^{پەیامی بزووتنەوەی کۆماریخوازان بە بۆنەی کۆچی دوایی دوکتۆر ڕەحیم فەرەهمەند}

^{بەداخەوە هەواڵی دڵتەزێن و ناخ هەژێنی کۆچی دوایی کەسایەتی كوردپەروەر و پایەبەرز و خۆشناو دوکتۆر ڕەحیمی فەرهەمەند لە دامەزرێنەرانی کۆڕی کوردانی نیشتەجێی تاران و سکرتێری پێشووی بەرەی یەکگرتووی کورد لە ڕۆژھەڵاتی کوردستان، بۆوە بە مایەی خەمباری و دڵگرانیمان.
بزووتنەوەی کۆماریخوازی ڕۆژهەڵاتی کوردستان گیان لە دەست دانی دوکتۆر ڕەحیم فەرەهمەند وەکوو کەسایەتییەکی سیاسی و نەتەوەیی و مەدەنی کورد، هەروەها دۆست و هاوبیری نزیکی بزووتنەوەی کۆماریخوازانی ڕۆژهەڵاتی كوردستان کە هەموو هەوڵی لە پێناو گەیشتن بە ئاشتی و چارەسەری ئاشتیانەی پرسی کورد لە رۆژھەڵاتی کوردستان تەرخان کردبوو بە خەسارێکی گەورە و قەرەبوونەکراوەی گۆڕەپانی خەباتی سیاسی و مەدەنی کوردی دەنرخێنێت.}

^{بۆیە لەم پەیوەندییەدا بزووتنەوەی کۆماریخوازان سەرەخۆشی ئاڕاستەی بنەماڵە و کەسوکاری ئەو ئازیزە و سەرجەم گەلی کوردی سەربەرز دەکات و خۆی بە شەریکی غەم و پەژارەیان دەزانێت، و هیوای سەبووری و سەرساغی بۆ گشت لایەک دەخوازێت، و لە خوای بەرزەناوی بێ هاوتا داواکارە، کە روح و ڕەوانی ئەو تێکۆشەرە سەربەرز و خۆشەویستە بە بەهەشتی بەرین شاد بکات، و ئەزیزان و یارانی لە بەلا و مووسیبەتی عەرزی و ئاسمانی بەدوور ڕابگرێ.}

^{بزووتنەوەی کۆماریخوازانی ڕۆژهەڵاتی کوردستان
٢٤ی خاکەلێوەی ۲۷۲۴ی کوردی/۱۴۰۳ی هەتاوی
١٢ی ئاوریلی ۲۰۲۴ی زایینی}