان، بە شێوەیەكی گشتی ئەم بارودۆخە نەك هەر كۆمەڵگای كوردی توشی گرفت و نەهامەتی كردوە، بەڵكو ئەو زەمینەیەی خوڵقاندوە كە كۆی هەموو ئەو پرۆژە و پلانانەی بۆ رزگار بوون لەم دۆخە دادەرێژرێن بە ئیفلیجی لە دایك بن، یان هەر نەبێت لە قۆناغی پراكتیزەیدا توشی قەیران و بەربەستی زۆر گەورە بێت.
لەم كاتەدا كە كێشە و شەری ناوخۆی (سوریا) سنوری ئەو وڵاتەی بەزاندوە، بەشێكی زۆر لەو گرفت و كێشانە وابەستەی دۆزی كوردە، بگرە پڕشێكی ئەو شەرە بە شێوەیەك لە شێوەكان هەرێمی كوردستانی گرتوەتەوە، دەستێوەردانی تورك لەم شەرەو دژایەتیكردی لە مێژینەی بۆ دۆزی كورد و هەرێمی كوردستان لە لایەك و هەوڵی هەندێك لە لایەنە شەركەرەكان بۆ گواستنەوەی ئەم شەرە بۆ ناو هەرێم و بە پراكتیكی دابەشبونی كوردستان لە نێوان بەرەی ئێران و بەرەی توركیادا، نەك هەر هەرەشەیەكی جدین بۆ ئایندەی دۆزی كورد و هەرێمی كوردستان، بگرە دور نیە كورد وەك نەتەوە نەبێتە قوربانی ئەم شەرە. بەواتە هەوڵێكی جدی هەیە بۆ ئەوەی چەقی ئەم جەنگەی هەردوو بەرەكە بخرێتە هەرێمی كوردستانەوە، توركەكان لە رێگای ئۆپۆزسیۆنی (سوریا) و پارتی دیموكراتی كوردستانی عێراقەوە راستەوخۆ كار بۆ روخاندنی رژێمی سوریا دەكەن، لە بەرامبەریشدا ئێران لە رێگای مالكی و دەسەڵاتی شیعەگەری عێراقەوە پشتگیری لە مانەوەی دەسەڵاتەكەی بەشار دەكات، لەم گەمەیەدا وەك یەكێتی لەگەڵ ئەوەی لەم كاتەدا بێ دەنگی هەڵبژاردووە، بەڵام بەوەی دەكەوێتە ناوچەی نفوزی ئێرانەوە كە هەموو ناوچەی سلێمانی دەگرێتەوە، دەكەوێتە بەرەی ئێران و مالكی و پەكەكەوە، بە واتە بە پراكتیكی كوردیان كردوە بە دوو بەشەوە، هەر بەشێكیانیش كەوتوەتە بەرەی دژ بە ئەوی تر.
لەم بارودۆخەدا تێكهەڵكێشبون و ئاڵۆز بونی كێشە و گرفتەكان بە شێوەیەكە كۆی دەسەڵات و كۆمەڵگای كوردی پێكەوە توشی قەیرانێكی فرە رەهەند و فرە لایەن كردوە، بۆیە محاڵە بەبێ بونی پرۆژەیەكی كامڵ و گشتگیری نیشتمانی بتوانرێت لەم بار و دۆخە رزگارمان بێت.}

^{لە روی تیۆریەوە ستراكچەری ئەم پرۆژەیە دەبێت دیباجە و ناوەرۆك لە خۆبگرێت، لەگەوهەردا چارەسەری زانستی و وردی بۆ كۆی كێشە و گرفتەكان هەبێت، لە روی پراكتیزەیشەوە پێش هەر شتێكیتر، دەبێت ئیرادەیەكی راست و جدی بۆ جێبەجێكردنی ئەم پرۆژەیە هەبێت، دامەزراندنی پرۆژەیەكی لەم شێوەیە بە بێ كۆمەڵێ پێشمەرج رەنگە بەرهەمی دیار و كاریگەری نەبێت.}

^{پێشمەرجەكانی رێكخستنی نێو ماڵی كورد وسەپاندنی پرانسیپەكانی ئاشتەوای كۆمەڵایەتی
لە پێناو یەكخستن و رێكخستنی نێو ماڵی كورد و سەپاندنی ئاشتەواییەكی بتەو و درێژخایەن پێویستە كورد بناغەیەكی بتەو و بەهێز بۆ ئایندە دارێژێتەوە، لەم حاڵەتەشدا جێگیركردنی یەكریزی و ئاشتەوایی كۆمەڵایەتی مەحاڵە بە بێ دارشتنەوەو داهێنانی پرۆژەیەكی دروست و جدی هیچ بەرهەمێكی هەبێت. بۆ دارشتنەوەی ئەم پرۆژەیەش سەرەتا كۆمەڵێ پێشمەرج و ئیجرائاتی جدی پێویستە لەوانە:
-1 دامەزراندنی لیژنەیەكی تایبەت بۆ توێژینەوەو شیكاركردنی سەرجەم كێشە و گرفتەكان، ئەم لیژنەیە نوێنەری سەرجەم توێژ ولایەنە سیاسی و كۆمەڵایەتیەكان و راگەیاندنكاران و روناكبیران و ئەكادیمیستیەكان لە خۆ بگرێت. ئەركی كۆتای ئەم لیژنەیە لە دوایدا دارشتنەوەو نوسینەوەی پرۆژەیەكی كامڵ و واقعی بێت.
-2 دارشتنەوەو گرێدانی پەیمانێكی ئاكاری بۆ پابەندبوون بە بەرژەوەندیە نەتەوەیی و نیشتمانیەكانەوە لە نێوان سەرجەم پێكهاتەكانی كوردی لە دەسەڵات و خەڵك.
-3 سازاندن و رەخساندنی زەمینەی گفتوگۆو و مشتومرێكی دروست و ئازاد لە پێناو گەیشتن بە راستی و خستنەروی كێشە و گرفتەكان بە بێ ترس و شاردنەوە.
-4 رەخساندنی زەمینەی جێبەجێكردنی پرۆسەی سەروەری یاسا و ئازادی دەسەڵاتی دادوەری، گەرانەوە بۆ شەرعیەتی یاسایی و دەستوری، رێزگرتن لە بەها و پرانسیپەكانی یەكسانی كۆمەڵایەتی.
5- كاركردنی جدی بۆ دامەزراندنی دەسەڵاتێكی رەشید، كە ئەمرۆ لە دنیادا بوەتە پێشمەرجی جێبەجێكردنی هەر پرۆژەیەكی چاكسازی و گەشەكردن و بەرەوپێشچون.
-6 چالاككردن و ئازادكردن و سەربەخۆكردنی دامەزراوە مەدەنی و دەستوریەكان لە دەست حیزب و رێكخراوە سیاسیەكان لەوانە(پەرلەمان، رێكخراو ودامەزراوەكانی چاودێری و نەزاهەت، راگەیاندن، رێكخراوەكانی كۆمەڵی مەدەنی، رێكخراوەكانی مافی مرۆڤ).
-7 دامەزراندنی زەمینەی شەفافیەت و پەیرەوكردنی پرانسیپەكانی رێكخستنی ئەمەش لە یاسادا جێی كرێتەوە.
-8 تێكەڵكردنی بنەما و پرانسیپەكانی لێبوردەیی و ئاكار و رۆشنبیری ئاشتەوایی و ئینتما و خۆشەویستی بە سیستەمی خوێندن و پەروەردەكردن و بانگەشەكردن بۆی و دانانی لە ریزی پیرۆزیە نیشتمانیەكاندا ، چونكە هەر گەل و میلەتێك پیرۆزی نەبێت مەحاڵە بتوانێت سەروەریەكانی لە بێحورمەتی و سوككردن بپارێزێت.
9- رەخساندنی زەمینەی كاری بە كۆمەڵ و هاوبەش لە هەموو ئاست و ناوەندەكان بە بێ بە هەند وەرگرتنی جیاوازیە سیاسی، كۆمەڵایەتی كلتوری و ئابوریەكان ...هتد.
10- رەخساندنی زەمینەی ئازادی رادەربرین و گوزارشتكردن لەبیر و بۆچونە جیاوازەكان، پایە و فاكتەرێكی سەرەكی یەكخستنی نێوماڵی كوردی و سەپاندنی ئاشتەواییەكی هەقیقیە، بەڵام ئەوەی لەم زەمینەسازیەدا جێگای وەستان و وریابونەوەیە سروشت و واقعی چەمكی ئازادیە، لەروی تیۆریەوە چەمكی ئازادی بۆ خۆی تێگەیەكی دیارە، بەڵام پەیرەوكردنی ئازادی، قەبارە و مەودای ئازادی بە پێی كات و جێگا دەگۆرێت، چونكە ئەم چەمكە پێش هەر شتێك وابەستەی ئاستی پێشكەوتن و پلەی وشیاری تاك و كۆمەڵگایە. لەم چوارچێوەیەدا هەڵسوكەوت و كردەوەی دروست ئەوەیە تاكەكان ئەگەر تا سەر ئێسك لە بیر و بۆچوندا جیاوازبن، بەڵام هەڵوێستیان لە سەر بەرژەوەندی نەتەوایەتی و كۆمەڵایەتی یەك بێت، ئەمرۆ لە ئاكامی پاشەكشێی مۆدێلی ئەمەریكی لە ئاراستەكردنی ژیان بە گشتی، هاتنە پێشەوەی مۆدێلی چینی و تازەبونەوەی مۆدێلی روسی و ئەوروپی، شتێك نەماوە ناوی ئازادی رەها بێت، لە سەرجەم بوارەكانی سیاسی و كۆمەڵایەتی و ئابوریی....هتد.
لەم بارودۆخەدا رۆڵی گرنگ و بەرپرسیارێتی تەنیا بۆ دەسەڵات، بە ئۆپۆزسیۆنیشەوە نیە، بەڵكو سەرجەم پیاو ماقوڵان و رۆشنبیران و رۆژنامەنوسان و بازرگان و بەڵێندەرانەوە و پیاوانی ئاینی و خوێندكاران....هتد. بەرپرسن و دەبێت رۆڵی ئیجابیان هەبێت، و كار بۆ رەخساندنی بەعەقڵانیكردن بكەن.
-11 جێبەجێكردنی پرانسیپەكانی عەدالەتی كۆمەڵایەتی، یەكێ لە پایە سەرەكیەكانی ئاشتەوایی كۆمەڵایەتی و یەكریزی پێكهاتەكانی میللەتە، بەبێ سەپاندنی پرانسیپەكانی عەدالەتی كۆمەڵایەتی محاڵە بتوانرێت یەگریزی كۆمەڵگای كوردی بپارێزرێت.
-12 گرنگیدان بە پرسی هاوڵاتیبوون كە ئەمرۆ لە كوردستاندا لە قەیرانێكی جدیدایە.
-13 رێكخستنەوەی كاری راگەیاندن و رۆژنامەگەری كوردی.
-14 كۆی ئەم پێشمەرجانە  بە بێ سەر لەنوێ دارشتنەوەو داهێنانی گرێبەستێكی كۆمەڵایەتی نوێ و پابەند بوون، سەرجەم چین و توێژەكانی میللەت لە  دەسەڵات و كۆمەڵگا ئەستەمە .
خوڵاسەی خیتام رێكخستنی نێو ماڵی كورد و سەپاندنی ئاشتەوایی كۆمەڵایەتی لەم بارو دۆخەی ئەمرۆدا بە تایبەتی كاتێك كە سەرتاپا ناوچەی خۆرهەڵاتی ناوەراست و جیهانی عەرەبی و وردتریش چوارگۆشەی نێوان عێراق، سوریا، ئێران، توركیا دەكوڵێت. ئەرك و بەرپرسیارێتیەكی ئاكاریە،  ئەم ئەرك و بەر پرسیارێتیە سەرتاپا چین و توێژەكانی میللەتی كوردە هەر خۆگێلكردن و خۆشاردنەویەك.}

^06/12/2013